SOFONI 1 - Boy Lonana

¹ Boy ma Yawe dam maŋ Sofoni goŋ Kusina, goŋ Gedaliyana, goŋ Amariyanna, goŋ Ezekiyasna, hu cokira Josiyas goŋ Amonna a mul ma Yudana.

Lona hin kaɓakŋa kay ndaŋgara halaŋ

² An hin bulum tlesuu kay ndaŋgarana ki halaŋ halaŋ, Yawe di na.

³ Yawe di ana, An hin bulum suu warna u mbuurina kiyo, laygina u kuluf ma duk mbo lum ma ŋgolona kiyo, tlege suu daɓ semma u suu cona lay, an hin bulum suu warna ki kay ndaŋgara.

Lona hin kaɓakŋa kay Yuda u Yerusalem

⁴ An hin maɗ kon ha kay Yuda, kay suu hu mbassa Yerusalemba lay, an hin bulum tlesuu vi Baal suu usi hinna kiyo, sem suu mam suu sunda u muli mam suu li ɓivunna lay.

⁵ An hin bulum suu goɓ kaŋga kay mbura kolora fok ciciwra, faɗta, u tilna kiyo, u suu goɓ kaŋga fok Yawena lay, suu hin suu tasi u sem loosina, Melekŋa, lay.

⁶ An hin bulum suu ɦal ŋgorosi maŋ Yawe ka pereɗ irisi ay egembi layna kiyo, ka halambina, ka joɓom va kombi layna.

⁷ Seŋegi vunugi fok Bu Suuna Yawe, kay Buu ma vi Yawena mba wa tok. Yawe ka li ɓivunna, nam hin paɗ vunum ki kay suu mamsina.

⁸ Hu buu ma ɓivunna vi Yawena wan ɗaŋŋi an hin kaɓakŋa kay mulina, kay goryoŋ mulinana, kay suu cuk barawna egesi ko suu hu mbassa daŋga kay goɓ lo masina nana halaŋ.

⁹ Hu buu namma wanni an hin kaɓakŋa kay suu hin weɗ ki kolo kay vun goŋgana, oy zira vi sa ŋgol masinara ki u tlesuu yowosi ay u saɓakŋa, u li iira lay na.

¹⁰ Yawe di ana, Hu buu namma wanni suuna hin hum tii ma ŋgolna Vun Grek ma Kulufna, suuna hin gurni hu Ҥoŋzi ma Wilina, vun ma ŋgolna hin li ay kolo kay ɦinira.

¹¹ Gurniyigiya suu hu Mortiyerna kay ana suu li paara bulum ki wa, suu wi yal pereɗ gursura bulumusi ki wa.

¹² Hu buu namma wanni an hin hal huu zi ma Yerusalemma ki u kura konu, an hin kaɓakŋa kay suu kak hu li ma didiŋga ɓak tasi hurusi kurufu ana Yawe hin ka a li va ma jiviɗi lay, ka a li va ma coɗi lay.

¹³ Na ɗaŋŋi bege masira suuna hin ɦurumuɗ kiyo, suuna hin toosi ziisi kiyo, asi min ziginina coco may hin ka kak hurusiɗi, asi vi sene gugutlura coco may hin ka caɗ sumuɗɗi.

Buu ma vi Yawena

¹⁴ Buu ma vi Yawe ma ŋgolna hin tok a mbaa, nam li na zak zak a mbayra. Suuna hin tii tii ma hahawra, hu Buu ma vi Yawena sa ɦiŋga lay hin yi kolo ana mbay njunumu.

¹⁵ Buu namma ni buu ma yara, ni buu ma hahawra u yoo tara, ni buu ma ɓeŋga u zolona, ni buu ma ndufunda, ni buu ma ɗugulla hin tli ay kolo kay suuna warra na ilik ilikŋa.

¹⁶ Ni buu ma tokolomma hin buna, suuna hin yi kolo a duu u ɦoŋzi ma saɓakŋa, u zigini suu fiyek mini kolo keŋ gulumunnana.

¹⁷ An hin cuk suuna hu wihawra, asi hin tuɗ ni ko suu dugina na, kay ana asi li sulukŋa eg Yawe. Busuɗusi hin nja kom ki kaŋga ko mbona na, maɗasi hin li molira ko ndal didiŋga na.

¹⁸ Gursu masira ɗowba bege masira ka ndak a buɗusi ki hu buu ma yara vi Yawenaɗi, ko yomus ma nam lam u kuranaɗi, yam ndaŋgara hin ŋgal kiyo, kay nam hin a bulum lina kiyo, dla ndaɗta hin ti tara cocoo, eg suu kay ndaŋgarana halaŋ halaŋ.