ROMMA 3 - Boy Lonana

¹ Dlara ɦuɗ sana fok a nam sa ma Juifna ka su? Caw ɗiwra jiviɗ ni ana mege?

² U ŋgara ŋgolla ay ni eg suu Juifna kay nam ɦasi boy mamma ay fok jewe.

³ Lini suu hiŋŋa bay viya, bay vi ndaɗta hin ɓeŋ ɗegee Lonara ki su?

⁴ Ni ka naɗi, ni kay Lona tak gasi mamba, lini suuna halaŋŋi suu kaboyna lay ko ɓiira dira naa, «Dlaaŋga tak ki kaŋ ɗegee ko aŋ dira na may, lini tuɗuŋ fun ɓakŋa wa ni boy maŋŋa hin li jivi may.»

⁵ Lini cora aygi laɗta tak ana Lona ɗegeera ni aygi hin di ni ana mege? Lona lini co kay nam gaygi daŋgayna su? An ɓak na ni u saara vi suuna.

⁶ Ni ka naɗi, Lona lini coo ni nam hin kaɓakŋa kay suuna su?

⁷ Lini kaboy manna tak ki gasira vi Lona ɗegee a geleɗem lay ni, ɓakŋa hin ka kan ko sa ma cona na ni kay mege?

⁸ Ni aygi di ana, «Laygi cora kay nam hin laygi jivira suwa,» naɗi kay mi ologe? Suu ɦiw di cora kamiya, kaami boyna kami kay boyna ko wanni na, suu asina ɓakŋa hin mba ka kasiya.

Sa ma ɗegee kaɗi

⁹ Aygi suu Juifna dlaaygi ŋgol su suu hiŋŋa su? Ka dewɗi. An di ki wa daa, ana suu Juifna u njaf suu hiŋŋa fun tasi hu cora dew.

¹⁰ Ɓiira di ki ana, «Sa ma ɗegee kaɗi dew lay kaɗi.

¹¹ Sa ma hum ka dewɗi, ma hal Lona kaɗi lay.

¹² Suuna halaŋ viɗ ki eg Lona day, asi halaŋ ba ki wa, sa ma li jivira kaɗi, dew lay kaɗi.

¹³ Delesi ni ko zulla pi maɗna ki malira na, sinisi ɓakŋi dlara ganyamba, boy ma kal ay ki funusina ni ko ŋgis guygina na.

¹⁴ Vunusi oy u boy co ma gala ma ba sana kina.

¹⁵ Asi liŋ saɓak kay a ci sa kiyo.

¹⁶ Lii asi kal huna ni ɓalakka u yoora hin ka huwa.

¹⁷ Asi ka wi voɗta vi heɓpaɗi.

¹⁸ Asi ka li ndaa u Lona ndeɗi lay.»

¹⁹ Aygi wi ana dlara gaɗta daɗta dini maŋ suu li uɗna, vun sa ka mal a di boy ma puruɗ tam kiɗi, kay a suuna halaŋ ɓakŋa vi Lona mba tok kasiya.

²⁰ Sa ma li u va ma gaɗta damma ana nam ɗegee fok Lona ni kaɗi. Gaɗta tak ki ni cora vi sana.

Lona suɗ sana ni nanage

²¹ Cecemi Lona takay voɗta nam mbuɗuygi ki ɗegee fokomba, ni bay gaɗta diya. Gaɗta u suu jok vun Lona di anaba,

²² Lona min mbuɗ suuna ɗegee u hurusi ma tini kay Yesu Kristuna, nam lini kay suu tin hurusi kay Kristuna halaŋ, nam ka ɓorow ii suunaɗi.

²³ Suuna halaŋ li cora wa, ka ndaki kay a fi ŋgolla fok Lonaraɗi.

²⁴ Lona u jivi mamba mbuɗ suuna ki ɗegee ɦawa ni u Goromma Yesu Kristu ma buɗusi kina.

²⁵ Lona li ɓivunna ki u namu, u miɗ mamma Yesu yow cora vi suu vi umma kiyo, Lona li takka ki a wi ana nam ɗegee u jewra nam ɗil irim kay cora vi suuna.

²⁶ Cemi wanda nam tak dlara nam mbuɗ suuna ɗegeera nam min a mbuɗ suu tin hurusi kay Yesuna ki ɗegee may.

²⁷ Ni dlara sa hin a ŋga tam kaɗ daŋ olo su? Ka naɗi, ni kay mege? Kay nam hum u gaɗta, ni ka naɗi, ni kay mege? Kay nam tin hurumu.

²⁸ Ay wi ana sana mbuɗ ɗegee fok Lona ni kay nam tin hurumu, ka kay nam vi u gaɗtaraɗi.

²⁹ Na ni Lona ni Lo vi suu Juifna dew su? Nammi ka Lona vi njaf suu daŋŋa layɗi su? Nammi Lona vi njaf suu daŋŋa lay.

³⁰ Kay mege Lona nam dew daŋ, nam mbuɗ suu Juifna ɗegee ni u viisira, hin mbuɗ njaf suu daŋŋa ɗegee ni u viisira lay.

³¹ Lini na ni aygi mbuɗ gaɗta ki maŋi u vira wa su? Ni ka naɗi, aygi haɗni saɓakŋa na ɗow.