ROMMA 15 - Boy Lonana

Li dlara furira ni maŋ ndaraŋŋa ka maŋ taŋgaɗi

¹ Aygi suu ka saɓak hu virana njun u suu viisira maŋina, a zii maŋi mayra aygi ka kak iiri kay dlara furiyuygi huruygi kay taygira ɦawaɗi.

² Lini gegelay li va ma ii ndaramma jivina kay a wulum kolo hu vira.

³ Kristu li dlara jivira ka ni kay tam holɗi, ni na ɗow ko magaara dira naa, «Ŋgulla suuna ŋguluŋga ndi kaŋga ni kanu.»

⁴ Tlesuu ay hu Boy ma Ɓiirina jew halaŋŋa ɓii ay ni kay a takaygi u dlara, kay boy ma ay hu magaara namma halaŋ mba gaɗaya, kay ay mba kak u juɓpa u ɗigilla.

⁵ Lona may ma ɦal gaɗta gaɗ suuna u kakka heɓpana mba mbuɗugi saɓak a kak ko tagiya, minigi duk tagiya tagiya ko Yesu Kristu lira na.

⁶ Kay a aygi halaŋ vunuygi li taɓi dew a geleɗ Lona Buna, Yesu Kristu Bu Suuna mayna.

Boy ma Ayra maŋ njaf suuna halaŋ

⁷ Taɓagi duk tagiya tagiya maŋ bibiŋilla vi Lonara, ko Kristu taɓagira na may.

⁸ An dagiya Kristu mbuɗ ki sa sunda vi suu Juifna kay li u va ma Lona dam ki maŋ somoyosina, kay tak ana va ma Lona damma ka mbuɗ ki ma daŋgi.

⁹ Nam mbani kay njaf suu ka suu Juifnaɗina, geleɗ Lona kay jivi mamba nam laɗa ko magaara dira na, «Kay ndaɗta an hin geleɗeŋ duk njaf suuna halaŋ, gi soolla a geleɗeŋ seŋ lay.»

¹⁰ Ndaɗ di olo ana, «Agi njaf suuna halaŋ furiyugi u suu vi Lonna.»

¹¹ Olo, «Agi njaf suuna halaŋ geleɗegi Bu Suuna, ko suuna halaŋ geleɗemu.»

¹² Ezayi di olo ana, «Sa ma hu njafna vi Jesena hin mbaa, kak mulla kay njaf suuna halaŋ, hurum namu suuna hin mba juɓum u heɓpa.»

¹³ Lona ma mba juɓpa hoɓogi u furira u heɓpa halaŋ, hu vira agi vi umba a Musuk Lonara u saɓak mamma hoɓogi u juɓpa heɓpa.

Pol ndak a ɓii magaara ko nam lira na

¹⁴ Gorsenna an kay tanda saa ana agi hurugi hoɓi u jivira, hoɓi u wira halaŋ, ndaki kay a gaɗ tagi duk tagi lay.

¹⁵ An ɓiirigi magaara ha hu lii daŋŋa zeɗ zeɗ kay gaɗagi a gagi humugi kay dlara agi humuɗ ki jewra, ɓiirigi ha ni u oo mayra Lona ɦandara.

¹⁶ Kay a kak sa sunda vi Yesu Kristu kay njaf suu ka Juifnaɗina, an lini u sunda ɦanda a di Boy ma Ayra vi Lona kira, kay a njaf suu daŋŋa mbuɗ ki va ma jivi ma Lona furi kamma, mbuɗ ki suu mam suu ndakina u saɓakŋa vi Musuk Lonara.

¹⁷ Kay taɓpa u Yesu Kristura an ndak kay geleɗ tan kay sunda vi Lona.

¹⁸ Lini an min a ɓak eŋ kay va ni kay mayra Kristu yan ki a mbuɗ njaf suu daŋŋa ki a hum u Lona nam tak dla ndaɗta ki u boyna u sunda may.

¹⁹ U saɓakŋa vi Musuk Lonara li dlara mbuɗta an gijaŋŋa a di Boy ma Ayra kay Kristu an gijaŋŋa hu Yerusalem tuɗ hu li ma daŋŋa tew ki hu ndaŋgara Illiri.

²⁰ An tuɗ di Boy ma Ayra hu li ma sa ɓak ka kay sem Kristu hu tuɗina, kay a tin kolo kay u zira vi sa ma daŋgi.

²¹ A li ko va ma magaara damma na, «Ana suu dasi ka kay boy namma tuɗina hin wamu. Asi suu sa ɓakasi kaɗina hin humum um kiyo.»

Pol ɓak kay koy mamba Romba

²² Ni va ma dooron tew tew kay an a tuɗ ha varagina.

²³ Cecemi sun manda hu ndaŋgara tanira daɓ wa, basara ŋgolo an hurun haɗ kay a tuɗ gologiya.

²⁴ An col ɦawa a tuɗ Espagne ni an hin tli ha varagiya, an a tli varagi ni kay va ma agi a njun un u nam kay koy manda fokka, agi hin tininni ŋgoo dagan buu maa nde.

²⁵ Cecemi an tuɗ Yerusalem kay li sunda duk suu vi Lona suu huna.

²⁶ Suu vi Kristuna hu Masedoin u suu Grekŋa min a ɦal tlena maŋ suu vi Lona suu wihawra hu Yerusalemma.

²⁷ Asi saa boy namma ni asi daŋ may, a gasira ni asi ndak a njunusiya, kay suu vi Kristu suu Yerusalemma ɓorow tlena vi Musukka ki duk tasi u suu ka njaf suu Juifnaɗina, suu ka njaf suu Juifnaɗina ndak a njun usi u tlesuu hu ndaŋgarana may.

²⁸ Hu li ma an daɓ dla ndaɗta wa ni, ɦasi tlesuu agi ɦasisinana wa ni, an hin tuɗ Espagne a hoŋ ayra wanni an hin tli ay varagiya.

²⁹ An wi ana an hin tew ki varagi u paɗvunna vi Kristu.

³⁰ Gorsenna va ma an min joɓogi kamma u Bu Suuna Yesu Kristu u minda vi Musuk Lonara, taɓagi duuna u an dew cenegi Lona kanu.

³¹ Cenegi kanu kay an suɗ ay ki ko suu bay vina hu mbassa Yudera, kay njunda an tuɗ u ndaɗ hu Yerusalem wanda a suu vina mba faɗ u furira.

³² Lini li wa na ni an tuɗ tew ha varagi ni u furira, Lona min wani an tuɗ koɗ tan varagiya.

³³ Lona ma ɦal heɓpa mba li u agi halaŋ. Amin.