RUT Magaara Njaɗ Dlara vi Rut 3 - Boy Lonana

Rut buu ga u sem Booz

¹ Hu buu maa dew ni Noomi di caaɗta ana, «A jivira ni an halak njuf ma jivina ma ndak hin a kak hu zina jivina may.

² Booz ma ha hu senena u suu mam suu li sunda wanna ni sa ma hu njafami ma tami jona dewna. Nam buu ha ni ŋgoo bagi hu li ma to wana.

³ Col kolo, li mbul ma hisna taku, cuk baraw mak ma ŋgolna tuɗ ŋgoo hu maɗakŋa. Na may ndak tuɗ ŋgay tak kiyo, tak tak ki irimbi, juɓ ta ta nam ti funa ki tu may, ci ki tu may.

⁴ Hu li ma nam tuɗ buu gana, ndak hin wi li ma nam mba buu huna. Ndak tuɗ ha tuɗ buu ga u kewet semu. Nam hin takak dla mayra ndak hin a laɗta.»

⁵ Rut hoŋoɗ dira ana, «An hin li dla mayra ndak danda wanda halaŋ.»

⁶ Ndaɗ hin tuɗ ga hu maɗakŋa, li ni ko ndal kunuɗta daɗ hara na may.

⁷ Booz tiya, ci lay, hurum mbuɗ furiya, nam mba buu eg li ma wana moli huna na tok, ndaɗ kuɗuk ay mba buu ga u kewet semu.

⁸ Ca duk ŋgikka ɗaŋŋi, Booz mbuɗ ndaana mbusuk tamu, gola ni cara buuri ga u gayamu.

⁹ Booz joɓoɗ ana, «Ca ndaɗta ni gege?» Ndaɗ hoŋom dira ana, «Ni an caaŋga sunuŋga, Rut. Ɗum caaŋga sunda, kay aŋŋi sa ma a yow jo njufunna daŋ may.»

¹⁰ Booz hoŋoɗ dira ana, «Yawe paɗ vunum ki kaku, goonda, cemi olo ndak tak ɗegee makka ki wa, ni u furira coco sura jewra olo. Ndak tuɗ ka hu li ma hal njufii suu dadambi, tuɗ ka a hal sa ma hawɗi lay ma ɦiziɗi lay.

¹¹ Cemi ni an daku, goonda, li ndaa oloɗi. Dlara ndak dandara an hin laɗu. Kay suuna tani halaŋ wi ki ana ndakŋi cara ɗilira dlaakka jivi cocoo.

¹² Gasi daŋ may anni sa ma ti jona u njufuk dewna, may ni sa ma egem peɗet suunna kaa.

¹³ Ndak buu gaa fo maɗiira ki tuwa, lini nam ɗumuk wa ni jivi may, lini nam ka minɗi ni an hin vak may. Yawe ka dukuya ndak buura fo maɗiira ki tuwa.»

¹⁴ Ndaɗ buu ga u sem juɓ ta ta maɗiiya. Ndaɗ col ki kolo ni ŋgarapiira sa ka wi tam tuɗi «Kay ka sa wi ana ca ndaɗta buu hani eg maɗakŋaraɗi.»

¹⁵ Nam daɗ ana, «Ҥal vaak ma ay kakŋa aya,» Ndaɗ ɦamma, nam yowoɗ wana kaɗ huwa, nam tamba hin tuɗ ki vo hu zina may.

¹⁶ Rut hoŋ ay vo eg kunuɗta, ndaɗ joɓoɗ ana, «Dlaakka li ay ni ana mege?» Rut cuɗuɗ dlara li ayra u jivira sa namma laɗta ay egeɗta halaŋ.

¹⁷ Ndaɗ di ana, «Nam ɦan wana ay kan wanni di ana ka ndak hoŋ vi kunukka u kok ma vadlnaɗi.»

¹⁸ Noomi di ana, «Goonda kak na en juɓ dlara hin lira, wi u boy namma ki u takka tuwa, an wi ana, Booz ka hin a juɓbi, nam hin daɓ dla ndaɗta ki ni ii faɗta karamba gaw.»