ROMMA 6 - Boy Lonana

Miɗi hu dla cora kak iiri hu Kristu

¹ Daygi ana mege lakaygi hu dla cora a oora vi Lona mbuɗ ŋgol su su?

² Ka naɗi. Aygi ki miɗi hu cora aygi hin kak iiri huruɗni nana daŋ ologe?

³ Agi ka wi ana aygi suu fi batemma u Yesu taɓi u nam hu miɗ mamma naɗi su?

⁴ Hu batemma ay pi u namu kay a miɗ ko taygi dew, ko ndal Yesu Kristu paɗ ki kolo iiri u saɓak ma ŋgolna vi Bumma na. Aygi may ni hin mba lakaygi hu iirira wilira.

⁵ Lini aygi taɓi u nam hu miɗ mamma ni, aygi hin taɓ u nam hu paɗ mamba kolora na may.

⁶ Waygi ki jivi ana saaygi ma jewna aygi ɓalam ki hu gu garakŋa u Yesu wa, kay taygira li dla cora mba li oloɗi, aygi ka a mba li mbaɓu vi cora oloɗi lay.

⁷ Sa ma miɗ kina, kini buɗi hu dla cora.

⁸ Lini aygi miɗ ki hu Kristu wa, aygi vi ana aygi mba kak iiri u nam may.

⁹ Kay mege Kristu paɗ ki kolo iiri duk suu miɗina ni ka miɗ oloɗi, saɓak miɗna ka kam oloɗi lay.

¹⁰ A miɗna nam miɗ yam dew kay cora a fafatɗa, kakka kak iirira ni kay Lona may.

¹¹ Agi may ni gol tagi ko miɗi eg dla cora na. Kak iiri maŋ Lona taɓi hu Yesu Kristu.

¹² Hin dla cora a kak mulla kay tagi mayra miɗiraɗi, ka a nam ɦeɓegi a li u min maɗtaɗi.

¹³ Hinigi mbalatagi a li sunda maŋ dla cora ko tlesuu sunda vi dla cora naɗi, ɦal tagi ni maŋ Lona na ɗow. Ko suu paɗ aygi kolo iiri hu miɗnana na, hinigi tagi ni a lam sun mamba ɗegeera.

¹⁴ Kay dla cora kak mul kagiɗi, kay mege agi ka njuni u gaɗtaɗi, ni u oora vi Lona.

Mborɓii ɗegeerana

¹⁵ Na na ɗaŋge? Aygi ndak laygi cora ana aygi ka njuni u gaɗtaɗi, ni u oora vi Lonara su? Ҥawaa ka ndak li naɗi.

¹⁶ Agi wi kagi ana agi ɦal tagi wa a li sunda vi saa ni hum umu, agi hin mbuɗ ni mborɓiina vi sa ma agi hum uma, li u cora a tuɗuŋ hu miɗna kala, ɗowba u hum vunna a tuɗuŋ hu ɗegeera fok Lona.

¹⁷ Gi deɓ Lona, agi suu li ay jew mborɓiina ko dla corana, cecemi agi vi u hurugi halaŋ mbeleŋ ma agi wam ay hu haɗtana.

¹⁸ Agi buɗ ki hu cora, mbuɗi mborɓiina vi ɗegeera.

¹⁹ An ɓak boy namma ko suuna halaŋ ɓaka na kay maŋi magira suu warna. Ay jew ni agi hin tagi a mborɓiina vi sunda cora u bay ɗegeera, u sunda cora agi poy ni hu dlara ka u voɗoɗɗira, na may cemi agi hin tagi halaŋ a mborɓiina vi sunda ɗegeera, a poy poyra teteɗta.

²⁰ Mayra agi li ay mborɓiina vi dla cora ndologi ka u dlara ɗegeeraɗi.

²¹ Agi hin fi me u sunda zolo ta agi laɗ ay jew ndaɗta ge? Sun ndaɗta tuɗuŋŋi hu miɗna.

²² Cecemi agi buɗ ay ki ko dla cora wa, mbuɗ ni suu sunda vi Lona. Agi mbuɗ cecemmi suu vi Lonana, vuɗ magira ni poyra teteɗta, warak ma agi hin famma ni iirira bay daɓpa may.

²³ Warak ma cora ɦamma ni miɗna, ɦala ɦawara vi Lona ni iirira bay daɓpa, taɓi u Bu Suuna mayna Yesu Kristu.