ROMMA 1 - Boy Lonana

Gi deɓpa

¹ Ni an Pol sa sunda vi Yesu Kristu, Lona yanu, manan a sa vovoɗta kay a dam Boy mam ma Ayra kiyo.

² Lona vi vunum ki jew hu Boy ma Ɓiirina, ma teteɗna, u suu jokom vunumma, ana nam hin ɦal Boy ma Ayra aya.

³ Boy namma ni kay Goomma, Bu Suuna mayna, Yesu Kristu a sa warna nammi hu njafna vi mulna David.

⁴ Na may Musuk Lonara tak ki kam ana nammi Goŋ Lonna u saɓakŋa, hu li ma Lona paɗam ki kolo duk suu miɗina.

⁵ U namu, ami fi oora vi Lona, yami a suu vovoɗta kay geleɗ Kristu a mbaa suuna ay halaŋ kay vi umu, hum u gaɗ mamba lay.

⁶ Agi suu Romma ni duk suu yasi asina lay, agi suu Lona yagi maŋ Yesu Kristuna.

⁷ An ɓiirigi magaara ha magi agi suu Romma, agi halaŋ suu Lona minigina yagi ana agi li ni a suu mamma. Ko buy Lona u Bu Suuna Yesu Kristu ɦagi oora u heɓpa.

Pol min a gol suu Romma

⁸ An gi deɓ bun Lona jewe hu Yesu Kristu kagi halaŋ, suuna hu duliyara halaŋ ɓak kagi ana agi tin hurugi kay Lona cocoo.

⁹ Lona wi ana an di ni gasira, an sunummi nam Lona kay di Boy ma Ayra kay Goomma ki u hurun halaŋ nam wi ana an ka saa kagi tew tew.

¹⁰ Hu li ma an ka cenem tew tewna ni, an joɓ Lona ana lini nam mina ni hinin an tuɗ varagiya.

¹¹ An hurun haɗ cocoo kay a tuɗ gologiya, a ɦagi ɦala vi Musuk Lonara kay a mbuɗugi saɓaki.

¹² Olo an saa kay tuɗ dukugiya a agi may an may taɓaygi dew gaɗaygi taygiya a an fi saɓakŋa u viigira may, agi fi ni u manda may.

¹³ Gorsenna an min ana agi wi anaba an tew tew min a tuɗ varagiya, na may gak gak cecemi an bay fi voɗta tuwa, an min ana sun manda mba li va ma jivi dukugiya, ko li duk njaf suu hiŋŋa na may.

¹⁴ Kay mege ni sun manda kay a tuɗ ki eg suuna halaŋ, suu may suu wi dlara u suu may suu ka wi dlaɗina lay, suu may suu haɗina u suu ka haɗiɗina lay.

¹⁵ Ni kay ndaɗta an tuɗugi Boy ma Ayra ha magi agi suu lak ki Romma.

Saɓak Boy ma Ayra

¹⁶ An ka li zolo kay Boy ma Ayraɗi, nammi saɓak Lonna kay suɗ gegelay ma tin hurumma, ay jewni suu Juifna, hinni maŋ suuna halaŋ may.

¹⁷ Kay ndaɗta Boy ma Ayra tak ana Lona min mbuɗ suuna ki ɗegee fokommi u vira dew daŋ, u tin ura gak gak daɓpa, ko ɓii ay hu magaara vi Lona ta jewra na, «Sa ma ii Lona ɗegee u virana hin kak iiriya.»

Suuna halaŋ cora vasiwa

¹⁸ Yara vi Lona col ay kolo day tak ki kay cora vi suuna halaŋ, u dlaasira cora ka hin gasira a liɗira.

¹⁹ Kay ndaɗta Lona kaasi ɓakŋa kasiya, va ma sana ndak a wi Lona u namma kaki irisi kiɗiki, ni Lona takasi va namma ki irisi ni namu.

²⁰ Ni kay mayra Lona min duliyara ay day dayra, dlaamba bay sa waɗ u irimba ni di ana saɓak mamma ka daɓi ɗina, u dlaam mayra ana ni nam Lona daŋ mayra, ni halaŋ tak ki kay sun mayra nam laɗ ndaɗta ni suuna ndak kay wamu, ii boy masina ka ndak a ɗoɓ oloɗi.

²¹ Asi wi Lona may ka ŋgaambi, ka gam deɓ ana nammi Lona naɗi lay. Ni na ɗow saa masira mbuɗ ki giniŋi yal ka irisi oloɗi, saa masira mbuɗ ndufunu.

²² Asi di kay tasi ana asi ni suu wira ni asi ni laɓaa.

²³ Hu li ma a geleɗ saɓakŋa vi Lona ma ka miɗɗina asi hoŋ geleɗ ni va ma tli tam ko sana ma miɗ kina na. Layagina, mburina, u tlesuu ɦaram kaŋgana, asi geleɗesi ni asiya.

²⁴ Kay ndaɗta Lona hinisi buɗiya a li dlara njenjera u minda hurusira hu poy masira asi li dlara zolona, eg tasiya.

²⁵ Asi mbuɗ gasira vi Lona ki kaboyna, asi cen tlesuu Lona lasina, sunusi lay, hin Lona ma li tlena halaŋŋa kiyo, a geleɗem ginni nam gak gak hu daɓ kira. Amin.

²⁶ Ni kay ndaɗta Lona hinisi buɗi u saa masira cora duk zolona, boyogi masisina mbuɗ taɓ masira duk tasira ki va ma daŋŋa ka ko suuna lira na oloɗi.

²⁷ Suu njufina lay hin dla mayra taɓ u boyoginara ki tani lini u min masira cora duk tasiya, gak gak suu njufina mbuɗ buu u tasira njufina, hu viɗta asi viɗ ki ndaɗta asi hin mba fi daŋgayna kay coosira.

²⁸ Asi ŋgel humusi ki kay min wi gasira vi Lonaraɗi. Ni nam Lona hinisi buɗi hu yal masi ma viɗ kina, dla mayra ka gin a liɗira asi mbuɗ laɗu.

²⁹ Asi hoɓi u dlara dadamba, dla cora, halla hal tlena, huu ma cona, honira, ci maɗna, hoo vunna, ganyamba, mbaɗ vun ndarayasina u cora hu dlara dadamba ŋgolo.

³⁰ Asi di dla cora kay tasiya, asi ni suu gonokka u Lona, asi ka li zolo kay saɗi, asi ni suu ŋga tasina, asi tli yasi koloo, asi ni suu hal dla cora ka hum u somoyosiɗina.

³¹ Asi ni suu bay saara ka li u va ma asi dammaɗi, hurusi co ɦay ka wi hahaw saɗi.

³² Asi kay tasira wi ɓak ma vi Lonna ki jiviya, suu li ko ndaɗta na na hin fi miɗna, asi wi ki masi na lay yasi gak li dla mayra ndaɗta, asi taɓ vunusi u suu li dlara ndaɗta lay.