ROMMA 11 - Boy Lonana

Lona ka noy suu Israelna kiɗi

¹ An joɓa, Lona noy suu mamma ki su? Ka noyosi kiɗi, kay an ni sa ma Israelna hu njafna vi Abraham duk suu deera vi Benjaminna.

² Lona ka noy suu mam suu nam wasi ay jewna kiɗi. Agi wagi boy ma Eli dam maŋ Lona kay suu Israelna kaɗi su?

³ «Bu Suuna asi ci suu maŋ suu jokoŋ vunuŋŋa kiyo, tooŋ otel maŋ ma li ɓivunna ki gaa, an hin dew ni anu, asi ka hal a can ki lay.»

⁴ Ni Lona hoŋom dira ana mege? «An ŋgom suu manna ka bup bup kiɗisiya suu goɓ ka gaa fok Baalɗina.»

⁵ Suu Lona manasi ay ki u jivi mamba ka cecemi na nde daŋ.

⁶ Nam manasi ay ni u jivi mamba, ni ka kay sun masira oloɗi, lini ka naɗi ni jivira vi Lona ni ka jivira oloɗi.

⁷ Hin di ni ana me ologe? Va ma suu Israelna halamma asi fam kaɗi, suu Lona manasi kina famu, suu hiŋŋa ndak ka a hum u boy nammaɗi.

⁸ Ko magaara dira na, «Lona ɦasi ŋgussa zolomba kay irisi wiɗi humusi humbi lay, gak gak karami asi ka na.»

⁹ David di kasi olo ana, «Tlegeyesi suu tira mbuɗ kasi a diŋi ma casi kina, ndira kaŋgara ni a warak masina.

¹⁰ Kay irisi mba dug kiyo, a asi mba wi va oloɗi, ŋgorosi li goɓi kaŋga na tew tew.»

¹¹ An ka joɓ ɗaŋi suu Juifna daɓ sesi puk kaŋga na ni a fafatɗa su? Ni ka naɗi, u coosira ni va ma mbaa suɗta kay suu daŋŋa, ni kay a colosi hurusi ma honira kolo egesiya.

¹² Ndi kaŋgara vi suu Juifna mbuɗ suu hu ndaŋgarana halaŋ ki saɓakŋa wa, ni hoŋ masira hoŋ ki kaŋgara mbuɗ suuna ki saɓak wa na ɗaŋŋi, asi hin hoŋ ay hu suɗta wa ni dlaasira hin lini ŋgol ko ndal mi na ɗaŋge?

Suɗta vi suu ka njaf suu Juifnaɗina

¹³ An dagi ha ni magi agi suu ka njaf suu Juifnaɗina, anni sa ma vovoɗta ma gam ay maŋ njaf suu ka Juifnaɗina, kay sun man ndaɗta an li furira kaɗu.

¹⁴ An ɓeŋ huu suu hu njafanna kay yowmus masina hurusina kay a suɗ suu ki dukusi ɦiw.

¹⁵ Hu li ma asi ay ki keŋŋa suu duk ndaŋgarana halaŋ duk hoŋosi taɓ u Lona, asi hin hoŋ ay wa ni hin lini nana ologe? Hin lini ana suu ay ki miɗina mbuɗ iiriya.

¹⁶ Lini fu ma sana bulukum kom jew a ɦal maŋ Lona ni, umba hinda ni mam lay, lini sok guna ɦam maŋ Lona wa gorgor kommi mam lay.

¹⁷ Suu Israelna ni ko gu conora sana zumuɗ uɗta na, gorgor koɗ ma ɦiw ay ki kaaya, aŋ sa ma ka hu njafna vi suu Juifnaɗina aŋŋi gorgor cono mayra daŋga paɗ fun ndarayaɗnara, aŋ ki cecemi taɓi u ndaɗ cono mayra sana zumuɗ uɗta dew.

