NEHEMI 5 - Boy Lonana

Nehemi daɓ dla cora duk ɦoŋ suunara kiyo

¹ Na ɗaŋŋi yoo tara ŋgolla col ay ko suuna, ko boyogosi duk ɦoŋ tasi u gorsesi suu Juifna.

² Suu ɦiw di ana, «Goryomi suu njufiina, goryomi suu gorɓiina u tamira lay, ami bolow cocoo. Ami min hal wa blena a ti may, hin kak iiri mayra.»

³ Suu hiŋŋa di ana, «Sene mamina, gugutlu mamira u ziimi lay, ami deŋesi ki a fi wa blena hu li ma mayra cina.»

⁴ Suu hiŋŋa olo di ana, «Ami yow ki u gursu taara vi mulnara kay sene mamina u gugutlu mamira.

⁵ Doli ɗini mbalatami ni ko mbalata gorsemina na lay, goryomi mbalatasi ni ko goryosi na lay. Ko ndaɗta na ɗaŋŋi ami ndak a ɦal goryomi ki a li sunda mbaɓura, gorɓii mami suu ɦiw li sun ndaɗta ki wa lay, ami ka ndak a li vaɗi. Sene mamina u gugutlu mamira ki ni maŋ suu daŋŋa.»

⁶ Hurun mbuɗ ki yara ŋgol coco hu li ma an hum yoo ta masira u boy ma ko namma nana.

⁷ Saara mba hurun a hal voɗta yal suu ɓii magaara, suu kaɓakŋa. An hin dasi ana, «Ni dlara nekka agi tlaɗ kay suu wanna u suu hiŋŋara.» Olo, an hin yasi hu tokka ŋgolla.

⁸ An dasi ana, «Ami u tamira hoŋ gorsemi suu Juif suu gususi ha ki ko suunana ay ki gussa u saɓakami halaŋ. Na may ni agi tagira agi gusugi gorsegina kiyo. Agi gususi ki ni komi ami gaw may.» Asi seŋ vunusi na selewen ka fi va ma hoŋ dira oloɗi.

⁹ An hin di ana, «Dlara agi laɗta ka jiviɗi. Agi tuɗ ni ka u ndaa ma lam u Lonanaɗi su? A doo zolo ma vi suu babali maygisinana kiraɗi su?

¹⁰ An tanda lay, gorsenna u suu man suu li sunda lay ami ndasi gursuna u wa blena kasiya. Ami hin hinisi bal namma kiyo.

¹¹ Agi hoŋosi sene masina u gugutlu masira, ŋgusu cono masira u ziisi ki karam gaw u gursuna, wa blena, sum veŋ ma wilina u mbulna suu agi ɦasisina kasi balnana.»

¹² Asi di ana, «Ami hin hoŋosisina, hin ka joɓosi vaɗi. Ami hin li ko aŋ dira na.» An yi muli suu li ɓivunna ay hin suu suuna ki a asi li ko dira na.

¹³ An hin ɗoɓ koɓoɗ manda liiɗ ma homina ki hin di ana, «Ni ko ndaɗta na Lona hin kizik sa ma vam boy mamma kaɗina ki eg ziim day lay, eg tlegeyem day lay. Sa namma hin kizikim ki ni ko ndaɗta na ka hinim va kombi.» Suu tokina halaŋ di ana, «Amin» hin geleɗ Yawe. Suuna hin li dlara daɗ kira.

¹⁴ Col ay u buu ma asi han voɗta a an li a mul ŋgol ma hu mbassa Yudara gaw ni, ay hu basara dok-mbara ta ta hu basara dok-hindi yam mbara vi mulna Artazerzessa, tew basara doogo yam mba' ni an u gorsenna ami ti fu ma vi mul ma ŋgolnana kaɗi.

¹⁵ Ki fokon jew ni, muli suu ŋgolo suu jewna ci suuna kiyo, yowosi mappana u sum veŋŋa ki kosiya, yowosi nus kelew doonona ki kosi dok-fiɗi olo. Suu masi suu li sunda lay las suuna coco lay. An tanda may ni an li ka naɗi, kay an li ndaa Lona.

¹⁶ An vi tanni fun sun gulumunna. Ami hin gus sene kaɗi. Suu man suu li sunda halaŋ ki toki ni tani a li sunda.

¹⁷ Suu Juifna u suu kaɓak suu fun tabul mandana ndumusi halaŋŋi suuna kis duk dok-vadl u suu mbay egemi col ay hu ɦoŋzi ma ŋguy kaminana.

¹⁸ Tlesuu lasi hu buuna tew tewna ni mbutl dew, timigii suu jivina karkiya, tlekenina may, lasi ni manu. Hu buu ma doogona halaŋŋi sum veŋŋa ŋgol cocoo. Na lay ni an joɓ mappa ma vi mul ma ŋgolnana kaɗi, kay ana sunda nekka kay suu asina ɦay.

¹⁹ Loonna, humuŋ gaŋ ay kay jivira an laɗ kay suu asinara. Ko aŋ lan jivira na may.