ROMMA 4 - Boy Lonana

Boyna kay Abraham

¹ Aygi daygi ni me kay buygi ma jewna Abraham ge? Nam fini mege?

² Lini Abraham ay ɗegee ii Lona kay sun mamba nam laɗta ni, nam ndak a ŋga tam kaɗ fok Lona, namay ni nam ndak ka a ŋga tam fok Lonaɗi.

³ Boy ma Ɓiirina di ana, «Abraham vi vun Lona, Lona ŋgaam ko nam sa ma ɗegeena na kay viimba.»

⁴ Sa ma li sunda fi warakŋa, warak mamma ka ndum ko ɦamma ɦawa naɗi, warakam ki ni bal mamma.

⁵ Sa ma li sun kaɗina tin hurum kay Lona ma mbuɗ suu cora ki ɗegeena, Lona golom ko sa ma ɗegeena na kay viimba.

⁶ Ko David dira na jivira ka kay sa ma Lona ŋgaam ɗegee bay ndumum sun mambana.

⁷ «Furira ka kay suu may suu Lona bulumusi coosira kina, ni suluk masina ka oloɗi.

⁸ Furira ka kay sa ma Bu Suuna ka ndumum coombaɗina.»

⁹ Jivi ndaɗta ni kay suu ɗiwisi cawina doy hol su? Ka kay suu bay caw ɗiwisinaɗi su? Aygi di ana, «Lona ŋgaɓ Abraham a sa ma ɗegeena ni kay viimba.»

¹⁰ Dla ndaɗta li ay na ni saɓage? Ni hu li ma Abraham caw ɗiwim ki wa ɗowba bay caw tu su? Ka dagan cawraɗi ay ki ni fok jewe.

¹¹ Abraham fi caw ɗiwra ni ndaɗ hin egemmi ko takka na, Lona ŋgaɓam dla ndaɗta ay egemmi kay nam sa ma ɗegeena, kay viimba ay jew bay nam caw ɗiwim tuwa. Abraham ni bu suu tin hurusi kay Lona bay caw ɗiwisi tuna, Lona ŋgaasi a suu ɗegeena.

¹² Nammi bu suu caw ɗiwisi kina lay ni ka kay suu di kay tasi ana asi caw ɗiwisi kiwana ɦawa naɗi, li u viimba nam mbuɗ a buygi Abraham bay caw ɗiwim tura na.

Fi va ma Lona vi vunum kamma u vira

¹³ Lona vi vunum u Abraham u njafam halaŋ a nam hin ɦasi ndaŋgara a joosina, vi vun namma ka ni ana Abraham hum u gaɗta naɗi, kay mege Lona golom ɗegee ni kay viimba.

¹⁴ Lini ana suu hum u gaɗta doy holna fi jona ni asiya ni, vira mbuɗ ki ni ɦawaa, vi vun Lonna hin ki ni va ma ɦawana lay.

¹⁵ Gaɗta mbaa yara vi Lona, lini gaɗta kaɗi ni bay hum vunna vi gaɗta kaɗi may.

¹⁶ Vi vun Lonna nam vammi u vira, ni u ɦala ɦawara vi Lona kay ndaɗ mba li kay njaf Abraham halaŋ, ni ka kay suu vi u gaɗta ɦawana holɗi, ni kay suu vi ko Abraham na mayna, Abraham ni buygi halaŋ.

¹⁷ Ko ɓiira dira naa, «An tiniŋŋi a njaf suuna ŋgolo mba li a goryoŋu,» fok Lona nammi buygi ma nam vi umma. Lona ma hal iirira maŋ suu miɗina, va ma ka li ginɗina nam lamu.

¹⁸ Abraham viya ka juɓa kay dlara nam waɗ ka ginɗira kay hin mbuɗ a njaf suuna ŋgolo mba li a goryoŋu, ko Lona dira na «Ndum njaf maŋŋa hin lini na ga.»

¹⁹ Basaɗam hal a tew va kis ni viimba mbuɗ ka maŋiɗi, hu li ma nam saa kay tliw tam mbuɗ ko miɗi na, u caamba Sara ndak ka a vuɗ goo oloɗi lay.

²⁰ Nam ba viimba ka kiɗi, ciway ka kay va ma Lona dammanaɗi lay. Viimba mbuɗ fok saɓaki, nam geleɗ Lona.

²¹ Nam vi ki gasi ana lini nanagelay Lona ndak li u va ma nam damma.

²² Kay ndaɗta Lona ŋga Abraham a sa ma ɗegeena kay viimba.

²³ «Nam ŋgaam a sa ma ɗegeena,» ni ka ana boy namma ɓii ni kam dew naɗi.

²⁴ Boy namma ɓii ay ki ni maygi aygi suu ŋgaɓi ɗegeena, maygi aygi suu tin huruygi kay sa ma col Yesu Bu Suuna ki kolo hu miɗnana.

²⁵ Ҥam ay ki hu miɗna ni kay cooygira nam colom ki kolo iiri ni kay a mbuɗuygi ɗegee fok Lona.