RUT Magaara Njaɗ Dlara vi Rut 4 - Boy Lonana

Booz ɗum Rut

¹ Booz tuɗ kak vun grekŋa hu li ma asi kaɓakŋa huna, nam gola ni wi sa ma a yow jona ko tam ugi Noomi dewna jak tuɗta. Booz dam ana nam cola, mbay kak ga tani, nam mba kak kaŋga may.

² Booz yow suu ŋgolona ay na doogo duk suu ŋgolo suu hu ɦoŋzi nammana. Dasi ana, «Mbay lakagi ga tani.» Asi lak ga may.

³ Nam hin di sa ma ti jona ko tasi dew u Noomina ana, «Noomi hoŋ ay vo mba gus sene ma vi wayayna Elimelekŋa kiyo.

⁴ An may ni di ana an min daŋ boy namma ki tuwa. Aŋ hoŋ gus li namma di ki fok suu molina u suu ŋgolo suu hu ɦoŋzina tanina gaw. Lini aŋ min a gusumu ni gusum gaw may, li ka minɗi ni, di ki fok suuna tani gaw may. Kay sa ma daŋ ma kal ki fokoŋ kaɗi, an lay ni ŋgoroŋ dagani.» Nam hin di ana, «An min gusumu.»

⁵ Booz hin dam ana, «Hu li ma aŋ min a gus senena ko Noomira ni aŋ hin vi Rut, goora Moabba, gaw may. Caŋ goo ma miɗ kina a ɗogom njafamba, ka a sem bulum ki hu dee mambaɗi.»

⁶ Nam sa ma gus senena hin di ana, «An ka ndak a gusum man anɗi, li ka ɗi ni an ɓalak ki ni dee ndaɗta ɦawaa. Aŋ ndak gus li namma kay balam senu an ka ndakgi.»

⁷ Dlara ay vi suu Israelna jew ni li ni na. Lini sana a gus sene ɗowba a mbuɗ vaa, njaɗ dla ndaɗta ki halaŋ sa hiŋŋa fok tuɓuru mamma ɦam maŋ sa ma hiŋŋa. Ni dla mayra tak ki hu Israel ana dla ndaɗta li gasi na daŋ mayra.

⁸ Sa ma yow jona hin di Booz ana, «Aŋ gus li namma.» Nam fok tuɓuru mamma kiyo.

⁹ Booz hin di suu ŋgolona u suu molina ana, «Agi ni suu a dikina, cemi an gus tlesuu vi Elimelekŋa halaŋ ki ko Noomi wa, u tlesuu vi Kiliyon u Malonna halaŋ.

¹⁰ An vi Rut, ta goora Moabba, a caanda lay, ndaɗ ni caŋ Malonda kay a col sem sa ma miɗ kina ki kolo duk gorsemma may, kay ka a sem bulum ki dukusiɗi, ki duk suu hu li ma kaɓakŋaɗi lay. Agi cemi halaŋŋi a suu diki kanna.»

¹¹ Suu molina halaŋ u suu ŋgolona di ana, «Na daŋ may ami ni suu dikina. Ko Yawe mbuɗ cara kal karam varaŋ ndaɗta ko Rasel na, ko Lea na, asi ni suu gi u zi ma vi suu Israelnana. Aŋ may ni mbuɗ saɓak hu njaf ma vi Efratana. Seŋ tii ki hu mbassa Betlehemba.

¹² Yawe ɦaŋ ca ndaɗta ni kay njaf namma. Ziiŋŋa hin mbuɗ ni ko ziŋ Fares ma Tamar vuɗum maŋ Yudana na.»

Booz vuɗ u Rut

¹³ Ko ndaɗta na Booz ɗum Rut. Ndaɗ mbuɗ ni caamba. Nam taɓ u ndaɗu. Yawe njun uɗu, ndaɗ vi wiina, ndaɗ vuɗ go njufna.

¹⁴ Boyogina tuɗ di Noomi ana, «Gi deɓ maŋ Yawe nam hinik ka ki cemi hawa bay goo oloɗi. Sem hin yi ki duk suu Israelna.

¹⁵ Nam hin ɗilik iriku, nam hin golok hu maa makka lay. Kay ana caakka minik ɦayra vuɗummi ndaɗu. Ndaɗ dew ni irik ni su gor suu kiɗisiyana.»

¹⁶ Noomi tli goona ɓalaɗu, vam ki koɗu, mbuɗ a cara wulumba ni ndaɗu.

¹⁷ Suu vok ziiɗna ɓak ha ki kam ana, «Noomi vuɗ go njufna wa, sem ana Obed.» Nammi bu Jese ma bu Davidna.

¹⁸ Gola ni sem somoyoŋ Peresna. Peres vuɗ Hesrom,

¹⁹ Hesrom vuɗ Ram, Ram vuɗ Aminadab.

²⁰ Aminadab vuɗ Naason, Naason vuɗ Salma,

²¹ Salma vuɗ Booz, Booz vuɗ Obed,

²² Obed vuɗ Jese, Jese vuɗ David.