ROMMA 13 - Boy Lonana

Hum u suu ŋgolo suu hu duliyara

¹ Lini nanagelay suuna halaŋ hum u suu ŋgolo suu hu duliyarana, ŋgolla hu duliyara ta mbay bay Lona kaɗi, suu ŋgolo suu hu duliyarana halaŋŋi Lona tinisi ni namu.

² Sa ma ka hum u suu ŋgolo suu hu duliyaranaɗina hin ki ni ŋgolla Lona tiniɗta, suu ka humbi asina mbaa ɓakŋa kay tasi ni asiya.

³ Suu li jivina ka li ndaa ko suu ŋgombaɗi ni suu li cora, aŋ sa min li ndaana ko suu ŋgolonaɗina lini aŋ li jivira asi hin geleɗeŋu.

⁴ Lona tin ŋgolla ni namu, kay a tuɗ sana eg jivira. Lini aŋ li va ma coo ni li ndaana ko ŋgolla, asi cuk suuna daŋgayna ni ka u saɓak masina ɦawaɗi, asi li ni sunda vi Lona kay a tak ki ni yara vi Lonara, hu li ma asi cuk suu li cora daŋgayna.

⁵ Ni kay ndaɗta sana mba hum u suu ŋgolona, ni ka kay suɗ taŋ ko yara vi Lonara ɦawaɗi, ni u wiiŋga aŋ wi kaŋ ana ni na daŋ mayra.

⁶ Ni kay ndaɗta agi warak taara maŋ suu ŋgolo suu li sunda, Lona cukusi a ŋgom sun ndaɗta ni namu, nam cukusi kay asi mba li sun masira ndaɗta ki u voɗoɗu.

⁷ Warakagi halaŋ va ma asi joɓogiya, warakagi taara maŋ sa ma joɓ taara may, warakagi va ma sana tinigina kagina maŋ sa namma may. Hoŋ yaŋ kaŋga fok sa ma min ana aŋ hoŋ yaŋ kaŋga fokomuna may. Sa ma min geleɗta agi geleɗem may.

Minda min ndaraŋŋara

⁸ Hin bal vi sa kagiɗi, bal ma ka kagina ni lagi minda duk tagiya tagiya. Sa ma min ndarayammana nam hummi u va ma gaɗta damma halaŋ.

⁹ Kay ndaɗta gaɗta di ana, «Aŋ li zoŋgi, ci maɗɗi, kulɗi, ŋgiziɗ vaŋ saɗi,» gaɗ ndaɗta lay ura daŋga lay taɓ dew hu mayra ana, «Min ndaraŋŋa ko taŋga nara.»

¹⁰ Sa min suuna ka li va ma co eg ndarambi. Kay a li minda ni aŋ hum ki ni u gaɗta bel bel gaw.

Min taŋ kay juɓ Kristu a hoŋ ayra

¹¹ Agi wi anaba aygi cecemi lina hini tok lina ndakwa dliɗigi ki kolo hu senna suɗta hin egeygi cecemi tok. Su mayra aygi vi hu Boy Lonana jewra.

¹² Njeŋgera jak ki wa, maɗiira hinni tok, kay ndaɗta aygi hiniygi sunda vi ndufunda kiyo, yowoygi tlesuu duuna hu kiɗikka koygiya.

¹³ Poyoygi ɗegee ko hu kiɗik faalira na, hinigi kurufukka vi tlesuu tira kiyo u guruɗta guruɗ u summara, dlara bay hum vunna u dlara hoo vuna u dlara honira kiyo.

¹⁴ Cuk iirira wilira vi Yesu Kristu Bu Suunara kagiya. Viɗ tagi ki kay saara vi suu warna u furira vi mbalatara ɦawaɗi.