NDUMBA 5 - Boy Lonana

Dik suu cona kiyo

¹ Yawe di Moiz ana,

² «Di suu Israelna asi dik suu tuguɗii busuna lasina u suu tuguɗiira njenjera busuna ɓaɗ egesina u suu tin kosi ay eg suu miɗinana ki dukugiya.

³ Njufiina u boyogina halaŋ agi dikisi ki hu ɦoŋzi magina, ka asi mbuɗ ɦoŋzi ma vi suu Israelnana ki njenjeɗi, kay ni zi ma an ka kaki hurumma.»

⁴ Suu Israelna li ni na may, asi dik suu tuguɗiira njenje ndaɗta egesina ki dukusi halaŋ halaŋ. Suu Israelna li ni ko gaɗta Yawe daɗ ay maŋ Moizza na may.

Warakŋa kay cora sana laɗta

⁵ Yawe di Moiz ana,

⁶ «Aŋ di suu Israelna ana, Lini sa njufna ɗowba cara li cora wa eg Yawe, li dlara ka ii suuna halaŋ jiviɗira, sa namma ɓakŋa vam wa.

⁷ Nam mba gi u va ma nam tlamma kiyo, hoŋ va namma ki maŋ malamma, warak keŋ ma vadlna ha kayam u olo.

⁸ Lini malaŋ va ma nam tlamma ay varamma ka oloɗi ni, wayam ma egem tok kaɗi lay ni, ɦal va namma ha ki maŋ Yawe ni ana maŋ mul ma li ɓivunna, sa namma hin ɦal gamla timiina ay a li ɓivun ma min dukka may, kay ana mul ma li ɓivunna lam ɓivun ma bulum cora kina ki kamu.

⁹ «Keŋ tlesuu teteɗ may suu suu Israelna ɦasi ay a li ɓivunnana halaŋŋi maŋ mul ma li ɓivunna.

¹⁰ Tlesuu teteɗ suu vi sanana ni mamsina, tlesuu teteɗ suu sana ɦasi maŋ mul ma li ɓivunnana ni mamsina may.»

Gaɗta kay cara asi kaaɗ boy dla zoŋga egeɗta.

¹¹ Yawe di Moiz ana,

¹² «Ɓak suu Israelna dasi ana, Lini sana gol poyra vi caamba ka poy irim jiviɗi.

¹³ Nam goloɗ ko ndaɗ ka buu u sa ma daŋ ŋgay gumunu ni, nam njufuɗ ka wi u boy namma ki jivi tuɗi, sa vaɗ ay ka hu dla ndaɗta tuɗi may.

¹⁴ Lini sana hurum ki ɓeŋi kay dla ndaɗta, nam gol caamba tew tew ni ko ndaɗ ka irim ɗegeeɗi na, ɗowba hurum saa ko caamba li va ma co ka tuɗi na.

¹⁵ Sa namma mbaa caamba ay fok mul ma li ɓivunna, yow tlesuu ɦasi a li ɓivunna kaɗna ay kom may, yow fuɗta ay kelew hindi, nam ka vo mbul kay fuɗ ndaɗtaɗi, ka cuk mbitla his jivira dukgi lay, kay ana ni ɓivun ma ciwayra ka huna, ni ɓivun ma gi humba kay dla cora.

¹⁶ Mul ma li ɓivunna tay cara aya, mbaaraɗ ay fok Yawe.

¹⁷ Mul ma li ɓivunna vo yo ma teteɗna ay kom hu ŋgalna, nam yow ndaŋgara kalafi hu Ziŋ Lonara cukuɗ duk yo namma.

¹⁸ Mul ma li ɓivunna tuɗ cara ha fok Yawe fokoɗ tlesuu baari kay yaɗna kiyo, nam gaɗ tlesuu li ɓivunna hu duk koɗu, ni ana ɓivun ma kay huu ma ki ɓeŋina, mul ma li ɓivunna vi yo ma galakŋa kom may, ni yo ma gaɗ vunna u namma.

¹⁹ Mul ma li ɓivunna ɓi vunum ki fok cara di ana, Lini sa buu ka gasi u ndakgi ni, ndak li dlara co kaɗi, ganyam njufuk ka gasi u dlaɗi ni, ka dlara co li egekgi, yo ma galak ma kon wanna ka hin lak va egekgi may.

²⁰ Lini gasi ndak buu u sa ma daŋ wa, sa ma ka njufukgi, buu ay u ndak wa...

²¹ Mul ma li ɓivunna suu cara gaɗ vunna di ana, Ndak hin ni a cara Yawe colok ki a suuna njaɗ kay dlaakka tew tewra suura an suuruk wanda hin yowok pook kiyo, gisik hayak ki may.

²² Yo ma givun ma kon wanna hin kal huruku hin gisik hayak ki ni namu, sook pook ki may. Cara hoŋ dira ana, Amin, amin, ni na daŋ may.

²³ «Ŋgoo dagan mul ma li ɓivunna ɓii boy ma givun namma hu magaara, hin mbus ɓii ndaɗta vooɗ hu ŋgalna duk yo ma galaana.

²⁴ Mul ma li ɓivunna ɦal yo ma givun namma maŋ cara, yo namma kal huruɗ wa ni laɗ huruɗu, nam mbuɗ ha ki huruɗ kurufu galaari.

²⁵ Mul ma li ɓivunna vi tlesuu ko cara a li ɓivun ma givunna u asina. Nam mbaarasi fok Yawe u geŋeɗta geŋeɗ tamba.

²⁶ Mul ma li ɓivunna yow fuɗta duk kom dew tuɗ ŋgalaɗ hu givin ma togolla, ŋgoo dagan nam ɦal yo ma galaana maŋ cara.

²⁷ Hu li ma nam ɦaɗ yo ma galaa namma wa ni, dlara hin li egeɗ ni ko wanda na, lini ndaɗ ɓeŋ taɗ ay gasi ka ɗegee eg njufuɗɗi, yo ma givun namma kal ha huruɗ ni mbuɗ ki galaari, hayaɗ hin gis ki may, pooɗ so ki may. Ca ndaɗta hin duk suu maɗsina ni a cara asi tak dla cora ki u ndaɗta.

²⁸ Lini ca ndaɗta li dla ka kay njufuɗɗi, ndaɗ ka ɗegee tew tewe ni, va hin ka laɗɗi, ndaɗ hin vuɗ gorra lay.»

²⁹ Gola ni gaɗta kay cara ka ɗegee ii njufuɗɗira, ca mayra poy poyra cora, ta li ii njufuɗta.

³⁰ Ɗowba gaɗta kay sa ma ka saa ana caamba ka lam irimuna, nam mba mbaaraɗ fok Yawe mul ma li ɓivunna mba laɗ dlara gaɗta ɓiiriɗ ndaɗta egeɗ halaŋ may.

³¹ Njuf cara boy ka egembi, may cara li ni ndaɗ li co wa ni, ndaɗ hin zii cooɗ ndaɗta ni u deweɗu.