NDUMBA 4 - Boy Lonana

Sunda goryoŋ Kehatna laɗta

¹ Yawe di gi Moiz u Aaron ana,

² «Ndum goryoŋ Kehat ma goŋ Levina ki u njafasi halaŋ u deeresi halaŋ.

³ Col ha kay suu basaɗasi dok-hindina tuɗ ha basara dok-vadl na, suu may suu ndaki a li sunda hu Mbutluɓ ma Tokkana.

⁴ «Gola ni sunda goryoŋ Kehatna hin laɗ hu Mbutluɓ ma Tokkana. Ni kay tlesuu tasi ki saɓaki teteɗna doy hol.

⁵ Hu li ma asi a jok usina bel ni Aaron u goryom cuk kalafi buɗ gojoli ma caki ii Zanduk ta Ҥinira Gaɗta ki ni asiya.

⁶ Asi hin boɗom ha kay Zandukka ni na gaw may. Boɗ bak vabak ma lus duk mbona ha kolo kayam may, hin boɗ baraw ma tam wili wilina ha kolo kayam hu may. Ŋgoo dagan hin kal kawi ma tli Zandukka u namma hu may.

⁷ Asi boɗ baraw ma tam wili wilina kay tabulla, fu ma ɦam maŋ Lonna hini kay tabulla, ŋgoo dagan asi cuk tassa ma ŋgolona u ma gorina u guura mbulna kay tabulla may.

⁸ Ŋgoo dagan asi hin boɗ baraw ma tlawna ha kolo kasiya. Ha kolo kasi olo ni boɗosi bak vabak ma lus duk mbona ha kasi hu olo, ni asi hin kal kawi ma tli tabulla u namma hu ɗaŋ.

⁹ Asi yow baraw ma tam wili wilina boɗom kay pindilla koɗ garaki kiɗisiyara u tlesuu huruɗna halaŋ, koŋ koŋ ma sel mbulna u tlesuu min vun ku pindillana halaŋ.

¹⁰ Asi boɗoɗ yaɗ u tlegeyeɗ halaŋ u bak vabak ma lus duk mbona, hin tiniɗ kolo kay va ma tlaɗ u namma.

¹¹ Asi boɗ baraw ma tam wili wilina kay li ma ŋgal mbul ma his jivina, hin boɗ bak vabak ma lus duk mbona ha kolo kayam huwa. Ŋgoo dagan hin kal kawi ma tlaɗ u namma hu may.

¹² Asi yow tlesuu li sunda u asi hu li ma teteɗna halaŋ, giɗisi hu baraw ma tam wili wilina. Hin boɗ bak vabak ma lus duk mbona kayami, ŋgoo dagan gasi hu va ma tlaɗ u namma.

¹³ Asi tok but mbul ma asi ŋgalam kay givin ma togolla, boɗ baraw ma tlawna ay kolo kamma kiyo.

¹⁴ Asi cuk tlesuu daŋŋa kolo kay tlesuu li sunda u asina, kawi ma tok murus kura kina, pelna u tlesuu daŋŋa daŋŋa halaŋ suu li sunda hu givin ma togolla. Asi hin boɗ bak vabak ma lus duk mbona ha kolo kasiya, ŋgoo dagan kal kawi ma tlasi kolo u namma.

¹⁵ Aragelay hu li ma suu Israelna a jok usira ni Aaron u goryom boɗ yam tlesuu teteɗna ki halaŋ, ŋgoo dagan njaf suu vi Kehatna mbay yowosi ni na tuwa. Ka suu Kehatna ŋgen kosi eg tlesuu teteɗnaɗi, li ka naɗi ni asi miɗ kiyo. Gola sunda vi goryoŋ Kehatna ta asi laɗ hu zira tokka ni na.

¹⁶ Eleazar ma goŋ Aaron, mul ŋgol ma li ɓivunna, sun mamba ni mbul ma voom hu pindilla, mbitla his jivira, ɦalla ɦaɗ hu buuna tew tewra, mbul ma fuura, tlesuu kalafina halaŋ nam golosiya, u tlesuu li sun Ziŋ Lonara halaŋ.»

¹⁷ Yawe di Moiz u Aaron ana,

¹⁸ «Gol njaf suu vi Kehatna jiviya a asi li ha duk njaf Levi na gak gak.

¹⁹ Gola aŋ golosi ni ko wanda na, ka asi miɗ kiɗi, hu li ma asi tuɗ ha hu li ma ki saɓaki teteɗna ni, Aaron u goryom tuɗ ha ki fokosi jewe, yasi ha ni na dew dew gegelay kay sun mamba mamba, asi takasi tlesuu asi a tlasina ni takkiya.

²⁰ Kay lini suu vi Kehatna cuk ha kalafi wi tlesuu teteɗna u irisi ni na ew lay, ni asi miɗ kiyo.»

Sunda njaf suu vi Gersonna laɗta

²¹ Yawe di Moiz ana,

²² «Aŋ ndum njaf suu vi Gersonna ki u deeresi halaŋ u ziisi halaŋ may.

²³ Ndum suu basaɗasi tew ki dok-hindi ta ta dok-vadlna, suu ki ndaki a li sundana, suu ndaki a li sunda hu Mbutluɓ ma Tokkana halaŋ.

