RUT Magaara Njaɗ Dlara vi Rut 1 - Boy Lonana

Elimelek u suu mamsina tuɗ ki hu mbassa Moabba

¹ Hu cokira vi muli suu kaɓakŋa vi suu Israelna, mayra ŋgolla ndi hu coki ndaɗta. Sa maa dew hu ɦoŋzi ma Betlehemma ni hu mbassa Yudara, mbee ki hu mbassa Moabba. Nam may, caamba may, goryom gor njufiina mba' may.

² Sa namma yam ana Elimelek. Caamba seɗ ana Noomi. Goryom suu mbana ma hiŋŋa yam ana Malon, ma mbana yam ana Kiliyon. Asi ni hu njaf ma Efratana hu Betlehem hu mbassa Yudara. Asi mba cuk ki hu mbassa Moabba.

³ Kak njokŋi Elimelek, njuf Noomi, miɗ kiyo. Ndaɗ hin kakira ni u goryoɗ suu mbana.

⁴ Asi ɗum boyogina usi ni gorɓii suu Moabma. Ta hiŋga yaɗ ana Orpa, ta mbara yaɗ ana Rut. Asi kak u asi va ma basa doogo.

⁵ Ŋgoo dagan Malon u Kiliyon jak miɗ kiyo. Ca ndaɗta hin ki ni goryoɗ suu mbana kaɗi lay, njufuɗ kaɗi lay.

Rut min kak eg Noomi

⁶ Ndaɗ col u boyogi suu vi goryoɗna a hoŋ ay hu mbas maɗta, kay ndaɗ hum ana tina ka huwa. Yawe ka njun suu mamsina.

⁷ Ndaɗ col ay hu li ma ndaɗ ay kaki huna hu mbassa Moabba u gor boyogoɗ suu mbana a tuɗ hu mbassa Yudara.

⁸ Na may ni Noomi di boyogi suu vi goryoɗna ana, «Tuɗugiya gegelay ni hoŋ vo vi somoyomu. Ko Yawe gologi jivi u ɗegee mamba, ko agi li jivira u goryon lay u tanda layra na may.

⁹ Ko Yawe ɦagi njufii suu jivina a agi kak jivi hu ziigina may.» Ndaɗ mboɗosi huruɗu. Asi halaŋ tum tiina.

¹⁰ Asi hin daɗ ana, «Ҥawaa, ami tuɗ ni u ndak vi suu maksina.»

¹¹ Noomi dasi ana, «Hoŋogiya goryonu, agi min tuɗ u anni kay mege? An goo ka hurun olo a vuɗ ki vuɗni hin mbuɗ a njufugi su?

¹² Hoŋogiya goryonu. Tuɗugiya, kay an mbuɗ ki maa cocoo, ka kak njuf oloɗi. Lini an di ana an a kak njufu lay ni, an tuɗ ki u sana ni njeŋgera karamba lay ni, an hin vuɗ goo lay.

¹³ Agi ndak juɓ na gak gak a gor asina wulla su? Agi hin ndak a doo tagi gak gak juɓ sa namma su? Ҥawaa, gor manna, an dlaanda kal ki hahaw saɓakiya. Hahaw manda su ki kay magira. Kay Yawe kaan ɓak ma eŋŋa kan wa.»

¹⁴ Asi tum tiina balamasi olo. Ŋgoo dagani, Orpa mboɗ kunuɗta kolo huruɗu, hoŋ dagani. Na may Rut hin ka eg kunuɗta gak gak.

¹⁵ Noomi daɗ ana, «Gola, henekka hoŋ wa eg suu maɗsina eg looɗna lay, hoŋ uɗ na mayɗi su?»

¹⁶ Rut hoŋoɗ dira ana, «Ҥeɓen ɦeɓi kay a hinik kiraɗi, ka an tuɗ ha ki egek dayraɗi lay. Kay li ma ndak tuɗ huna an tuɗ ni hu may. Li ma ndak buu huna an buu ni hu may. Suu maksina mbuɗ ni suu mansina may. Lookŋa mbuɗ ni Loonna may.

¹⁷ Li ma ndak miɗ huna an miɗ ni hu may. Asi hin panni hu li namma may. Ko Yawe lanni na ha fok hu na olo, va ma hin ɓorowoy dukuyna ni miɗna.»

¹⁸ Ndaɗ wi ana Rut vi taɗ a tuɗ u ndaɗu ni ndaɗ hin ɓak ma ɓakaɗna.

¹⁹ Asi tuɗ u tasi jak ta ta tuɗ tew hu zi ma Betlehemma. Hu li ma asi tew hu Betlehem may ni, suu hu ɦoŋzinana tum ay kolo na halaŋ kay boy dla Noomi. Boyogina di ana, «Ni ka Noomiɗi su?»

²⁰ Noomi dasi ana, «Yan ki ana Noomi oloɗi, sen mbuɗ ki ni ana Maara kay Lo ma Saɓakŋa lan dlara tan hurunda cocoo.

²¹ An kal ha ki u tlena kon cocoo, Yawe hoŋon ay vo u kon ma vadlna. Agi hin yan ana Noomi ni kay me ologe? Kay Bu Suuna hurum ɓeŋ egenu. Nam lan dla cora egenu.»

²² Noomi hoŋ ay ni ko ndaɗta na ko taɗ u Rut ta goora Moabba, ni caŋ goroɗnara, ndaɗ faɗ ay ni hu Moab. Asi tew Betlehemmi hu til ma asi feɗ wa ma tlawna.