NEHEMI 1 - Boy Lonana

¹ Boy ma vi Nehemi goŋ Hakaliyana. Tew ki hu basara dok-mbara hu til ma yam ana Kislewna ɗaŋŋi an ki kakira ni hu ɦoŋzi ma saɓak ma Suzna.

Nehemi hum boy ma ay Yerusalemma

² Hanani wayan maa dew mbay hu Yuda. Nam u suu um ɦiw, an hin joɓosi kay suu Juifna usira hinda, suu usi iiri duk suu yowosi ki mbaɓurana, kay Yerusalem may.

³ Asi dan ana, «Suu hin ay u suu yowosi ay ki mbaɓura hu ɦoŋzi ma baginana ni hu hahawra ŋgolla u zolona lay. Gulumun ma Yerusalemma gaɓalam hinni nam ɦawaa, vun grekŋa ki ŋgali halaŋ may.»

Nehemi cen kay suu Juifna

⁴ Hu li ma an hum boy namma na ni an kak kaŋga, tiira, li doona ii buuna bolowo. Olo an li laara cen Lo ma kolo huulonana.

⁵ An di ana, «Ha, Yawe, Lo ma kolo huulonana, Lo ma ŋgol ma suuna lam ndaaramma, ma vi galamba ɗegeera u suu minimma, li u gaɗ mamba mayna.

⁶ Ko humuŋ li tini ta, iriŋ li ki mali may a hum cenda vi saaŋ ma sundara. Hu li namma na ni an ka cen fokoŋ kay goryoŋ Israelna suu maŋsuu sunda ana, an hom ki ni kay suluk ma vi goryoŋ Israel ma ami lam egeŋŋa. An u suu vo vi bunna ami li suluku.

⁷ Gasi daŋ may ami li sulukŋa egeŋu. Ami li ka u gaɗ maŋga aŋ ɦaɗ maŋ saaŋ ma sunda Moizzaɗi lay.

⁸ Humuŋ gaŋ kay boy ma u gaɗ maŋga saaŋ ma sunda Moiz dam ana, Lini agi ka li ɗegeeɗi ni an hin njayagi ki duk suunana.

⁹ May lini agi hoŋ ay egen wa, li u gaɗ manda, vi uɗ may ni, li ni suu magi suu mbee kina li ha ni hu vun huulona ma dodona lay ni, an hin taɓasi kay tasi, hin hoŋosi ay hu li ma an ŋgaɓam a sen li ka huna.

¹⁰ Asi ni suu maŋ suu sunda, suu maŋsina, suu aŋ gususi u saɓak maŋ ma ŋgolna, u saɓak koŋu.

¹¹ Ha, Bu Suuna ko humuŋ li tini a hum cenda vi suu maŋ suu sunda suu ka u furira laŋ ndaaraŋŋa. Ҥal voɗta maŋ saaŋ ma sunda a fi u dlaamba karami, hinim nam fi heɓpa fok sa namma.» Na ɗaŋŋi anni sa ɦal tlesuu tira maŋ mulnana.