SOFONI 2 - Boy Lonana

Lona yi suu hoŋ yasi kaŋga umma

¹ Mologi kay tagiya, mologi kay tagiya, agi suu zolo ka cagiɗina.

² Jew buu ma Lona ŋgaam a mbarana, buuna hin jakŋi ko ndal bara wana dol u semeɗnara na, jew mbara yara vi Yawera mba kagira, jew mbara buu ma yara vi Yawena mba kagira.

³ Hoŋogi halagi Yawe agi suu hoŋ yagi kaŋga umma, kay ndaŋgara halaŋ agi suu hoŋ yagi kaŋga u gaɗ mamba, halagi ɗegeera, halagi hoŋ yamba kaŋgara, kala agi hin kak u ŋgusuna hu buu ma yara vi Yawena.

Yara laɗ eg suu ii fiɗiginana

⁴ Gaza hin ki ɦawaa, sa ka hu ɗi, hin bulum Askalon kiyo, suu hu mbassa Asdodta hin dikisi ki faali ŋgolla, suu hu mbassa Ekronda hin dikisi ki hu mbas masira lay.

⁵ Cora ka kagiya agi suu hu mbassa Filistinda, suu hu mbassa Kretana, boyna vi Yawe ɓakŋi kagiya. Kanaan, mbassa vi suu Filistinnara, an hin baak suu maksina ki halaŋ.

⁶ Mbassa Filistinda hin mbuɗ ki ni li ma taa yoona, li ma suu taa yoorina poy ay huna, li ma katlaŋ yoorina huna.

⁷ Mbas ndaɗta hin hin ki ni maŋ suu usi hin hu Yuda ndena, asi hin taa yoori masisina hu li namma, asi hin koɗ tasi fiɗigi hu ɦoŋzi ma Askalonna. Kay Yawe, Loosina, hin njunusi hu kaɓakŋa hin mbuɗusi dlaasira ki jiviya.

Yara laɗ eg suu u maɗiinana

⁸ An hum ŋgulla vi suu Moabma, panda goryoŋ Amonna panan suu mansinara, suu ŋgulun suu mansina wul tasi u mbas mandana.

⁹ Ni kay ndaɗta Yawe, ma Saɓakŋa Kom Belna, Lona vi Israel suu tam u iiri mamba ana, Moab hin mbuɗ ki ko Sodom na, goryoŋ Amonna ko Gomor na. Asi hin mbuɗ ki ni sene ma wayra, mbuɗ ki ni li ma vuvuna, ndaŋgara bulumuɗ ki a fafaɗtara. Suu mansina usira hinda hin ɦurumusi tlegeyesiya, suu man suu hinna hin kak hu mbas ndaɗta.

¹⁰ Va ma asi hin fam kay ŋga ta masira na wan ɗaŋŋa, kay ana asi ŋgul suu vi Yawe, ma Saɓakŋa Kom Belna, wul tasi ni um lay.

¹¹ Yawe hin tak yaamba ki egesiya, nam hin hoŋ yam loogi suu ɦawa suu kay ndaŋgarana kaŋgaa. Suu wara suu ha ki hu mbassa day dayra hin goɓ kaŋga fok Yawe, gegelay kay ndaŋga mamba.

Yara laɗ eg suu mbayawna u suu dalina

¹² Agi suu Kusna lay, yara hin cagi lay.

¹³ Nam hin maɗ kom ha kay suu ii dalina hin ci suu Asirina kiyo. Nam hin bulum ɦoŋzi ma Ninivena kiyo, mbuɗum ki sooyra ko fulla na.

¹⁴ Tlege suu basgina hin koɗ tasi ni hu mbas ndaɗta duguɗta gagayra, njaf mbuurina halaŋ lay. Hikŋa u cemcemma hin buu ni hu jo goŋ maɗta, delesira tiina hin kal ay ki ii zira. Tlegena gijaŋ ɓeŋga ha ni hu vun grek ma kalla gaw. Gu Sedrena asi paɗam ki kaŋgaa.

¹⁵ Ҥoŋzi mayma kak gin u furira ana nam dla ka kambina hin li ni ko wanda na, nam mayma ɓak hurum kurufu ana, «Sa daŋ kaɗi ni an doy holona.» Ndaɗ hin mbuɗ ki mbas mayra hahawra ni nanage, li ma mbuurina buu huna ni nanage. Gegelay tli egeɗ wa toko ni feɗ vunum lay, yorok kom lay.