ROMMA 7 - Boy Lonana

Boy ma tli tam u ɗumbana

¹ Gorsenna agi wi boy ma an min daginana wa kay mege agi wi gaɗta, gaɗta li saɓak kay sana ni hu li ma nam ka iiri tuna.

² Ko ndal cara njuni hu gaɗta u njufuɗ hu li ma nam ka iiri tuna, lini njufuɗ miɗ wa ni ndaɗ buɗ ki hu gaɗ ndaɗta.

³ Lini cara jok u njuf ma daŋŋa bay njufuɗ miɗa ni asi yaɗ ana cara oo oora, lini njufuɗ miɗ ki wa ni ndaɗ ki buɗi hu gaɗta. Ndaɗ ndak a kak u njuf ma daŋŋa ka a sa yaɗ ana cara oo oo oloɗi.

⁴ Ni ko ndaɗta na may gorsenna agi ki miɗi eg gaɗta. Hu li ma agi taɓi u mbalata Kristu agi mbuɗ ni maŋ sa ma paɗ ay ki kolo hu miɗna, kay aygi laygi sunda gasira maŋ Lona.

⁵ Hu li ma ay ka hu saara sa warna tuna, saara cora zuɗuy a ŋgel gaɗta li sunda huri halaŋ a tuɗi hu miɗna.

⁶ Cecemi aygi buɗ ki hu gaɗta wa, kay aygi ki miɗi eg cora vaygi jew kaŋgara. Agi ndak a sun Lona hu dlara wilira u saɓakŋa vi Musuk Lonara, u dlara basira ɓiiri hu gaɗtara ka oloɗi.

Gaɗta u cora

⁷ Hin daygi ni ana mege, gaɗta ni cora su? Ҥawaa ka coraɗi, gaɗta takan ki ni coonda. Lini gaɗta di ana, «Aŋ ŋgiziɗ ziŋ somoŋgira ɗi» ni, an ka wi ana ŋgiziɗ ziŋ somoŋŋa ni cooraɗi.

⁸ Gaɗta mal voɗta ki maŋ cora kay a vuɗ ŋgiziɗta zeɗ zeɗta halaŋ hurunu, lini gaɗta kaɗi cora ni va ma miɗi ɦawaa.

⁹ Ay hu jewra bay gaɗta wanni an iiriya, hu li ma gaɗta mba mbani cora mbuɗ iiriya,

¹⁰ an varak miɗ kiyo. Gaɗ mayra tuɗ sana hu iirira kan anni ndaɗ tuɗun ni hu miɗna.

¹¹ Hu li ma cora fi voɗta ndaɗ ganan yan u gaɗta ndaɗ can ki ni u gaɗ ndaɗta lay.

¹² Gaɗta kay taɗta ndaɗ teteɗ, gaɗta dew dew halaŋ ɗegee jivi lay.

¹³ Va ma jivina hin mbuɗ a va ma can kina su? Ka naɗi, cora mbaa dla ndaɗta ni ndaɗu. Ndaɗ tak gasi maɗta ana ndaɗ ni corara, ndaɗ li sunda u dlara jivira kay a can kiyo, gola cora mbuɗ ni na, ndaɗ mbuɗ ki saɓaki cora ni u gaɗta.

Dla cora su ki kay sana

¹⁴ Ay wi ana gaɗta ay ni vi Lona, anni sa warna ɦawaa ki gusi a mbaɓuna ko cora.

¹⁵ Va ma an lamma an ka wam umbi, an ka li va ma an min a lam ginnaɗi, va ma hurun ka minimbina an hin lammi namu.

¹⁶ Lini va ma an lamma an ka minɗi ni, an wi ana gaɗta ni jiviya.

¹⁷ Li dla ndaɗta na ni ka anɗi, cora hurunda li ni ndaɗu.

¹⁸ An wi anaba jivira ka hurunɗi, ni hu maŋi manda sa warna, lini ana saa mayra a li jivira ka hurunu ni, doli an ndak ka a li dla ndaɗtaɗi.

¹⁹ An ka li jivi mayra an min a laɗtaɗi, an lini co mayra an min a laɗɗira.

²⁰ Lini an li va ma an ka minimbina ni, ka li dla ndaɗta ni anɗi, ni cora hurunda.

²¹ An gi u gaɗ ndaɗta ha kiyo, lini an min a li jivira ni an ndakgi, an hoŋ lini cora na ɗow.

²² Hurun anni an li furira kay gaɗ Lonara.

²³ An fi gaɗta daŋga eg mbalatanu njogoɗ taɗ u ta hurun miniɗta, ndaɗ mbuɗun daŋgayna hu gaɗta vi cora egenda.

²⁴ Hahawra ni kan anu. Sa ma hin buɗun ki hu mbalatanda tuɗun hu miɗ namma ni gege?

²⁵ An gi deɓ Lona hu Bu Suuna mayna Yesu Kristu. An u yal manna ka li sunda vi gaɗ Lonara, hu maŋi manda sa warna, an li sunda ni u gaɗta vi dla cora may.