NEHEMI 2 - Boy Lonana

Nehemi fi voɗta a hoŋ Yerusalem

¹ Mba hu til ma yam ana Nisan hu basara vi Artazerzes ta dok-mba a mulnara, na ɗaŋŋi sum veŋŋa ka tini fokomu, an tli sum veŋŋa hin ɦam maŋ mulna. An tew tew ni ka mbuɗ ya fok mulnaɗi ni,

² Mulna dan ana, «Iriŋ mbuɗ hahawra ni kay mege? Aŋ ka tuguɗiiɗi su? Ni dlara daŋ ɗowba ka ni dlara hahawra hu sanara ɦawaɗi kalage?» Na ɗaŋŋi an mbuɗ ki ndaana ŋgol cocoo.

³ An di mulna ana, «Ko mulna kak iiri a fafaɗta. Irin hin mbuɗ ki hahawraɗi ni ɦoŋzi ma us somoyon ha huna asi toom ki may, ŋgal vun grekŋa ki may nige?»

⁴ Mulna dan ana, «Va ma aŋ halamma ni mege?» An cenni Lo ma kolo huulonana.

⁵ An di mulna olo ana, «Lini dla ndaɗta jiviya, lini saaŋ ma sunda iriŋ jiviya ni aŋ hin sunun hu Yuda ɗaŋ, hu ɦoŋzi ma us somoyon ha huna a an hoŋoɗ kolo minda.»

⁶ Mulna u caamba kaki egem dan ana, «Koy maŋga hin li buuna ni gage? Aŋ hin hoŋ ay ni saɓage?» Dla ndaɗta jivi ii mulna. Nam hin sunun ko ndaɗta na. An hin ŋgaam buuna may.

⁷ An di mulna olo ana, «Lini dla ndaɗta ii mulna jiviya ni asi ɦan magaara ay maŋ muli suu ŋgolo suu hu zi ma ŋgoo lumma Efratana a asi hinin voɗta an tuɗ tew ki hu Yuda.

⁸ Magaara maŋ Azaf may, asgaa ma vi mulna ma gol u gurana a nam ɦan guna a an hoŋ vun grek ma vi ɦoŋzi ma ŋgol ma tok eg Ziŋ Lonana u gulumun ma kay ɦoŋzinana lay kay zira an tuɗ huruɗta lay.» Mulna ɦan magaari asina kay ana Lona kom ma jivina ka kanu.

⁹ An tuɗ eg muli suu ŋgolo suu hu zi ma ŋgoo lumma Efratana. An hin ɦasi magaari suu mulna sunusisina hana. Mulna sun suu ŋgol asgaana u suu kulumina unu.

¹⁰ Sanbalat ma Horonna u Tobiya sa sunda ma Amonna hum boy namma na ni mbuɗ ki yara kay humba asi hum ana sana saa kay dlara jivi kay goryoŋ Israelnara.

Nehemi gol dla gulumunna

¹¹ An tew ki Yerusalem tew ni hin li buuna hu hindi.

¹² An col kolo njeŋge olo, an u suu un ɦiw, may an ɓak dlara Loonna danda hurun a laɗ kay Yerusalemba ka ki maŋ saɗi. Kulum ma ful kamma suu daŋ ay ka unɗi ni ma an ful ha kamma doy hol.

¹³ An kal ay ki hu vun grek ma Ҥuɗugumbana njeŋge tin irin ha fun goloŋga yaɗ ana Dragoŋ, vun grek ma Zirgiɗna huna. An gol dla gulumun ma Yerusalemma hin kolo ni gaɓalam ɦawana, ma kura ŋgalam vun grekem kina.

¹⁴ An tli voɗta hu vun grek ma Goloŋga, tuɗ fun mbo ma vi mulnana na, kulum ma an ay fuli kamma fi li ma kalla kaɗi olo.

¹⁵ Na ɗaŋŋi an hin ɗiŋ ki hu giriŋŋa njeŋge na a gol u dla gulumunna ki jivira. An hin hoŋ ay hu vun grek ma Ҥuɗugumbana na hin hoŋ ay kiyo.

¹⁶ Suu kaɓakŋa wi ka ana an ay ni taniraɗi lay, wi dlara an laɗta kaɗi lay ta ta cemi ni lay ni an di va ka maŋ suu Juifnaɗi lay, maŋ muli suu li ɓivunnaɗi lay, maŋ suu ɓii magaaraɗi lay, maŋ suu kaɓakŋaɗi lay, ka maŋ suu hin tasi kay sunda suu hiŋŋaɗi lay.

¹⁷ An dasi ɗaŋŋi ana, «Agi gologi dlara hahawra aygi ka dukuɗ wanda gige. Kay ana Yerusalem ki ɓeŋiya. Vun grek maɗna ki ŋgali lay. Tuɗuygi miniygi gulumun ma Yerusalemma, ka mbuɗuygi ki va ma zolonaɗi.»

¹⁸ An ɓakasi dla mayra ana Loonna kom ma jivina ka kanni ana megera kiyo, kom ma jivina li ay kanu, mulna ɓakanni ana megera. Asi di ɗaŋŋi ana, «Yowoygi kolo miniygina.» Asi van vunun u hurusi ma dewna a li sun ndaɗta kira.

¹⁹ Sanbalat ma Horonna, Tobiya sa sun ma Amonna u Gesem ma Arabma, hum boy namma na ni, san umi, panamiya. Asi di ana, «Agi hin a li ni me ɗaŋge? Agi lagi yara ni eg mulna su?»

²⁰ An hoŋosi dira, hin dasi ana, «Ni Lo ma kolo huulonana u tamba hin ɦami saɓakŋa mami ami suu mam suu sunda. Ami hin yowomi kolo hin minimina. Na may ɓorow ka kagiɗi lay, voɗ ka kagiɗi lay, va hin ɦagina hu Yerusalem kaɗi.»