SOOLLA 10 - Boy Lonana

Cenda kay njunda

¹ Ҥi, Yawe, aŋ col ha ki na day ni kay mege? Aŋ ŋgay taŋ ki irin hu li ma an ka lasna ni kay mege?

² Suu li dla cora ŋga tasiya ka las suu hahawra, mbeleŋ masina hin vasi u dlara ni nam tok.

³ Sa ma cona ka ŋga tam kay godlom mamba, sa ma yow tlena vi suuna hin Yawe kiyo, ŋgulum lay.

⁴ Hu ŋga taamba nam di ana, Lona ka a kaam ɓak kambi, kay «Lona kaɗi». Nam ɓii tam na.

⁵ Dlara nam laɗta halaŋ ka fi huwa, nam ka wi ana ɓak ma vi Lonna kaaraɗi, nam ka pan suu duu u namma halaŋ.

⁶ Nam saa hurum ana, «Va ma ŋgenen kaɗi, dlara co ka mba kanɗi.»

⁷ Vunum hoɓi u givunna u mbaɗta, u dlara kulna may, dla jivi ka kal ay ki funumbi.

⁸ Nam ŋgay tam hu zina, ci suu dla ka kasiɗina kiyo, cuk irim kay suu wihawra.

⁹ Nam ŋgay tamma en ko dlona na, las suuna, nam buuri ni a cekeɗ suu wihawra, nam yowosi hu bay mamma.

¹⁰ Nam goɓ tam kaŋgaa, weɗ kel suu hawra, asi halaŋ cuk fokom kaŋgaa.

¹¹ Sa ma cona di tam hurum ana, «Lona maa ki wa, nam ha ki day, ka wam ayɗi.»

¹² Col koloo, Yawe, Lona, tli koŋ koloo. Maa ki kay suu hoŋ yasi ganaɗi.

¹³ Suu cona ŋgul Lona na ni kay mege? Hinim nam di tam ana, «Aŋ ka kaam ɓak kambi, ni kay mege?»

¹⁴ Halaŋ ca ni aŋ ka wiya, aŋ ka wi lassa vi suunara, aŋ min taŋ a njun usira. Sa ma hahawra hin tammi hu duk koŋu, kay aŋŋi sa ma njun u suu kuyuna.

¹⁵ Kus ko sa ma li dla cora kiyo, kaam ɓakŋa kay dla coomba, ta ta a nam laɗ oloɗi.

¹⁶ Yawe ni mulna a fafaɗta, suu bay vina sa ha ka egem oloɗi.

¹⁷ Yawe, suu hoŋ yasi gana, aŋ ka humusi cen masira, aŋ ka soosi usi lay.

¹⁸ Aŋ hum tiina vi suu kuyuna, u suu wihawra. Kay ana sa ma kay ndaŋgara tanina, mba mbuɗ suuna ndaana oloɗi.