SOOLLA 104 - Boy Lonana

Ŋga sa ma li tlena belna

¹ An gi deɓ maŋ Bu Suuna. Yawe, Loonna, aŋ dlaŋ ŋgol cocoo. Aŋŋi sa ma bibiŋil ma dlam ŋgolna,

² kiɗikka cuki egeŋ ko ndal barawna na, huulona ni ko ziiŋŋa na.

³ Nam cuk ziim kay mbo ma kolona, ɗugulla ni ko pus pus mamma na, nam tuɗ kolo kay garaŋ semeɗna.

⁴ Nam mbuɗ babaana ni suu sun mamsina, sin kura ni vara ka sunumba.

⁵ Nam min ndaŋgara eŋ cocoo, ndaɗ ka coli tew tew ka geŋeɗɗi.

⁶ Aŋ ŋguyuɗ ki u mbo lum ma ŋgolna ko baraw ma taɗna na. Mbona kak kolo kay ɦinira lay.

⁷ Hu li ma aŋ ɓakamma nam yow liŋa, hu li ma aŋ bayna nam ŋgay tamu.

⁸ Ɓaɗ ay ki ga kay ɦinira, tuɗ hu li ma aŋ ŋgaɓamma a nam tuɗ huna.

⁹ Li ma aŋ min a mbona tok ki huna, nam tuɗ ni hu may kay nam li ki kay yam ndaŋgara halaŋgi.

¹⁰ Aŋ law yo ma jivina ay hu goloŋina mbona ka ɓaɗ duk ɦinira.

¹¹ Tlesuu ŋgoo bagina halaŋ ka ciya, kor suu bagina halaŋ ka ci lay.

¹² Tok eg mbona laygi suu pii kolona ka lakiya, asi ka gi soolla kolo hum ŋgusugina.

¹³ Aŋ hu li ma aŋ ay kaki huna, aŋ ka ɦal mbona maŋ ɦinira. Ndaŋgara hoɓi u tlesuu aŋ lasina.

¹⁴ Aŋ day usuna kolo maŋ yoorina, wa ma sana horokomma ka fi tiimma hu may.

¹⁵ Sum veŋŋa ka furi huu suu warna, mbulna ka lasi ti ma jivina. Funa kay a ɦasi saɓakŋa may.

¹⁶ Ŋgusi suu vi Yawena ka hoɓ u yona tew tew, gu ma yam ana sedre ma hu Libanna, nam zaaram ha ni namu.

¹⁷ Hu li namma laygina min ziisi huwa, jalyamba buu hu ŋgus ma yam ana siprena.

¹⁸ Ҥuraboyna buu ni kay ɦinira fiyekka koloo, murgumma buu ni ga duk gogoyra may.

¹⁹ Nam col tilna kolo a ŋga buu ma luuna, faɗta a ŋga lerra may.

²⁰ Aŋ tin ndufunda may, ni njeŋgera, tle bagi suu ay duk gugunina na cuk ki kiɗik halaŋ.

²¹ Dlona vi va wa ni nam gi ŋgoɓpa, asi joɓ tiisina ni ko Lona may.

²² Lina fo ki wa ni asi ŋgay tasi halaŋ, asi tuɗ buu ki hu zulusiya.

²³ Sana tuɗ hu sun mamba may, tuɗ hu li ma horokŋa ta ta tew fiɗigira.

²⁴ Yawe sun maŋga ndaɗ bolow cocoo, aŋ laɗ halaŋŋi u yalna, tlesuu kay ndaŋgarana halaŋ aŋ lasi ni aŋu.

²⁵ Gola mbo lumma hayam ŋgol cocoo, vabakgina u yoorina ka tuɗ zeɗ zeɗ ka ndumbi, suu ŋgolona u suu gorina lay.

²⁶ Lum kawina ka tuɗa, hoŋ ay lay, aŋ li kuluf ŋgolna a luu u namba lay.

²⁷ Tle asina halaŋ ka ni kaŋ aŋ dew, aŋ ka ɦasi tiisina u voɗom halaŋ,

²⁸ aŋ ɦalla, asi yo wa, aŋ mal koŋ kiyo, asi hoɓa.

²⁹ Aŋ ŋgay taŋ ki wa ni, asi halaŋ mbuɗ ndaana, aŋ tlasi musuk masina, asi miɗa, hoŋ ga duk ndaŋgara.

³⁰ Aŋ lasi ni u musuk maŋga, aŋ hoŋ mbuɗ ndaŋgara ki wiliya.

³¹ Ko bibiŋilla vi Yawera li ha na gak gak, ko Yawe furi kay sunda nam laɗta.

³² Nam gol ndaŋgara na ni ndaɗ dlaka, nam ŋgen ɦinira wa ni ndaɗ ŋgal kiyo.

³³ Hu iiri manda halaŋ an geleɗ Yawe, buu man ma hin kay ndaŋgarana halaŋ an luu ni maŋ Lo manna.

³⁴ Ko sool manda li irim jiviya, ko Yawe van furi manda.

³⁵ Ko suu li dla cora viɗ ki kay ndaŋgara, ko suu ka ɗegeeɗina li hu duliyara oloɗi. An gi deɓ maŋ Yawe cocoo. Halleluya.