NEHEMI 3 - Boy Lonana

Suu Juifna hoŋ gulumun ma Yerusalemma minda

¹ Eliyasib, mul ŋgol ma li ɓivunna col kolo ko tam u gorsem muli suu li ɓivunna. Asi hin min vun grek ma Timigiinana. Asi paɗ vunusi ki kam hin ɓalam cogoromma funumu, ta ta tew ki eg zira fiyekka Kisnara olo. Asi paɗ vunusi ki kay gulumunna ta ta tew ha ki eg zira fiyekka vi Hananella.

² Keŋesi na ni suu Yerikona ka min may, keŋ na ni Zakur ma goŋ Imrina ka min may.

³ Goryoŋ Ha-Senaana ni suu min vun grek ma Kulufna. Asi cukum guna kolo kam hin gam cogoromma funum u erje ma dukum una may.

⁴ Keŋesi na ni Meremot ma goŋ Uriyana, goŋ Hakosna ka li sunda may. Keŋ na ni Mesulam ma goŋ Berekiyana, goŋ Mesezabelna ka li sunda may. Keŋem na ni Sadok ma goŋ Baana ka li sunda may.

⁵ Keŋesi na ni suu Tekoana ka li sunda may. Suu masi suu ɓii magaara ka min a gi yasi kaŋga li sunda u malyasinaɗi.

⁶ Yoyada ma goŋ Paseana u Masullam ma goŋ Besodiyana ka li sunda hu vun grek ma Yesana. Asi ni suu cukum guna kam may, gam cogoromma funum u erje ma dukum una mayna.

⁷ Keŋesi na ni Melatiya ma Gabaonna u Yadon ma Meronotna ka li sunda. Asi ni suu Gabaon u Mispa suu tok eg ziŋ mul ŋgol ma zi ma ŋgoo lumma Efratana.

⁸ Keŋem na ni Uziyel ma goŋ Haraya ma yoo tusuna ka li sunda. Keŋem na ni Hananiya ma ɗus tlesuu his jivina ka li sunda. Asi col ay ni Yerusalem hu li ma asi tew ay ki hu bubu gulumunnana.

⁹ Keŋesi na ni Refaya ma goŋ Hurna ka li sunda. Nammi mulna kay ii nus ko ma Yerusalem ma dew.

¹⁰ Keŋesi na ni Yedaya ma goŋ Harumafna ka li sunda vok ziimba. Keŋem na ni Hatus ma goŋ Hasabneyana ka li sunda may.

¹¹ Malkiya ma goŋ Harimma li sunda ko tasi u Hakub ma goŋ Pahat-Moabma ni ii ko ma daŋŋa, na may ni hu zira fiyekka Jojokka.

¹² Keŋem na ni Sallum ma goŋ Halahekŋa ka li sunda. Nammi mulna kay ii nus ko ma Yerusalem maa dew. Nam ko tam u goryom suu gorɓiina.

¹³ Hanun li sunda ni hu vun grek ma Ҥuɗugumbana ko tam u suu hu Zanoana. Asi ni suu minimma, gam cogoromma funum u erje ma dukum una mayna. Olo col ay eg gulumunna na ta ta tew ki eg vun grek ma Zirgiɗnana metre 500.

¹⁴ Malkiya ma goŋ Rekabma li sunda ni hu vun grek ma Zirgiɗna. Nammi mulna kay ii ko ma vi Bet-Kerem maa dew. Nammi sa minimma, hin gam cogoromma funum u erje ma dukum una mayna.

¹⁵ Sallum ma goŋ Kol-Hozena li sunda ni hu vun grek ma Goloŋga. Nammi mulna kay ii ko ma vi Mispana. Nammi sa minimma, malam yam ki lay, hin gam cogoromma funum u erje ma dukum una mayna. Gulumun ma fun hurgukka ma ɓaɗ tew ha ki hu li ma mulna vi sene ŋgusugina huna ta ta tew ha ki hu voɗta col ay hu Ҥoŋzi Davidna nara.

¹⁶ Nehemi ma goŋ Azbukŋa li sunda ŋgoorom dagani. Nammi mulna kay ii nus ko ma vi Bet-Sur maa dew ta ta tew ki fok us David, ta ta tew ki eg hurgukka asi gaɗ u kossira, ta ta tew ki eg ziŋ suu saɓak suu duunara.

¹⁷ Suu Levina suu li sunda ŋgorom daganna u Rehum ma goŋ Banina. Keŋem na ni Hasabiya li sunda hu ii ko mamma ni u tamba. Nammi mulna kay ii nus ko ma vi Keyilana.

¹⁸ Ŋgorom dagan gorsesina ugi Bavay ma goŋ Henadadna li sunda ni asiya. Nammi mulna kay ii nus ko ma vi Keilana.

