SOOLLA 103 - Boy Lonana

Ŋga Lona kay min mamba

¹ Soolla vi David. An gi deɓ maŋ Yawe, an ŋgaam sem ma teteɗna coco u hurun halaŋ.

² An gi deɓ maŋ Yawe, humun ka maa kay jivira nam landaraɗi.

³ Nam bulumuŋ cooŋga ki halaŋ, nam garaɗaŋ tuguɗiira laŋga ki lay.

⁴ Nam suɗuŋ musuk maŋga ay ki hu li ma ba kina, nam baaraŋ u min mamba u ɗegeera.

⁵ Nam mbuɗuŋ saɓak hu maa maŋga, nam hoŋoŋ ki gooro, saɓak ko ndal bakŋa na.

⁶ Yawe li dlaamba ni u ɗegeera Nam ka kaɓak ma jivina kay suu ka lasna.

⁷ Nam tak voɗ mamba ka maŋ Moiz, tak sunda ŋgolora duk suu Israelna.

⁸ Yawe ni sa ma wi hahaw suuna u minda, nam ka mbuɗ ya na zakgi, nammi sa ma ɗegeena.

⁹ Nam ka tuɗ fok u gaɗta gaɗ sana na ta taɗi, ka vi ya hurumbi lay.

¹⁰ Nam ka lay kay cooyra gasiɗi, nam ka hoŋ cora u coraɗi lay.

¹¹ Ko huulona ka kolo day kay ndaŋgara, ɗegee mamba su ki kay suu lam ndaaramma ni na may.

¹² Ko u maɗiina ha ki day eg u fiɗigina, nam cukuygi cooygira ha ki egeygi day ni na may.

¹³ Ko buna min goryomba na, Yawe min suu lam ndaaramma ni na may.

¹⁴ Kay nam wi va ma nam laygi u namma, nam wi ana aygi ni gugum ndaŋgara ɦawaa.

¹⁵ Sana, buu mamma ni ko ndal usuna na, nam ɓo ni ko tlena ɓo hu senenara na,

¹⁶ hu li ma semeɗna siirimma ni nam yak ki gaw. Li ma nam li day huna, sa ka wam oloɗi.

¹⁷ Na may ɗegeera vi Yawera ka ni tew tew a fafaɗta, ndaɗ ka kay suu lam ndaaramma, ɗegee mamba ka ni kay njaf suuna u goryosiya,

¹⁸ kay suu may suu li u galam mambana, suu saa a li u gaɗ mambana.

¹⁹ Yawe tin dlam mamba mulla ka kolo huulona, mul mamba ti kay suuna halaŋ.

²⁰ Gagi deɓpa maŋ Yawe, agi suu sunda huulona, agi gorzoŋi mamsina, lagi u min mamba. juɓugi ni boy ma nam damma.

²¹ Gagi deɓpa maŋ Yawe, agi suu duu mamsina, agi suu sunum suu ka li u min mambana.

²² Gagi deɓpa Yawe agi tlesuu nam lagina halaŋ, hu li ma nam ka ti mulla kamma halaŋ an gi deɓ maŋ Yawe.