ROMMA 8 - Boy Lonana

Iirira u Musuk Lonara

¹ Cecemi kaɓakŋa ka kay suu tin hurusi kay Yesu Kristuna oloɗi.

² Na may gaɗta vi Musuk Lonara ɦal iirira taɓaygi eg Yesu Kristu buɗun ay ki hu gaɗta vi cora hu miɗna lay.

³ Va ma gaɗta vi Moiz ndak ka a lambina kay sa warna mbuɗuɗ ki maŋiya, Lona lam ki wa. Nam kaɓakŋa ki kay sa warna u sunda nam sun goromma ayra, nam mba u mbalatara egem ko ndal sa ma cona na. Ni kay a yow cora kira.

⁴ Lona li dla ndaɗta na ni kay ɗegeera vi gaɗta mba li egey aygi suu noy dlara vi mbalatara kina, poy u Musuk Lonara.

⁵ Suu poy u saa mbalatara hummi u va ma mbalatara damma, suu poy u Musuk Lonara hummi u va ma Musukka damma may.

⁶ Kay a hum u va ma mbalatara damma ni tuɗuŋŋi hu miɗna, na may hum u va ma Musuk Lonara damma ni tuɗuŋŋi hu iirira u heɓpa.

⁷ Suu hum u mbalatara ni suu gonokka u Lona, asi ka a hoŋ yasi kaŋga u gaɗta vi Lonaraɗi ka ndak kaɗɗi lay.

⁸ Suu li u minda vi mbalatara na ka ndak a li ii Lona jiviɗi.

⁹ Agi lagi u minda vi mbalataraɗi, lagi u minda vi Musuk Lonara kay mege Musuk Lonara ka hurugiya, sa ka u Musukka vi Kristuɗina ni ka mammaɗi.

¹⁰ Lini Kristu ka hurugiya ni, mbalatagi hin miɗ ki ko cora lay ni, Musuk Lonara ka iiri hurugiya mbuɗugi wa ɗegee fok Lona.

¹¹ Lini Musuk Lonara ta col Yesu ay ki kolo hu miɗna iirira ka hurugiya ni, nam sa ma col Kristu ay ki kolo hu miɗna iirina, hin ɦagi iirira maŋ mbalatagira miɗira u Musuk mamba ka hurugi ndaɗta.

¹² Gorsenna balna ka kaygiya, ni ka ana li u minda vi mbalataygiya a poy u min maɗtaɗi.

¹³ Lini agi poy u minda vi mbalatagiya ni agi hin miɗa, lini u saɓakŋa vi Musuk Lonara, agi noy minda vi mbalatara kiyo ni agi hin kak iiriya.

¹⁴ Suu hin tasi Musuk Lonara takasina asi halaŋŋi goryoŋ Lonna.

¹⁵ Musukka agi faɗta ni ka Musukka hin mbuɗugi ki mborɓiina a oyogi u ndaana na ɗowɗi, ni Musuk Lonara a mbuɗugi ki goryoŋ Lonna, u Musuk ndaɗta ay ndak sawalla maŋ Lona ana, «Bunu.»

¹⁶ Musuk Lonara tak maŋ ŋgus maygira ana aygi ni goryoŋ Lonna.

¹⁷ Aygi ni goryomu, aygi hin faygi jona vi Lona ma nam ɦam maŋ suu mamsinana, aygi hin faygi ii ɓorow maygina ko taygi u Kristu, lini aygi taɓ hu wihawra u namu ni aygi hin kak u nam hu ŋgol mamba lay.

Ŋgolla hin a mbara

¹⁸ An saa ana lassa ay ka laɗ koyni wanda ka ndak ŋga u ŋgolla Lona hin takayra fokkaɗi.

¹⁹ Tlesuu Lona lasina halaŋ tasi lasi na jik jik a wi buu ma Lona hin tok goryom ki huna.

²⁰ Tlesuu Lona lasina halaŋ cuk kaŋga hu va ma ka u voɗombina ni ka u min masiraɗi, Lona hinisi ni namu. Na lay ni suuna ka juɓ gak gak.

