NEHEMI 8 - Boy Lonana

Ezdra ndum gaɗta ki duk suuna

¹ Suuna halaŋ ko ndal sa ma dewna na tok tasi hu li ma fun grek ma Yona. Asi di Ezdra, mul ma li ɓivunna sa ma wi magaara gaɗta, ana nam tli magaara gaɗta vi Moiz ta Yawe ɓiiriɗ maŋ su Israelnara aya.

² Mul ma li ɓivunna Ezdra tli magaara gaɗta ay ki fok njufiina, hu li ma suuna ka huna, boyogina u suu ki ndaki a wi dlara humuɗ layna. Ni hu buu ma jewna hu til ma kiɗisiyana.

³ Nam ndum magaara ki hu li ma vun grek ma Yonana, col ay ŋgarpiira day ta ta ɓorow buuna ki duku, fok njufiina, boyogiina u suu ndaki a wi dlarana. Suuna halaŋ humusi tinira na tin a hum gaɗta ndumuɗta.

⁴ Sa ma wi magaara, Ezdra, ki coli kolo kay guna ko li ma mbuyna na ma minim kay dlara ko ndaɗta nara, suu keŋem colina ni ugi Matatiya, Sema, Anaya, Uriya, Hilkiya, Maseya kay bikim ma njuffa, kay bikim ma gulna ni Pedaya, Misael, Malkiya, Hasum, Hasbadana, Zakari, Mekulam.

⁵ Ezdra mal hu magaara ki ni ii suuna halaŋ kay ana nam ki ni kolo kay suuna halaŋ. Hu li ma nam malaɗ kina ni suuna halaŋ col ki koloo.

⁶ Ezdra gi deɓ Yawe, Lo ma ŋgolna. Suuna halaŋ hoŋ dira ana, «Amin, Amin» yow kosi koloo. Asi hin cok yasi kaŋga goɓ kaŋga fok Yawe, vogosi kay ndaŋgara.

⁷ Yesua, Bani, Serebiya, Yamin, Akub, Sabetay, Hodiya, Maseya, Kelita, Azariya, Yozabad, Hanan, Pelaya, suu Levina buɗ u magaara gaɗta ki maŋ suuna, suuna hin colira hu li namma u sesiya.

⁸ Asi ndum ay hu magaara gaɗta vi Lonara ki na vala vala a suuna hum ki jivira, buɗ u tlesuu ndumusina ki maŋ suuna jivi may.

⁹ Na ɗaŋŋi Nehemi, mul ma ŋgolna, Ezdra, mul ma li ɓivun ma wi magaara gaɗta, u suu Levi suu buɗ u dlara ki suunana di suuna halaŋ ana, «Buu ma wanna hinim ki ni maŋ Yawe, Loogina. Lagi doonaɗi, tiirigiɗi.» Kay ana suuna hum boy ma hu magaara gaɗtana na ni, tii gaw gaw.

¹⁰ Nam dasi ana, «Tuɗugi tagi ti ma jivina, cagi tlesuu cira suu jivina, ɦagi maŋ sa ma min tam ka u vaɗina nde nde may kay buu namma hinim ki ni maŋ Bu Suuna. Mbuɗugi tagi hahawraɗi kay ana furira vi Yawera ni saɓak magina.»

¹¹ Suu Levina heɓ huu suuna halaŋ dasi ana, «Seŋegi tagiya kay ana buu namma ki ŋgaɓiya. Mbuɗugi tagi hahawraɗi.»

¹² Na ɗaŋŋi suuna halaŋ tuɗ ti may, ci may, yow ma asi hinimma ay may a li furira kay ana asi hum u boy ma asi buɗusina kina kiyo.

Luu ma lam kay mbutluɓmana

¹³ Hu buu ma mbana ni suu malayaŋ zina halaŋ, muli suu li ɓivunna u suu Levina tok tasi ay eg sa ma wi magaara, Ezdra, a hum u boy ma hu magaara gaɗtana ki jivira.

¹⁴ Asi fi ɓiiri hu magaara gaɗ ta Yawe ɓiiriɗ jokoɗ ay ki maŋ Moiz ana goryoŋ Israelna kak hu mbutluɓma hu buu ma luu ma hu til ma kiɗisiyana.

¹⁵ Asi ndak a wi u boy namma hin jokom ki maŋ suu hu ɦoŋzinana halaŋ halaŋ, ki hu Yerusalem ko wanda na ana, «Tuɗugi ha kolo kay ɦinira hoŋogi ay u hum conora koogiya, hum conora bagira, u hum gu mirtena, hum bowra, hum ŋgusugi suu ɗufi kutluɓ kutluɓma a min mbutluɓma ko ki ɓiirira na.»

¹⁶ Na ɗaŋŋi suuna sel ki hal tlesuu min mbutluɓma gegelay kay yam ziimba, hu taraŋ masira, hu taraŋ Ziŋ Lonara, kay li ma vun grek ma Yona lay, kay vun grek ma vi Efrayimma lay.

¹⁷ Suu tokina halaŋ, suu hoŋ ay ki hu mbaɓurana, min mbutluɓma hin kak hurumu. Doli ɗini ay hu cokira vi Josuwe ma goŋ Nunnara ta ta karammi goryoŋ Israelna li dla ndaɗta kaɗi. Ni furira ŋgolla.

¹⁸ Asi ndum hu magaara gaɗta vi Lonara buuna tew tew, col ha kay buu ma jewna ta ta daɓ ki kay buu ma daganna. Luuna li buuna kiɗisiya, hu buu ma kalavandina ko u gaɗtara na ni, asi li tok mayra daɓ daganda.