ROMMA 16 - Boy Lonana

Gi deɓ suuna

¹ An min dagi ha kay wayaygira Febe cara li sunda duk suu vi Kristuna hu Seŋkre.

² Taɓagira ugi u sem Bu Suuna ko suu vi Lonana li duk tasira na, njun uɗ hu tlesuu ndaɗ ndak a lasi egegina halaŋ, ndaɗ kay taɗta njun u suuna cocoo, njun un tanda lay.

³ Gi deɓ Prisiye u Akilas ndarayan suu sun Yesu Kristuna.

⁴ Asi hal gin a ba iiri masira ki kay a suɗun manda, an gasi deɓpa ha ni ka an holɗi suu vi Kristuna duk njaf suu ka suu Juifnaɗina hu duliyara halaŋ.

⁵ Gi deɓ maŋ suu vina suu li tokka varasi vona. Gi deɓ Epanet sa vi u Kristu hu ndaŋgara Azi jewna.

⁶ Gi deɓ Mari ta li sunda co co kagira.

⁷ Gi deɓ Andronikus u Junias asi suu somo manda ay hu daŋgayna u tami lay. Asi ay ni duk suu vovoɗta sesi tii co co lay, asi vi u Boy Lonana ni jewen lay.

⁸ Gi deɓ maŋ Amplias bananna hu Bu Suuna.

⁹ Gi deɓ Urbain ndaraygi ma sunda vi Kristu u banan ma an minimma Stasis.

¹⁰ Gi deɓ Apelles sa ma fi tukka kay viimba u Kristuna. Gi deɓ maŋ suu hu zina vi Aristobulna.

¹¹ Gi deɓ maŋ Herodion ma somonna, gi deɓ suu hu zina vi Narsis suu vi u Bu Suunana.

¹² Gi deɓ maŋ Trifen u Trifos suu li sunda maŋ Bu Suunana, u ndaran goora Persid ta li sunda vi Bu Suuna co cora.

¹³ Gi deɓ maŋ Rufus u sumu asi suu li sunda vi Bu Suuna ndaɗ ni sun an lay.

¹⁴ Gi deɓ maŋ gi Asiŋkrit, Flegon, Hermes, Patrobas, Hermas u gorseygi suu ka u asina.

¹⁵ Gi deɓ maŋ Filolog u Juli, Nere u wayaɗta, Olimpas u suu vi Lona suu ka u asina halaŋ.

¹⁶ Gi deɓ duk tagiya tagiya ko gorseŋ tagina na, suu vina vi Kristu halaŋ ka gagi deɓpa.

Ne yam mayra daɓ daganda

¹⁷ An ka dagiya gorsenna gologi tagi jivi ko suu col ciwayra, a ɓorow duk suuna ki u haɗta agi haɗaɗta, ɦuɗ tagi ki egesi day.

¹⁸ Kay suu ko asi nana ka sun ni Kristu Bu Suunaɗi, asi sun ni hayasi taɗta gaw u boy masi ma jivina u ɓak masi ma fiyek ma gan yamba, asi ɓeŋŋi ŋgus suu u dla ka irisiɗina ɦawaa.

¹⁹ Suuna halaŋ wi ana agi hum u Bu Suuna co coo, an li furira kagi ɦay, an min ana agi lakagi ɗegee neey a li jivira, lakagi ɗegee hin cora kiyo.

²⁰ Lona malaŋ heɓpa hin tay Satanna ki kaŋga fokogiya. Ko oora vi Bu Suuna mayna Yesu kak u agiya.

²¹ Timote ndaran ma sunda gagi deɓpa ugi Lusiyus, Jason u Sosipater suu somo manda gagi deɓpa.

²² An Tertiyus ma ɓii magaara wanna gagi deɓpa ha hu Bu Suuna.

²³ Gayus saan ma an buu varamma ma suu vi Kristuna halaŋ li tokka varamma gagi deɓpa, Erast sa ma gol begera ɦoŋzinara komma u wayayna Kartus gagi deɓpa. [

²⁴ Ko oora vi Bu Suuna mayna Yesu Kristu kak u agi halaŋ. Amin.]

Geleɗta daɓ daganda

²⁵ Geleɗeygi Lona nam ndak a mbuɗuygi saɓak hu vira u Boy ma Ay ma an ka damma, dla mayra an ka daɗ kay sem Yesu Kristura, u dlara ŋgayra vi Lonara ta aygi haɗaɗta. Dlaamba ŋgay ndaɗta ay ki ni ŋgay day day sa ka waɗɗi.

²⁶ Cecemi ndaɗ mba ki wa kiɗiki, hu magaara vi suu jok vun Lona tlesuu ay huruɗ halaŋŋa, u gaɗta vi Lona ma ka daɓ kiɗina kay suuna hu ndaŋgara halaŋ wi u dla ndaɗta vi uɗ lay.

²⁷ Nera ni maŋ Lona ma bibiŋilna dew u Yesu Kristu a fafatɗa. Amin.