ROMMA 9 - Boy Lonana

Lona u suu mam suu nam manasina

¹ An dini gasira an kaboyɗi, an ni maŋ Kristu, hu wiinda Musuk Lonara ka takan ana an di ni gasira.

² Hurun tan hurun coco u hahawra gak gak.

³ An min ana lini Lona gan vunna ɓorowon duk ɦoŋon ki u Kristu kay gorsen suu hu njafanna lay ni giya.

⁴ Asi ni njaf suu Israelna Lona hin mbuɗusi ki a goryomu, ɦasi ana nam ka egesi hu ŋgol mamba tew tew, nam vi galamba u asiya, ɦasi gaɗta, li tokka, vi vunna u asiya.

⁵ Asi ni hu dee somora vi suu Israelna, u Sa Lona Fuurumma, ko sa warna na, ka hu dee masira may. Nam su suuna u tlena halaŋ, Lona, ma suuna geleɗem na gak gak hu daɓ kiɗira. Amin.

⁶ An ka min di ana vi vun ma vi Lonna mbuɗ ki ɦawaa naɗi, njafna vi suu Israelna ni ka asi suu Israel suu gasina halaŋgi.

⁷ Njafna vi Abraham ni ka goryom suu nam vuɗusina belɗi, Lona di Abraham ana, «Goryoŋ Isaakŋa hol hin ndummi ko goryoŋ na.»

⁸ Ni di ana gor suu vuɗusi u saara vi sa warna ni ka goryoŋ Lonnaɗi. Gorro suu vuɗ hu vi vunna vi Lonana ni suu hu njaf mammana.

⁹ Lona di ki hu vi vun mamma anaba, «Hu li ma an hin hoŋ ayna Sara hin vuɗ gooro.»

¹⁰ Ni ka kay ndaɗta holɗi, goryoŋ Rebekana mba' jakŋi busi ni dew, buygi ma ŋgolna Isaak.

^11-12 Lona u ŋgaɓ mamba ŋgaɓ suuna, ŋgaɓ mamba ni u yira nam yasira, ni ka kay sun masiraɗi, va ma tak ki ana Lona ka coli kay ŋgaɓ mambana ni, nam di Rebeka ni goryoɗ bay vuɗ tu lay asi bay li jivira u cora tu lay, ana, «Ma ŋgolna hin sun ma goona.»

¹³ Ko ɓiira dira na «An min ni Yakob noy Ezaw kiyo.»

¹⁴ Hin daygi ni ana mege? Lona hin mbuɗ co su? Nam ka mbuɗ coɗi.

¹⁵ Lona di Moiz ana, «An min wi hahaw sa ma an min wam hahawamma, sa ma an min a li oora kamma ni an lamba.»

¹⁶ Dla ndaɗta ni ka minda vi sana u saɓak mammaɗi, ni Lona dew ma wi haw haw suuna.

¹⁷ Lona di maŋ Faraw, mul ma Egiptena, hu Boy ma Ɓiirina ana «An kakaŋ a mulna a takaŋ saɓak manna, a suuna kay ndaŋgara halaŋ mba wan sen kiyo.»

¹⁸ Lona wi hahaw sa ma nam min lam jivira kamma, sa ma nam soom hurum hu coombana zuɗum um ha hu may.

Yaŋ Lonara u oo mamba

¹⁹ Aŋ hin dan ana hurum hin ɓeŋŋi nana daŋ ologe? Sa hin ciwayra u minda vi Lona ni gege.

²⁰ Aŋ sa namma ni gege, ma hin ciwayra u Lona? Doy luɓuna hin joɓ malamma minimma ana, «Aŋ lan na ni kay mege na su?»

²¹ Sa ma min doyna ndak a li va ma nam min lam u luɓuna ni namu. U luɓu namma nam ndak a min doy ma saɓakŋa hin min ma ɦawana lay.

²² Va ma agi min dam kay Lonna ni mege? Nam min a tak yaamba u saɓak mamma kiyo. Kay ndaɗta nam siɓ ŋgolo u ɗigilla kay suu yaamba mba gin kasina hin tok a baasi kina.

²³ Nam a tak ɦizza vi ŋgol mamba ki u oora nam laɗta ni, nam min ki fok jew a ɦay ŋgol mamba.

²⁴ Aygi suu nam yaygina ni ka duk njaf suu Juifna holɗi, ni duk njaf suu daŋŋa lay.

²⁵ Ko ɓii aygi hu magaara vi Ose na, «Njaf ma ka a suu mannaɗina an hin yasi a suu manna, njaf suu an ka minisiɗina an hin yasi a suu mansina.»

²⁶ Hu li ma asi di kasi ana ka suu mannaɗina, hu li namma ni asi hin yasi a, «goryoŋ Lona ma iirina.»

²⁷ Ezayi ɓii boy namma ni kay suu Israelna, «Lini suu Israelna zuli co co ko ŋgetlna del lumma na lay ni, suu hin suɗ ki dukusina ni ew ɦawaa.

²⁸ Bu Suuna hin li u boy mamma nam dam kina kay ndaŋgara na zak.»

²⁹ Ni ko Ezayi di ay ki fok jewra na «Lini Bu Suuna ma Saɓakŋa Kom Belna hin njaf suu taa ka ɦiwɗi ni aygi hin li ki ni ko suu Sodomma u suu Gomorna na.»

Israel u Boy ma Ayra

³⁰ Hin daygi kay boy namma ni ana mege? Suu ana asi ka suu Juifnaɗi lay, ka suu hal a mbuɗ tasi ɗegee fok Lonaɗi layna, asi mbuɗ ki ɗegee u vira.

³¹ Suu Israelna suu hal a mbuɗ tasi ɗegee fok Lona u gaɗtana, tew ka a li va ma gaɗta dammaɗi lay.

³² Kay asi hal ka a mbuɗ tasi ii Lona ɗegee u viraɗi, asi hal a mbuɗ tasi ɗegee ni u sun masira, ni asi daɓ tasi kay ɦinira daɓ semma.

³³ Ɓiira di ana, «Gologi an tin hu Siyon ɦini ma daɓ semma ni ɦini ma ndi sana kaŋgana sa tin hurum kamma ka mbuɗ ki zoloɗi.»