SOOLLA 102 - Boy Lonana

Cenda vi sa ma ka lasna

¹ Cenda vi sa ma ka lasna tii tam fok Yawe.

² Yawe, humun cen manda, ko wal manda tew ay ta ta egeŋu.

³ Ŋgay taŋ ki irinɗi, hu li ma an ka lasna, tin humuŋ ay humunu. Buu ma an ka yaŋŋa aŋ humun ay zak.

⁴ Kay buu manna jak ki ni ko ndoosna na, sokon ŋgalan ha ki ko kura na.

⁵ Ko usu ma ki kaayna na, mukulun ki sooya, humun maa ki kay fu ma an tamma lay.

⁶ An ka oy cocoo, bakan hin cuki kay sokŋa ni ndaɗ ɦawaa.

⁷ An mbuɗ ni ko laygi suu bagina na, ni ko hik ma ŋgoo bagina na.

⁸ An buu ni ka buu senɗi, ni ko lay ma kaki kolo kay yam zira vay damma na.

⁹ Hu buuna halaŋ suu babali mansina ka ŋgulunu, hurusi co egen halaŋ. Asi yan dlaanda kay suuna ko fulna na.

¹⁰ An ti a fuuna ni buɗna, mbo ma an camma tlumi u simina.

¹¹ U huruŋ ma ɓeŋ kina, aŋ tlan kolo van kaŋga wa.

¹² Buu manna tuɗ ko ndal ŋgusna na, an so ki ko ndal usuna na.

¹³ Na may aŋ, Yawe, ka tew tew, basara basara halaŋ ka tak ki kaŋu.

¹⁴ U min maŋga aŋ col kolo kay Siyon, kay buuna ndak wa a aŋ waɗ hahawaɗta, na daŋ may lina ndak wa.

¹⁵ Ami suu sun maŋsina minni ɦini ndaɗta, gugum ma ay kaɗna cuk kami wami hahawamiya.

¹⁶ Njaf suuna halaŋ hin li ndaa Yawe, muli suu kay ndaŋgarana halaŋ waŋ bibiŋil maŋga.

¹⁷ Hu li ma Yawe hoŋ min Siyon kolo wa, asi hin wam ki hu bibiŋil mamba.

¹⁸ Nam mbuɗ irim hum cenda vi suu hahawra, nam ka hinisi cen masira kiɗi.

¹⁹ Ko boy namma li ka ɓiiri maŋ njafagi ma ka daganna, a suu hin ka daganna hin ŋga Yawe may.

²⁰ Ay kolo hu Ziim ma Teteɗna Yawe gi yam ay ga gol suu ka kay ndaŋgarana,

²¹ nam ka hum zamba vi suu daŋgayna, cuk suu ɓakŋa kaay kasi a casi kina kiyo.

²² Asi hin di sem Yawe ki hu Siyon, suuna hin ŋgaam hu zi ma Yerusalemma,

²³ hu li ma suuna u mulla tok ki u tasi a sun Yawena.

²⁴ Nam hoŋon saɓak manna ki dagani, nam dagaran buu man ma kay ndaŋgarana ki lay.

²⁵ An di ana, «Loonna, tlan iiri manda duk bay buu manna ndaki.» Kay aŋŋi sa ma ka din dinna.

²⁶ Ay fok jew dayra aŋ min ndaŋgara, huulona ni sunda aŋ laɗta.

²⁷ Asi hin ɓeŋ kiyo, aŋ taŋga ka ni na gak gak. Asi ɓeŋ ki ko ndal barawna na, aŋ mbuɗusi ko ndal barawna na, asi hin hiniŋ lina maŋ halaŋ.

²⁸ Gola aŋŋi na, basa maŋga ka daɓbi.

²⁹ Goryoŋ suu sun maŋsinana hin yow kolo balamasiya, njafasi hin hin ka fokoŋ na gak gak.