NEHEMI 6 - Boy Lonana

Suu babalira hoŋ ay olo

¹ Hu li ma suu Sanbalatna, suu Tobiyana, suu Gusemma Arabma u suu babali mami suu usi hinna hum ana an hoŋ gulumunna ki kolo minda wa, ɦoloɗ hin ka oloɗi ni, hu li namma an gi cokorom ka fun tuɗi lay.

² Suu hu Sanbalatna u suu hu Gusemma sun ay egen di ana, «Mbay vaygi vunuygi hu Kefirim hu ɦuɗugumba Onora.» Asi tin saarasi ni a lan dla cora egenda.

³ An sunusi suu vun sunda ha egesi dasi ana, «Dlara an laɗta ni sunda ŋgolla an hin ka hoŋ haɗi. Sunda hin seŋ ki duk hu li ma an hin hoŋ ha egegina ni kay mege?»

⁴ Asi dok vun sunda ay egen yasi na fiɗi. An hoŋosi ha ni dira dewra.

⁵ A yamba vadlla ni vun sunda dew ndaɗta olo, Sanbalat sunun saam ma sunda ay u magaara vunuɗ ki ɦoŋga.

⁶ Ay ɓiiri huruɗ ana, «An hum suuna ɓak duk tasiya, Gasmu hin di ana, aŋ u suu Juifna saa magira ana agi min li yara ni, kay ndaɗta aŋ min gulumunna ni a mbuɗ ki mul masina ko suuna dira na.

⁷ Aŋ cuk suu jok vun Lona ki kaŋga hu Yerusalem a ɓak ki kay dlaaŋgara. Mul maa ka hu Yuda dew. Cecem wanda ɗaŋŋi hin jok boy namma maŋ mulna ko dira na. Mbay cecemi gaw, vaygi vunuygiya.»

⁸ An sun ha egem dam ɗaŋŋi ana, «Va ma taɓ tam u boy ma aŋ damma ka na ndeɗi lay. Aŋ hal boy namma ay ni u yaŋu.»

⁹ Asi halaŋ gasi daŋ may ni hal a mbuɗumi ki ndaana di ana, «Kosi hin cukki eg sunda, ndaɗ hin ka tuɗ fok oloɗi.» Cecem wanda ɗaŋŋi mbuɗun kon saɓakŋa.

¹⁰ An tuɗ hu ziŋ Semayana, ma goŋ Delayana, goŋ Metabelna kay nam doo kay suuna. Nam di ana, «Ŋgafaygi hu Ziŋ Lonara, hu zira gagayra, dukuygi vun zira kay asi hin mbay caŋ kiyo. Asi hin mbay caŋ ki ni njeŋgee.»

¹¹ An hoŋ dira ana, «Sa ma ko an nana ndak a ŋgay su? Sa ma ko an na ma hin kal hu Ziŋ Lonara hin kak iirina ni gege? An hin ka kal huɗi.»

¹² An wi ki hu li namma gasi daŋ may ana Lona sunum ay ka ni nambi, kay ana nam ɓak boyna ki kanu. Tobiya u Sanbalat warakammi warakiya.

¹³ Asi warakammi kay mege? A mbuɗun ki ndaana, a an li ko nam dira na, hin li sulukŋara. Asi hal ginni yal ma ɓakan dla cora kan a mbuɗun sa ma pan suunana.

¹⁴ Loonna humuŋ gaŋ kay Tobiya u Sanbalat kay dlara asi laɗta, kay Noadiya, cara jok vun Lona u suu jok vun Lona suu daŋ suu hal a mbuɗun ndaanana.

¹⁵ Sun gulumunna daɓ ki hu buu ma dok-mba yam vadlna hu til ma yam ana Elulna hu buu ma dok-vadl yam mbana.

¹⁶ Hu li ma suu babali mamisina hum na ni, suu hu ɦoŋzi ma ŋguy kamina halaŋ mbuɗ ki ndaana, mbuɗ ki zolona ii tasi gaw. Asi wi ki kasi ana sun ndaɗta laɗ ni u minda vi Loominara.

¹⁷ Ni hu coki ndaɗta lay suu ɓii magaara vi Yudana ɓii magaara maŋ Tobiya bolow cocoo, ta vi Tobiyara mbay fasi may.

¹⁸ Kay suu hu Yudana bolow coco ki njuni ummi u suura kay ana nammi kunuŋ Sekaniyana, goŋ Arana, goromma Yohana ɗum goŋ Mesulam ma goŋ Berekiyana.

¹⁹ Asi geleɗem ay ni irin lay, jokom boy manna ha ki lay. Tobiya sun magaara ay ni kay a mbuɗun ndaana.