¹⁹ Ezer ma goŋ Yesuana li sunda keŋemmi namu, mul ma Mispana. Ni hu ii ko ma a mbarana col ha kay li ma fun tam u li ma dli ɓagina huna ii gun gulumunna.

²⁰ Baruk ma goŋ Zabayna li sunda ŋgorom dagan saɓak coco hu keŋ ii li ma a mbarana col ha kay gun gulumunna na ta ta tew ha ki fun ziŋ Eliyasib, mul ŋgol ma li ɓivunnara.

²¹ Meremot ma goŋ Uriyana ma goŋ Hakosna li sunda ŋgorom dagan hu ii ko ma a mbarana col ha kay vun zira vi Eliyasib ta ta daɓaɗ kiyo.

²² Ŋgorom dagan wanni muli suu li ɓivunna ka li sunda huwa, ni suu mbay hu zi ma ŋguy Yerusalemma.

²³ Ŋgoo dagan wanni Benjamin li sunda hu ko tam u Hakub vok ziisina na gay. Ŋgoo dagan Azariya ma goŋ Maaseya, ma goŋ Ananiyana li sunda pay ziimba na tok.

²⁴ Ŋgorom dagan Benuy, ma goŋ Henadadna, li sunda hu ii nus ko ma dew, col ha kay ziŋ Azariyara na ta ta tew ki hu gun gulumunna.

²⁵ Olo, Palal ma goŋ Uzayna gijaŋ sunda ha hu gun gulumunna na, tew ha ki eg zira fiyekka, daɓ ha ki fun ziŋ mulnara tok eg huu taraŋga vi suu daŋgaynara. Ŋgorom dagan Pedaya ma goŋ Parokŋa li sunda huwa.

²⁶ Suu li sunda hu Ziŋ Lonara suu buu ŋgoo hu zi ma Ofelna li sunda ta ta fun vun grek ma Yona hurum u maɗiina eg zira fiyekka mini eg gulumunna may.

²⁷ Ŋgorom dagan suu Tekona li sunda hu ii nus ko ma a mbarana, col ay hu li ma fun tam u zira fiyekka bubu gulumunna ta ta tew eg gulumun ma hu ŋgo zi ma Ofelna.

²⁸ Col ay kay yam vun grek ma Kulumina na ni, muli suu li ɓivunna li sunda huwa, gegelay fun ziimba.

²⁹ Ŋgoo dagan Sadok ma goŋ Imerna li sunda fok ziimba na, ŋgorom dagan Semaya ma goŋ Sekaniya ma gol u vun grek ma u Maɗiina li sunda huwa.

³⁰ Ŋgorom dagan Hananiya ma goŋ Selemiyana li sunda ko tam u Hanun ma goŋ Salaf ma a karkiyarana hu ii nus ko ma a mbarana. Ŋgorom dagan Mekulum ma goŋ Berekiyana li sunda fun ziimba.

³¹ Ŋgorom dagan Malkiya ma yoo tlena li sunda ta ta tew ha ki eg zira vi suu li sunda hu Ziŋ Lonara u suu paara fun taɗ u vun grek ma Mifkadna na ta ta tew ha ki eg zira kolo ii gundara.

³² Duk ɦoŋ zira ŋgolla ii gundara u vun grek ma Timigiina na ni suu yoo tlena u suu paara li sunda huwa.

Suu babalira min a doo sunda duku

³³ Hu li ma Sanbalat hum ana ami ka min gulumunna ni nam mbuɗ ki yara, hurum ɓeŋ ki cocoo. Nam pan suu Juifna,

³⁴ hin ɓak ki fok gorsemma u suu Samari suu bolowna di ana, «Suu Juif suu saɓakasi kaɗi asina li ni mege? Na ni aygi hin hinisi asi li sun ndaɗta su? Na ni asi hin li ɓivunna ko su? Na ni asi hin daɓ sun ndaɗta ki karam ko su? Na ni asi ndak a mbuɗ gogoyra yowoɗ ay ki kaŋga duk gugum ndaŋgara ki iiri su, doli ɗini ndaɗ ki ni ŋgaliya?»

³⁵ Tobiya ma Amonna ay egem may, hin di ana, «Asi minna, ko bayakka ɗiŋ kolo kay gulumun namma hawaɗ yam gulumun ma gogoyra kiyo.»

³⁶ Ҥii, hum haa, aŋ, Loomina, kay ana ami ki lasiya. Hoŋosi ŋgul masira ni kasiya, ɦasi ki ko suu hu mbassa yowosi ki mbaɓurara panasi may.

³⁷ Ҥasi gira kay coosiraɗi. Ko suluk masina li ki bulumi fokoŋgi kay ana asi li sulukŋa eg suu min gulumunnana.

³⁸ Ami hin min gulumun namma ki ɗaŋ, gulumun namma hin minim ki ɓorow ki duk gaygay. Suuna vi tasi a minimba.