ROMMA 10 - Boy Lonana

¹ Gorsenna va ma an min joɓ Lona hurun tini kam halaŋŋa ni kay suu Juifna ana asi suɗ kiyo.

² An ndak di kasi ana tasi feɗ a sun Lona, na may uɗ ka irisiɗi.

³ Asi hum u mayra ana Lona min mbuɗ suuna ki fokom ɗegee ni namura kaɗi, asi hal a mbuɗ ɗegeera ni u min masira kay tasira, ni asi hum ka u dla mayra Lona min mbuɗ suuna ɗegee ni namuraɗi.

⁴ Kristu mba tin kini gaɗta vi Moizza hu liiɗu, kay a suu vina halaŋ mbuɗ ki ɗegee fok Lona.

Suu vi u Bu Suuna halaŋŋa suɗta ni masira

⁵ Va ma Moiz ɓiirim kay dla mayra sana a mbuɗ ki ɗegee fok Lona kay hum u gaɗtara, «Sa ma hum u gaɗtana kak iirira ni uɗ may.»

⁶ Dira di ki ana, dlara sana a mbuɗ ɗegee fok Lonara ni u vira, «Di taŋ huruŋ ana sana hin ful kolo huulona ni gege naɗi.» (Ni kay a di ana a mbaa Kristu ay kaŋgara.)

⁷ Ka di ana «Sa ma hin cuk sem ay kaŋga duk ndaŋgara ni gege,» naɗi lay (ni kay di ana sa ma hin kal kaŋga hu zulla a col Kristu ay ki kolo duk suu miɗina ni gege).

⁸ Ɓiira di ana mege? «Boyna ka egeŋ tok vunuŋ u huruŋ lay.» Boy namma ni boyna vi vira ma ami ka damma.

⁹ Lini aŋ di ki u vunuŋ fok suuna ana Yesu ni Bu Suuna, vi huruŋ wa ana Lona colom ki kolo iiri duk suu miɗina ni, aŋ hin fi suɗta.

¹⁰ Sana vi u hurum wa ni, Lona mbuɗum ki sa ma ɗegeena, sana di ki u vunumu Lona suɗum kiyo.

¹¹ Boy ma Ɓiirina di ana, «Sa ma tin hurum kamma ka mbuɗ ki zoloɗi.»

¹² Suu Juifna u njaf suu daŋŋa ka zeɗ zeɗɗi, kay asi halaŋ Bu Suuna masina ni dew ma ɦal tlena maŋ suu yam semma.

¹³ Kay ɓiira di ana, «Suu yi sem Bu Suunana halaŋ mba fi suɗta.»

¹⁴ Sana hin ndak a yam sem bay vi ummi nanage? Asi hin humma, viya bay sa ɓakasi ni nanage? Asi hin hum bay sana dasi boyna ni nanage?

¹⁵ Asi di boyna ki bay sa cukusi ni nanage? Ko ɓiira di kira na, «Jivi ɦay kay suu tuɗ a di Boy ma Ayra kina.»

¹⁶ Suuna vi Boy ma Ayra ka halaŋgi, Ezayi di ana, «Bu Suuna sana vami boy mamina ni gege?»

¹⁷ Vira mbay ni u humba hum boyna, boy ma dam namma ni boyna vi Kristu.

¹⁸ An ka joɓ mi anaba asi ni bay hum boyna tu su? Ni asi humiya, kay ɓiira di ana, «Suuna humusi delesi ha ki kay ndaŋgara halaŋ lay. Boy masina tew hu li ma duliyara daɓ ki huna.»

¹⁹ An ka joɓ olo ana na ni suu Israelna bay hum su? Hoŋ dira kay boy namma Moiz di jew ana, «Lona di ana an min mbuɗugi hurugi yowmusna eg njaf suu daŋŋa. An hin mbuɗugi ya kay njaf suu ka wi dlaɗina.»

²⁰ Ezayi di olo ana, «Lona di ana, An ɦal tan ki maŋ suu halan kaɗina, suu joɓon va kaɗina an tak tan irisiya.»

²¹ Kay suu Israelna nam di anaba, «Hu buuna tew tew an kon ki mali kay a vi suu ka vi vunɗina, suu hurusi honira.»