²¹ Tlesuu Lona lasina halaŋ hin cim kiyo, asi hin buɗ ki ko cim ndaɗta ni hu ŋgolla vi goryoŋ Lonna.

²² Cecemi tlesuu Lona lasina halaŋ las ko cara wiina las a vuɗa na.

²³ Ni ka tlesuu Lona lasina doy holɗi, aygi suu fi Musuk Lonara ko ɦala jewra vi Londa nana lay, aygi u haɗ huna huruygi kay juɓ Lona a nam di ana aygi ni goryomu, hin buɗuygi ki hu mbalatara lay.

²⁴ Aygi ki suɗiya ni aygi ka juɓ tuwa. Lini sana wi va ma nam juɓumma ni ka juɓpa oloɗi. Sa ma juɓ va ma nam wam kina ni gege?

²⁵ Lini aygi ka juɓ va ma aygi bay wam tuna ni, lakaygi u ɗigilla.

²⁶ Aygi suu maŋina Musuk Lonara lay ni mba njun uygiya, aygi ka wi cen Lona u gasiraɗi, na may Musukka kay taɗta ka cen Lona kaygi u zamba sa ndak di u funumbi.

²⁷ Lona ma wi huu suuna wi va ma Musukka joɓomma. Musuk Lonara cen ni kay suu vi Lon suu nam manasina, ko Lona minda na.

²⁸ Aygi wi ana Lona li jivira halaŋŋi maŋ suu minimma, suu nam yasi ki u ŋgaɓ mambana.

²⁹ Suu Lona manasi ki fok jewna nam min a mbuɗusi ki ko goromma na, kay a goromma hin li a wayasi ma ŋgolna fok gorsem bolowo.

³⁰ Suu Lona manasi ay ki fok jewna nam yasiya, suu nam yasina nam mbuɗusi ki fokom ɗegee, suu nam mbuɗusi ki ɗegeena nam ŋgaasiya.

Min Lonara ŋgolla

³¹ Ni aygi hin daygi ana mege? Lini Lona ni maygina ni sa hin halaygi a honira ni gege?

³² Nam doo ka kay a ɦal goromma kiraɗi, nam ɦam ki ni kaygi halaŋ, nam hin hin bay ɦaygi tlesuu daŋŋa halaŋ u goromma ni nanage?

³³ Sa ma hin di cora kay suuna Lona mansina ni gege? Sa di na kaɗi, Lona di wa ana sana ni ɗegeera ni daɓiya.

³⁴ Sa ma hin kaɓakŋa kasina ni gege? Sa kaɗi. Yesu Kristu ma miɗna paɗ ki kolo kak hu bik ko Lona ma njufna ka cen Lona kaygiya.

³⁵ Sa ma ndak ɓorowoygi ki u minda vi Kristura ni gege? Ni wihawra ɗowba laara su, lassa ɗowba, mayra ɗowba, hawra ɗowba, dlara sana fi maɗna funda ɗowba, miɗna tamba su?

³⁶ Ko ɓiira dira na «Asi tinimi fun miɗna hu buuna tew tew ni kaŋu, asi golomi ko yoo timigiina hu li ma ŋgaɗasina na.»

³⁷ Hu tle asina halaŋŋi aygi su ki kasi u sa ma miniygina.

³⁸ An wi ki gasi gasi ana va ma ɓorowoygi duk ɦoŋoy ki u min mamba kaɗi, miɗnaɗi lay, ka iiriraɗi lay, ka suu sunda huulonaɗi lay, ŋgolla daŋga u saɓak ma kolo huulonaɗi lay, ka dlara cecembaɗi lay, kara fokkaɗi lay.

³⁹ Saɓak ma kolo huulonaɗi lay, saɓak ma kaŋga kay ndaŋgaranaɗi lay, ni ka va ma daŋ ma lam liiɗi lay, va ma ndak a ɓorowoygi dukuygi u minda vi Lona ta nam takaygira u Bu Suuna Yesu Kristura kaɗi.