NEHEMI 4 - Boy Lonana

¹ Hu li ma Sanbalat, Tobiya, suu Arabma, suu Amonna, suu Asdodna hum ana minda min gulumun ma Yerusalemma ka tuɗ foko, ii kom ma ɓow kina ka dukgi koloo, ni yaasira mbuɗ ŋgolla, su olo.

² Asi yow tasi ay a duu u Yerusalem a ɓeŋeɗ tlegeyeɗ kira.

³ Na ɗaŋŋi ami cen Loomina. Ami hin hal li ma gol u lina hurum faali may, njeŋge may na kiyo, ni kasi asi lay, egesi asi lay.

⁴ May Yuda di ana, «Saɓak ma vi sa li sunda daɓ ki wa, gugumma ka cocoo. Aygi hin ka ndak a min gulumunnaɗi.»

⁵ Suu babali maygisina di ana, «Asi hin ka humbi lay, ka wi vaɗi lay hu li ma aygi hin tew ha ki dukusina. Na ɗaŋŋi aygi hin casi ki lay, hin doo suunda ki lay.»

Nehemi ɦal ɓagina ko suu li sunda

⁶ Suu Juif suu cuki egesina hu li ma asi ka mbayna ni, asi dami ko va ma yasi doogo na, «Asi ki kaki ni hu li ma agi hoŋ ay huna halaŋ.»

⁷ Na ɗaŋŋi an min lina kaŋga u gulumunna a fi saɓakŋara. An njaa suuna ki ni u deeresiya deeresiya, u ŋgewina, saɓina u gu mbuurura kosiya.

⁸ An gol lina ki na halaŋŋi. An hin col ki kolo di suu ɓii magaara, suu kaɓakŋa, suu hiŋŋa lay ana, «Lagi ndaa kosiɗi. Humugi gagi kay Bu Suuna ma ŋgol ma dlam cona, duurugi kay gorsegina, kay goryogi suu njufiina u suu gorɓiina, kay boyogogiya, kay ziigiya.»

⁹ Hu li ma suu babali maygisina hum ana aygi ki neeya, Lona hin ɓeŋesi dlaasira asi min tasi kaɗta ki wa ni, aygi halaŋ hoŋ ay hu gulumunna, gegelay ni fun sun mamba.

¹⁰ Na may col ay hu buu namma day ni nus suu man suu li sunda ka laɗu, nus suu hiŋŋa u saɓina kosi may, mbarina may, gu mbuurura may, koroŋŋa may. Mulina njaa ki ŋgoo zi ma vi Yudana.

¹¹ Suu min gulumunna na, suu zii tlena yowosi kolona li sunda ni u kosi ma dewna, kosi ma hiŋŋa ɓagina hurum may.

¹² Kay suu minda ni, gegelay minni ŋgew mamma njuni u furumu. Sa ma bu tokolomba ni kaki egen may.

¹³ An di suu ɓii magaara, suu kaɓakŋa, u suu hiŋŋa ana, «Sun ndaɗta jiviya, ŋgol coco lay. Ami ki njayra kay gulumunna duk ɦoŋomi ki eg tami na day day.

¹⁴ Hu li ma agi hum del tokolomma wa ni, tokogi tagi ay egen tani. Looygina hin duu kaygiya.»

¹⁵ Ami lami sunda. Nus suu dukumina u saɓina kosi col ay ŋgarapira day ta ta ciciwra gijaŋŋa tak taɗ kiyo.

¹⁶ An di suuna ni hu li namma lay ana, «Gegelay u saam ma sunda buu njeŋge ni hu Yerusalem, njeŋge wanni goloygi u zina, faali wanni laygi sunda may.»

¹⁷ Sa kaɗi, an tandaɗi lay, gorsennaɗi lay, suu man suu li sundaɗi lay, suu gol u zina suu tuɗ kay cerennaɗi lay, dukumi ni sa dew lay ni ka col hin barawi mamsina kiɗi. Gegelay ni u ɓagi mamma hu kom ma njufna.