¹⁸ Ni aŋ ka ndak a ŋgul ko ma ki kaaynaɗi, aŋ hin ŋga taŋ ni nanage? Aŋ ka zii sarina ni aŋgi, sarina ziiriŋŋi nam ɗow.

¹⁹ Aŋ a di ɗow ni ana, «Gorgor ko namma kaam ki ni kay an a varak balamamu.»

²⁰ Ni jiviya kaasi kini kay asi vi kaɗi, aŋ varak balamasi ni kay aŋ viya, ni aŋ ŋga taŋ ŋgaayɗi li ndaana na ɗow.

²¹ Lona hin suu Juifna suu gorgor gu ma gasina kaɗi ni, nam ndak a hiniŋ ki mayɗi su.

²² Gol jivira vi Lona u yaamba gige? Nam li yara kay asi suu puk kaŋgana, nam li jivira kaŋ aŋ may. Mariyaɗ ni aŋ kak hu jivi mamba gak gak. Li ka naɗi ni nam hin kaaŋ ki ko nam ka ma hiŋŋa kira na may.

²³ Lini suu Juifna hin hurusi ma cona ki wa ni, asi hin hoŋ balamasi ma asi ay pii huna. Lona ndak kay a hoŋ pasi hu olo.

²⁴ Aŋ sa ma ka Juifnaɗina aŋŋi gorgor gu cono mayra ŋgoo bagira, kaaŋ ka ni mba paŋ hu mayra vora, aŋ tli taŋ ka u ndaɗta zumuɗ uɗ voraɗi, nam hin hoŋ mba pasi balamasi ni bay loɓo.

Suɗta vi suu Israelna

²⁵ Gorsenna gasi mayra ŋgayra an min ana agi waɗ kiyo. Tli boy namma kagi ko agi suu neeyna naɗi, suu Israelna suu ɦiw ni ndak ka a hum u boy nammaɗi, dla ndaɗta tuɗ ni na gak gak kay njaf suu daŋŋa mba fi suɗta.

²⁶ Ni dla mayra suu Israelna halaŋ hin mba fi suɗtara, kay magaara di ana, «Sa ma hin buɗ suuna kina hin mbay ni hu Siyon nam hin yow dla cora kay suu hu njafna vi Yakobma ki halaŋ.

²⁷ Galamba an hin laɗ u asira wanni, an hin yowosi coosira ki halaŋ.»

²⁸ Lini ŋga dla mayra suu Juifna noy Boy ma Ayra kira ni asi mbuɗ ni suu babalira vi Lona, kagi agiya lini ŋga ni manda Lona mansira ni asi ni suu nam minisi u sem somoyosina.

²⁹ Lona ka hoŋ tli va ma nam ɦam kinaɗi, nam ka hoŋ vunum dagan kay suu nam yasinaɗi lay.

³⁰ Kay li ay jew ni agi ka hum vun Lonaɗi, cecemi agi wi ana Lona wagi hahaw magira wa, kayra suu Juifna humum vunum kaɗira.

³¹ Asi hum vun Lona kaɗi kay agi mba fi oora vi Lonara, asi lay mba wi oora agi fat ndaɗta.

³² Lona njun suuna halaŋ hu ŋgel gaɗ masira kay nam a tak oo mamba maŋ suuna halaŋ.

Ŋgolla vi Lona ta mbuɗ mbuɗta

³³ Ҥizza vi Lonara ŋgolla nera u wiimba zul ɦay. Sa hin ndak a gam u dlaam ndaɗta kina ni gege? Va ma ŋgaamma sa ndak a humum um kina ni gege?

³⁴ Ko magaara dira na, «Sa ma wi saara vi Bu Suuna ni gege? Sa ma gaɗam hu boyna ana nam li naɗina ni gege?

³⁵ Sa ma ndak a ɦam vana jew a nam hin warakam ki balamma ni gege?»

³⁶ Tlena halaŋ mbay ni kom u tlesuu kana halaŋŋi kom namu asi ni mam lay. Geleɗta maŋ Lona a fafatɗa. Amin.