SOFONI 3 - Boy Lonana

Yerusalem hum yira Lona yaɗta kaɗi

¹ Cora ka kaku, Yerusalem, ɦoŋzi ma cona, ɦoŋzi ma las suuna ɦayna.

² Ndaɗ hum yira kaɗi, ndaɗ vi haɗta ka kaɗɗi, ndaɗ hum vun Yawe kaɗi, ndaɗ ɦuɗ taɗ ay ka eg Looɗnaɗi.

³ Muli maɗsina huruɗ ni ko dlona gi ŋgoɓpara na, suu maɗ suu kaɓakŋa ko ndal bosogori suu mayra casina a dik mbuurina del fiɗigira na, ko suu ka hin va kolo a ti vin maɗiiɗi layna na.

⁴ Suu maɗ suu jok vun Lona ni suu ŋga tasina, suu kulla lay. Muli maɗ suu li ɓivunna mbuɗ tlesuu li ɓivunna ki njenje lay.

⁵ Yawe ka hu ɦoŋzina, nam li ɗegeera, ka li coɗi. Maɗii tew tew nam ka kaɓakŋa, hu buuna tew tew nam ka li va ma coɗi. May sa ma cona ka wi zolonaɗi.

⁶ Lona di ana «An bulum suuna kiyo, zigini suu fiyek mini kolo keŋ gulumunnana an toosi ki lay. An bulumusi voɗ masira ki lay, sa ka jak voɗ oloɗi, ɦoŋzi masina ki hawaɗiya, sa ka oloɗi, sa kak hu zi ka oloɗi.

⁷ An ɓak tan ana, Jivira ni ndak humun gin vununu, van gin haɗ manda kaku, ni ziik hin ka bulum kiɗi. Hu li ma an kal duk wa ni, suu maɗsina ɦal ni yal ma viɗ yam suuna ki viɗina na ɗow ɗow.

⁸ Yawe di ana jiviya, juɓungi haa, juɓungi ha hu buu ma an hin col ay kolo a kaɓakŋana. Saa manda ana an bulum suuna kiyo, tok mulina kay tasiya, cukusi yaanda kasiya, cuk tiitara vi yaandara kasi halaŋ kay ana yam ndaŋgara halaŋ an hin ŋgalaɗ ki u kura.

Lona hin mbuɗ suuna ki teteɗ

⁹ «Na ɗaŋŋi an hin mbuɗ vun suuna ki teteɗ a asi halaŋ yi sem Yawe, a asi sunum u saɓakasi ma dewna.

¹⁰ Ha ki ŋgoo lumma Kusna ii hiŋŋa lay suu ŋgaanna, suu an njayasi kina, hin mbaaran tlegeyesi ay man halaŋ.

Suu hin hu Israelna

¹¹ «Hu buu namma ni ndak hin ka haɗ huruk kay dlaaka cora oloɗi, kay yara ndak landa egendaɗi lay, kay hu li namma an yow suu ŋga tasi cocona ki varak da, ndak hin seŋ li mayra li dla cora kay ɦini manda teteɗta kiyo.

¹² Suu an hin hinisi varakŋa ni suu hoŋ yasi kaŋgana u suu hawra, asi hin hal li ma ŋgayra ni u sem Yawe.

¹³ Suu Israel suu hinna hin ka li cora oloɗi, asi hin ka kaboyna oloɗi, sa hin ka humusi boy ma ganyam funusi oloɗi. Asi hin taa yoorina hin koɗ tasi lay, sa hin ka mbuɗusi ndaana oloɗi.»

Min Yerusalem ki kolo balamaɗ wa

¹⁴ Furiya goŋ Siyonda, li furi makka Israel, li furi makka, ko huruk mbuɗ san lay, goŋ Yerusalemba.

¹⁵ Yawe yowok ɓak ma gin kak nekŋa ki wa, nam tin ii babali makŋa ha ki hu li ma daŋŋa wa. Mul ma Israelna, Yawe, u tamba ka varaku. Ndak ka li ndaa ko dla coraɗi.

¹⁶ Hu buu namma hin di Yerusalem ana, «Li ndaaɗi, Siyon, ko kok mbuɗ maŋiiɗi.

¹⁷ Yawe, Lookŋa, ka vo varaku, u saɓak mamma, a su kay suunara. Nam furi cocora ni kaku, u min mamba nam holoŋok kolo ki wiliya. Nam luu njoŋŋa furi coco ni kaku.»

¹⁸ An tok suu li ay ka li luunaɗina eg tasiya, asi li ay ki ni egen day, Yerusalem zolona li caɗ nekka cocoo.

¹⁹ An hin kaɓakŋa kay suu lasakŋa halaŋ, hu buu namma wanni an hin suɗ timigii suu dalira kiyo, an hin tok timigii suu viɗ kina kay tasiya. An hin mbuɗugi suu ŋgolona, segi hin fi ŋgara hu mbassa agi fi dlara zolona huruɗta halaŋ.

²⁰ Hu buu namma an hin hoŋogi ay voo, hin li ni hu buu ma an hin tokogi kay tagina. Segi hin tii ki kay yam mbassa, an hin mbuɗugi suu ŋgolona duk suu kay ndaŋgarana, Yawe di ana an hin mbuɗugi dlaagira jewra ki jivira ni irigi gaw.