NEHEMI 9 - Boy Lonana

Cenda duk suuna a hom ki kay sulukŋara

¹ Hu buu ma dok-mba' yam fiɗina hu til ma wanna goryoŋ Israelna cuk baraw bolna tasi may, ko ndaŋgara kasi may, tok tasi a li laara.

² Suu hu njaf ma Israelna ɓorow dukusi ki u suu koyogina, lak kaŋga a hom ki kay coosira u suluk ma vi somoyosina.

³ Asi col kolo hu liisina hin ndum magaara gaɗta yow nus buuna ki duk fiɗi, gaɗta vi Yawe Loosinara, hu nus buu ma ki duk ɓorowi duk fiɗi ma hiŋŋa asi hom ki may hin goɓ kaŋga fok Yawe Loosina.

⁴ Yesua col ki hu li ma vi suu Levina ko tasi u Bani, Kadmiyel, Sebaniya, Buni, Serebiya, Bani, Kenani, asi yi Yawe, Loosina, ha kolo u delesi eŋga.

⁵ Suu Levina, Yesua, Kadmiyel, Bani, Hasabneya, Serebiya, Hodiya, Sebaniya, Petahiya di ana, «Yowogi kolo gagi deɓpa maŋ Yawe, Loogina, ma ay hu fokka day a fafaɗtana. «Ko asi geleɗeŋ seŋ ma bibiŋilna, ma su ki kay ŋgara u geleɗta halaŋŋa.

⁶ «Aŋŋi Yawe dew u dew taŋga. Aŋŋi sa li huulona ma kolo huulonana u asgaa mamsina halaŋ, ndaŋgara u tlesuu kaɗna halaŋ, lum ma ŋgolna u tlesuu hurumma bel. Aŋŋi sa ma ɦasi iirira hurusi halaŋŋa, asgari suu huulonana goɓmi kaŋga fokoŋu.

⁷ Aŋŋi Yawe Lo ma ŋgaɓ Abram, kalam ay ki hu Ur ta vi suu Kaldenara hin tinim sem ki ana Abrahamma.

⁸ Aŋ fam iriŋ ɗegee hin vi galamba a ɦam mbassa vi suu Kanaanna, suu Hitna, suu Amorna, suu Perizna, suu Jebusna, suu Girgasna a ɦaɗ ki maŋ njafamba. Aŋ li ko aŋ ɓak ki u vunuŋu kay aŋ ɗegeere.

⁹ «Aŋ wi dlara zolona vi somoyomi ay hu Egipte. Aŋ humusi tii masina fun Lum ma ŋgol ma Cerewna.

¹⁰ Aŋ li dlara, tak dlara mbuɗ mbuɗta eg Faraw, eg suu mam suu li sunda, eg suu hu mbas mambana halaŋ kay aŋ wi ana u ŋga ta masira asi lasasiya, aŋ yi semma kaŋŋi ko ma wam karamma na.

¹¹ Aŋ ɓorow ii mbo lum ma ŋgolna ki fokosi duk mba' asi ɗiŋ ki bay sesi laɓ duk mbo lum ma ŋgolna. Suu dikisi usina aŋ selesi ki hu gaalina ko ndal gogoyra lagaɗ kaŋga duk mbo ɓaɗ ɦaynara na.

¹² Aŋ tuɗ fokosi faali duk ɗugulla, aŋ tuɗ fokosi njeŋge duk kura a ɓoosi huu voɗta asi tuɗ huruɗta kira.

¹³ Aŋ cuk seŋ ay ki kaŋga kay ɦinira Sinayra. Aŋ ɓakasi ay kolo hu huulona, aŋ ɦasi haɗta ɗegeera aya, gaɗta gasira, ɓiirisi boyna ay u dikira jivira.

¹⁴ Aŋ takasi buu maŋ ma teteɗna kiyo. Aŋ ɦasi dikira, ɓiirisi boyna u gaɗta ay ko Moiz saaŋ ma sunda.

¹⁵ Aŋ ɦasi a tiisina ni mappa ma ay kolo huulonana. Aŋ ɦasi a asi ci kay laa masira ni yo ma ɓaɗ ay ki duk ɦinirana. Aŋ dasi ana asi mbay tli mbas mayra aŋ tli koŋ ki kolo suu taŋ ki kaɗ ana aŋ ɦasirara.

¹⁶ «Na may asi u somoyomi ŋga tasiya, so delesi ki eŋga ŋgiriŋ ŋgiriŋ humuŋ gaɗ maŋga kaɗi.

¹⁷ Asi min ka humbi. Humusi gasi ka kay dlara mbuɗ mbuɗ ta aŋ laɗ egesiraɗi. Asi tin saarasi ni a hoŋ hu liisi ma mbaɓura. May aŋ taŋga, aŋŋi Lo ma ɦal heɓpa, jekjeke lay, oo coco lay, ka ɓeŋ huruŋ zakgi lay, ɗegee coco lay, aŋ noyosi ka kiɗi.

¹⁸ Hu li ma asi yoo goo mbutl ma u lorra lay hin di ana, Gola ni Looŋ ma kalaŋ ay ki hu Egiptena. Asi li suluk ma ŋgolona egeŋ cocoo.

¹⁹ Aŋ u oo maŋga ŋgolla, aŋ noyosi ka ki hu fullaɗi. Ɗugulla hinisi ka ki faaliɗi takasi voɗta, kura huɗ ka kiɗi lay a ɓoosi huu voɗta ki a asi tuɗ njeŋgera.

