ROMMA 14 - Boy Lonana

Kaɓakŋa kay wayaŋŋaɗi

¹ Sa viimba maŋina agi vam ugiya, kaɓak kay saa mambaɗi

² Ko ndal sa ma vina ti tlesuu nam fasina halaŋ, nam sa ma ka saɓak hu viraɗina tini mbalara ɦawara may.

³ Sa ma ti halaŋŋa ŋgul sa ma ka tiɗinaɗi sa ka ti tlesuu taa ɦiwɗina kaɓak kay sa ma tasi halaŋŋaɗi may. Kay Lona vam u furira.

⁴ Sa ma ndak a kaɓakŋa kay sa sunda vi ndaramma ni gege? Lini nam li sun mamba jivi ɗowba ka laɗ jiviɗi, waɗni malamma, nam li jiviya ni Bu Suuna ndak a vam kommi namu.

⁵ Sa ma kaa ni saa ana buu na ɦiw ni su ndarayamma, sa ma hiŋŋa saa mamba ni ana buuna halaŋŋi fun tam dew, gege lay mba wi ki ɗal ɗal hu saa mamba.

⁶ Sa ma di ana buu ma ɦiw ni ŋgolo su ndaramana ɦal ŋgolla ni maŋ Bu Suuna. Sa ma ti tlena halaŋ halaŋŋa ɦal ŋgolla ni maŋ Bu Suuna lay, nam gi deɓpa maŋ Lona kay va ma nam ɦammana. Sa ma ka tiɗina geleɗ ni Bu Suuna kay nam gi deɓ Lona.

⁷ Sa ma dukuygi ma kak iiri kay tam kaɗi, ma miɗ kay tam kaɗi lay.

⁸ Lini aygi kak iiriya aygi kak iiri ni kay Bu Suuna, lini aygi miɗ lay ay miɗni maŋ Bu Suuna lay. Lini ay ka iiri lay, miɗi lay, ni kay Bu Suuna.

⁹ Kristu miɗa paɗ ki kolo iiriya, a li Bu Suuna vi suu miɗina u suu iirina.

¹⁰ Aŋ kaɓakŋa kay wayaŋŋa ni kay mege? Aŋ may ni ŋgul wayaŋŋa ni kay mege? Aygi halaŋi mba coloygi ki fok Lona nam hin kaɓakŋa kaygi ni namu.

¹¹ Kay magaara di ana, «Bu Suuna di ana an ka iiriya, suuna halaŋ hin mba goɓ vun givisi kaŋga fokonu, vun suuna halaŋ hin di ki u vunusi kolo a ŋga Lona.»

¹² Gegelay hin mba di dlaamba ki fok Lona u tamba.

Li dlara puk wayaŋŋa kaŋgaɗi

¹³ Hiniygi dlara kaɓakŋa kay taygira kiyo, saaraygi na ɗow ko di ana, li dla mayra daɓ sem wayaŋŋa ɗowba kalam hu coraɗi.

¹⁴ Hu taɓpa vi Bu Suuna Yesu an wi kan gasi ana tlena halaŋ va ma njenje kaɗi, lini sana saa ana vana wanni njenjee nam mbuɗ ki irim njenje gasi may.

¹⁵ Lini wayaŋŋa mbuɗ ki hahawra u va ma aŋ tamma ɦawaa ni, aŋ ka poy u minda oloɗi, ba sa ma Kristu miɗ kamma ki kay tlesuu aŋ tasina ɦawaɗi.

¹⁶ Va ma jivi iriŋŋa mbuɗum ki a va ma sa di co kambi.

¹⁷ Mul Lonara ni ka kay tlesuu tira u cira ɦawaɗi, ni kay ɗegeera u heɓpa u furira hu Musuk Lonara.

¹⁸ Sa ma sun Kristu ko ndaɗta nana nam ii Lona jiviya. Suuna saa kam jivi lay.

¹⁹ Halaygi dla mayra jivi a tuɗ u heɓpa, hiniygi aygi fi eŋga ko taygi dew hu vira.

²⁰ Ɓeŋ sunda vi Lona ki kay dlara tina ɦawaɗi, gorsenna tlena belni kay a tira halaŋ, aŋ li tiya gol wa a ndi wayaŋŋa ki kaŋga hu cora ni ka jiviɗi.

²¹ Va ma jivina ni aŋ kom tliwnaɗi, ci summaɗi noy tlesuu puk wayaŋŋa kaŋgana ki halaŋ.

²² Viiŋga huruŋga aŋ vaɗ eŋ fok Lona, furira ka kay sa ma li va wi ana nam lini cooɗina.

²³ Sa ma min a ti va u ciwayra hurumma ɓakŋa vi Lona vam wa, kay nam ti ka u vira hurumbi. Dlara sana laɗ bay vira halaŋŋi cora.