²⁴ «Gola ni sunda njaf suu vi Gersonna hin laɗta u tlesuu asi a ziirisina.

²⁵ Baraw ma boɗi kay Ziŋ Lonarana, ni ana Mbutluɓ ma Tokkana u tlesuu boɗi kamma halaŋ, u bak vabak ma lus duk mbona ma boɗi kolo kay Mbutluɓ ma Tokkana lay, u gojoli ma caki vun Mbutluɓ ma Tokkana may.

²⁶ Baraw ma ŋguy kay kaanana u baraw ma caki vun grekŋana u ma caki fun Ziŋ Lonara, zew ma njun nduŋga kolo u namma u tlesuu li sunda huna halaŋ. Asi li sunda kay tle asina halaŋ.

²⁷ Njaf suu vi Gersonna li sunda ni u gaɗta vi gi Aaron u goryomba. Asi takasi sunda asi laɗta ni asiya, takasi tlesuu asi a ziirisina may.

²⁸ Gola ni sunda goryoŋ Gersonna laɗ hu Mbutluɓ ma Tokkana, sa ŋgol ma fokosina ni Itamar, mul ma li ɓivunna, goŋ Aaronna.

Sunda njaf suu vi Merarina laɗta

²⁹ «Njaf suu vi Merarina aŋ ndumusi ki u deeresi halaŋ u ziisi halaŋ may.

³⁰ Col ndumba ha kay suu basaɗasi tew ki dok-hindina ta ta dok-vadlna na, suu ndaki a li sunda hu Mbutluɓ ma Tokkana.

³¹ Gola ni tlesuu asi hin ziirisi a li sun masira hu Mbutluɓ ma Tokkana. Gu ma min Ziŋ Lonara u namma, kawi ma kali dukumma, guum ma pii gana u kawi ma kalam sem huna,

³² gu liw mayra gii kay zira tokkara u kawi ma seɗ kali huna, gu ma pi gana u zew ma njunuɗ kolo u namma u tlesuu li sunda huna halaŋ, agi tak gegelay ki kay tlegeyem suu nam a ziirisina.

³³ Gola ni sunda njaf suu vi Merarina hin laɗta. Ni sun masira ɦasira a asi laɗ hu zira tokkara, sa ŋgol ma fokosina ni Itamar, mul ma li ɓivunna, goŋ Aaronna.»

Ndum suu vi Levi suu ka li sundana

³⁴ Moiz, Aaron u suu ŋgolo suu fok suu tokkina, ndum goryoŋ Kehatna u deeresi halaŋ u ziisi halaŋ.

³⁵ Col ha kay suu basaɗasi dok-hindina tuɗ ta ta dok-vadlna na. Suu ndaki a li sunda hu Mbutluɓ ma Tokkana.

³⁶ Ndumusi ndi u deeresi halaŋŋi 2,750.

³⁷ Gola ni ndum njaf suu vi Kehatna suu ndaki a li sunda hu Mbutluɓ ma Tokkana, ni suu Moiz u Aaron ndumusi u gaɗta Yawe ɦaɗ ay maŋ Moizza.

³⁸ Gola ni ndum njaf suu vi Gersonna u njafasi halaŋ u deeresi halaŋ lay.

³⁹ Col ha kay suu basaɗasi dok-hindi ta ta dok-vadl suu ndaki a li sunda hu Mbutluɓ ma Tokkana.

⁴⁰ Ndumusi u deeresi u ziisi halaŋ li ni 2,630.

⁴¹ Gola ni ndum njaf suu vi Gersonna, suu ka li sunda hu Mbutluɓ ma Tokkana halaŋ, Moiz u Aaron ndumusi halaŋ u gaɗta Yawe daɗ maŋ Moizza.

⁴² Gola ni ndum njaf suu vi Merarina, ndumusi ki u deeresi halaŋ u ziisi halaŋ lay.

⁴³ Col ha kay suu basaɗasi dok-hindina ta ta dok-vadlna, suu ndaki a li sunda hu Mbutluɓ ma Tokkana.

⁴⁴ Ndumusi u deeresi halaŋ li ni 3,200.

⁴⁵ Gola ni ndum njaf suu vi Merarina u deeresi halaŋ u ziisi halaŋ Moiz u Aaron ndumusi ni u gaɗta Yawe ɦaɗ ay vun Moizza.

⁴⁶ Gola ni ndum njaf suu vi Levina taɓ halaŋ Moiz u Aaron u suu ŋgolo suu fok suu tokkina ndumusina. Ndumusi ki u deeresi halaŋ u ziisi halaŋ lay.

⁴⁷ Col ha kay suu basaɗasi dok-hindina ta ta basa dok-vadlna suu ndak ki a li sunda hu Mbutluɓ ma Tokkana, pi Mbutluɓma u zii tlesuu min Mbutluɓ ma Tokkana.

⁴⁸ Ndumusi li halaŋŋi 8,580.

⁴⁹ U gaɗta vi Yawera, hu li ma Moiz ka fokosina, asi tak sunda vi gegelay ta nam a laɗta kiyo. Gegelay ni li ni sun mamba Yawe takamba ay fun Moizza.