²⁰ Aŋ ɦasi saa maŋga jivira a asi ɓorow ii tlena kira. Aŋ doorosi fu man maŋŋa ka ki funusiɗi. Aŋ ɦasi yona a asi ci kay laa masira.

²¹ Aŋ golosi ay hu fulla basara na dok-fiɗi va kaɗak ka kasiɗi. Barawi masisina ɓeŋ ka kiɗi lay, sesi bal kaɗi lay.

²² Aŋ ɦasi mulina u suuna kiyo. Aŋ ɓorowosi ndaŋgara ii hakarara ki kosiya. Asi hin tli mbassa Sihonda kiyo. Ni mbassa vi mul ma Hesbonnara. Ni mbassa vi Og, mul ma Basannara.

²³ Aŋ zulusi goryosi ko ndal ciciwra kolo huulonara na. Aŋ tinisi ki hu mbassa aŋ di ki maŋ somoyosi ka ana asi tuɗ kak huwara.

²⁴ Goryosi hin kal hu mbas ndaɗta hin kak huwa. Aŋ homosi suu Kanaan suu hu mbas ndaɗtana ki fokosiya. Aŋ ɦasisina ki kosiya, muli masisina u suu masi suu hu mbassana a li dlara hurusi miniɗta.

²⁵ Asi tli ɦoŋzi ma saɓakŋa ɦayna u ndaŋgara mbii cocora kiyo. Asi yow zigini suu tlesuu jivina hurusina ki zeɗ zeɗ bel, goloŋga asi gaɗta, sene gugutlura, ŋgusu conora, ŋgusugi suu vuɗta bolow coco may. Asi tiya hoɓ kiyo, asi ɗoo ki kak u furira ni u jivi maŋga ŋgolla.

²⁶ «Na may asi mbuɗ ki honira, li yara u aŋu. Asi noyoŋ gaɗ maŋga ki ŋgoorosi dagan na day, asi ci suu jokoŋ vunuŋ kina, suu neesi ana asi hoŋ egeŋuna kiyo. Asi li suluk ma ŋgolona egeŋ cocoo.

²⁷ Na ɗaŋŋi aŋ hin hinisi ki ko suu babali masisina asi duurusiya. Hu li ma asi mbuɗ ki hahawra ni asi yaŋ ay kolo u delesi eŋga, aŋ may ni ay kolo huulona day ni aŋ humma. U oo maŋga ŋgolla aŋ buɗusi ki ko suu babali masisina.

²⁸ Na may hu li ma asi fi koɗ tara fi ni, asi gijaŋ li dla cora fokoŋ olo. Aŋ hinisi ki ko suu babali masisina, asi lasasiya. Asi hoŋ yaŋ ay kolo u delesi eŋga olo. Aŋ ay kolo huulona day ni aŋ humma. Aŋ buɗusi ki ko dlara nara bolow coco u oo maŋga.

²⁹ Aŋ neesi ana asi hoŋ ay eg gaɗ maŋga lay ni. Asi u yasira eŋga li ni dlaasira, ka hum u gaɗ maŋgaɗi. Asi li sulukŋa eg gaɗ maŋga, sana ndak a li uɗ hin kak iirira. Asi yow jiirisiki kolo na heeŋ, so delesi ki may, ka min humbi.

³⁰ «Aŋ siɓ u asi basara bolowo. Aŋ neesi ki u saa maŋga ki fun suu maŋ suu jok vun Lona lay. May asi tin humusi kaɗi. Na ɗaŋŋi aŋ ɦasi ki ko suu hu mbassa daŋgana.

³¹ U oo maŋga ŋgolla aŋ hin ka a casi kiɗi. Aŋ noyosi ka kiɗi lay kay aŋŋi Lo ma irim ka tini na ŋgem ma oo cocona.

³² «Cecem wanda Loomina, Lo ma ŋgolna, ma saɓak ma suuna lam ndaaramma, ma tuɗ u galamba fok u ɗegeerana, aŋ gol dlara mba egemira iriŋ ko dlara goora naɗi, eg muli mamisina lay, eg suu malayaŋ ziimina lay, eg muli mami suu li ɓivunna lay, eg suu mami suu jok vunnana lay, eg somoyomi lay, eg suu maŋsina halaŋ col ay eg muli suu Asirina day ta ta karami.

³³ Aŋ taŋga jivi su dlara li egemira halaŋ kay ana aŋ li dlara ni u gasira, may ami tamira li dlara ni u hurumi ma sulukŋa.

³⁴ Kay muli mamisina, malayaŋ ziimina, muli mami suu li ɓivunna u somoyomi may, ni asi takaŋ gaɗ maŋga ka ki kiɗikgi, tin humusi ka humuŋ gaɗ maŋgaɗi, ka kay nera aŋ neesi yasi tew tewraɗi.

³⁵ Asi may hu tira ti mulla u fira fi begera aŋ ɦasirara, hu mbassa ŋgol coco, mbii ɦay, ta aŋ ɦasira tinisira fokosira, asi laŋ sunda kaɗi lay, hin dlaasira cora ka kiɗi lay.

³⁶ Gola karam wanni ami mbuɗ ki suu mbaɓura, ki hu mbassa aŋ ɦaɗ ki maŋ somoyomi a taɗ vuɗuɗ u begera huruɗta, gola ami mbuɗ ki suu mbaɓura wa.

³⁷ Vuɗ tlesuu ŋgol coco asina ki ni maŋ muli suu aŋ tinisi kamina, ni kay suluk mamina. Asi ti mulla kay tamira lay kay yoori mamisina lay ko hurusi minda na, ami tamira ki ni hu hahawra ŋgolla.»