ROMMA 2 - Boy Lonana

Ɓak ma Lona kaamma

¹ Aŋ sa ma kaɓakŋa kay suuna, vunuŋ hin vaŋ may. Hu li ma aŋ kaɓakŋa kay suuna, aŋ li ko asi na lay, ni aŋ kaammi kay taŋga tok.

² Aygi wi ana Lona kaɓakŋa u gasira kay suu li cora ko ndaɗta na na.

³ Aŋ saa ana aŋ hin suɗ ki ko ɓak ma vi Lonana su? Aŋ sa ma kaɓakŋa kay suu li cora aŋ taŋga hin li ko asi na may su?

⁴ Aŋ pan jivira ŋgolla vi Lonara u ɗigilla, u lalam mamba, ni pani su? Aŋ ka wi ana jivi Lonara hal a mbuɗuŋ iiri maŋga zeɗ ni ndaɗu naɗi su?

⁵ Aŋ sa ma huruŋ cona ka min a jok huruŋ zeɗɗi, ni kay ndaɗta aŋ tok ɓak ma ŋgolna kaŋ wa, falira Lona hin a kaɓak mamma ɗegeena.

⁶ Nam hin warak suuna ni u sun masira.

⁷ Nam hin ɦal iirira ka daɓ kiɗira maŋ suu li jivina, asi suu hal ŋgolla u geleɗta u iirira bay miɗna.

⁸ Nam hin tak yaamba ki u hurum ma ɓeŋina eg suu hurusi gonokka egemma, u suu ka hum u gasiraɗina hoŋ hum u dlara ka u voɗoɗɗira ɗowna.

⁹ Wihawra u lassa hin mba kay suu li cora halaŋ, gijaŋŋa ay u suu Juifna hin mba kay suu daŋŋa.

¹⁰ Ni nam Lona hin ɦal ŋgolla u geleɗta u heɓpa maŋ suu li jivina halaŋ, gijaŋŋa u suu Juifna hin mba kay suu daŋŋa.

¹¹ Lona ka ɓorow ii suuna zeɗ zeɗɗi.

¹² Suu li cora ka wi u gaɗta vi Moizza ɗina, hin ba ki kay bay gaɗ ndaɗta may, suu li cora wi gaɗta ndaɗtana asi mba fi ɓakŋa u gaɗta ndaɗta may.

¹³ Suu jivi ii Lonna ni ka suu hum u gaɗta ɦawaɗi, ni suu li u va ma gaɗta damma.

¹⁴ Lini suu daŋ suu ka wi gaɗta vi suu Juifnaɗina, asi tasira li hum u gaɗta ni asi gaɗ masira kay tasira kaa, lini masi ta ay kaɗi lay.

¹⁵ Dlaasira asi laɗta ko ndal gaɗta ka dasira na ka ɓiiri hurusiya, yal masina u saa masira ka takasi na, buu mari ni ana asi li coo, buu mari ni suɗusi ki may.

¹⁶ Ni va ma Lona hin kaɓakŋa kay suuna u Yesu Kristu u tlesuu ŋgay huu suuna halaŋ ko Boy ma Ayra ma an ka dam wanna dira na.

Suu Juifna u gaɗta

¹⁷ Aŋ sa ma di ana aŋŋi sa ma Juifna aŋ coli eŋga kay gaɗta, ka li zolo kay Looŋŋaɗi.

¹⁸ Aŋ wi minda vi Lona gaɗta gaɗaŋ ana aŋ man va ma jivina.

¹⁹ Aŋ vi kaŋ a sa ma tak voɗta maŋ suu dugina a kiɗikka vi suu ka hu ndufundana.

²⁰ Aŋŋi sa ma haɗ suu ka wi vaɗina sa ma haɗ kemba. Kay mege, aŋ wi ana gaɗ magira tak ki wira u gasira pasiyakka.

²¹ Aŋ sa ma haɗ suuna ka haɗ taŋ maŋgi su? Aŋ sa ma di ana sa kulɗina aŋ hin kul ni nanage?

²² Aŋ sa ma di ana li zoŋgina aŋ hin li zoŋga ni nanage? Aŋ sa ma ŋgul fulina aŋ hin yow tlesuu hu ziisina su?

²³ Aŋ sa ma ŋga taŋ kay gaɗtana, aŋ hin ɓeŋ sem Lona li u va ma gaɗ mamba dinaɗi daŋ olo su?

²⁴ Kay ndaɗta ɓiira diya, «Agi suu Juifna njaf suu daŋŋa ŋgul Lona ni ugiya.»

²⁵ Lini aŋ hum u gaɗta ni caw ɗiwra li kaŋ jivi may, lini aŋ ka hum u gaɗtaɗi ni, ko aŋ caw ɗiw kaɗira na.

²⁶ Lini sa ma caw ɗiwim kaɗina hum u gaɗta ni, Lona hin ŋgaam ko sa ma ɗiwim cawina naɗi su?

²⁷ Sa ma caw ɗiwim kaɗina lini nam hum u gaɗta ni, nam hin kaaŋ ɓakŋa kaŋ aŋ sa ma ka u caw ɗiwra, wi gaɗta lay, ka li uɗɗina ɗi su?

²⁸ Sa ma Juifna ma gasina ni ka sa ma tak tam ii suuna u caw ɗiwra ɦawaɗi. Ni va sa wam eg mbalata sana ɦawaɗi.

²⁹ Sa ma Juif ma gasina ni hurum kurufuwa, wi ana nam ɗiwim cawiya ni hurum voo, caw ɗiwra gasira ni u minda vi Musuk Lonara ka u gaɗta ɓiiriraɗi. Sa ma Juif ma gasina fi geleɗ mamba ni ka ko suunaɗi, ni ko Lona.