NDUMBA 35 - Boy Lonana

Ҥoŋzi ma vi suu vi Levina

¹ Yawe ɓak tam u Moiz ŋgoo bagi hu mbassa Moabpa tok eg mbo lum ma Yurdanna vok tam u Yeriko, dam ana,

² «Di suu Israelna asi yow ki u liisi maa ɦiw ɦam ki maŋ njaf suu vi Levina, ni ɦoŋzi ma asi hin cuk ziisi huna, agi ɦasi ndaŋgara ŋguy kay ɦoŋzi masinara may.

³ Ҥoŋzina hinni a asi cuk ziisi hura may, ndaŋgara ŋguy kasira hinni a li ma taa yoori masisina, u li ma asi hin cuk tlegeyesi suu li sunda huna may.

⁴ Ndaŋgara ŋguy ɦoŋzina ta agi ɦaɗ maŋ suu vi Levina col ha pay gulumunna tuɗ ha ki u meter kis kis vadl.

⁵ Kay yam ɦoŋziisina halaŋ keŋ ma u maɗiinana agi ŋga meter kis kis vadl, keŋ ma dalina agi ŋga meter kis kis vadl, keŋ ma u fiɗiginana agi ŋga meter kis kis vadl, keŋ ma mbayawna agi ŋga meter kis kis vadl may. Hinin ɦoŋziisina duk gayra. Ҥasi lina ki ŋgufi kay ɦoŋziisina na cutl.

⁶ Zi ma agi hin ɦam maŋ suu vi Levina ni ɦoŋzi ma karkiya ma suu ci maɗna tuɗ ŋgay tasi ki huna, agi cukusi ɦoŋzi ma daŋŋa ha egem hu na dok-fiɗi yam mba'.

⁷ Ҥoŋzi ma agi ɦam maŋ suu vi Levina li halaŋŋi dok-fiɗi yam kalavandi. Ҥoŋzi maanagelay ni u sene mamma umu umu.

⁸ Ҥoŋzi ma agi yowom ay vi suu Israelna ni suu masina ŋgolna agi yow ay ŋgol may, suu masina ewna agi yow ay ni ew may a mbuɗ li namma ki maŋ suu vi Levinara.»

Ҥoŋzi ma ŋgayra

⁹ Yawe di Moiz ana,

¹⁰ «Di suu Israelna ana, hu li ma agi calaɗ mbo lum ma Yurdanna ki wa a kal hu mbassa Kanaanda ni,

¹¹ agi u tagira managi ɦoŋzi ma ŋgayra kiyo. Sa ma ci maɗna paɗ kom paɗina tuɗ ŋgay tam ha ki hu zi namma.

¹² Ҥoŋzi namma hin njun ugi a ŋgay tagi bay sa ma sa sukulna cagi ki ba, sa ma ci maɗnana ka cam ki jew bay kaam ɓak mamma ki fok suu kaɓakŋaɗi.

¹³ Ҥoŋzi ma agi hinim ki a ŋgayrana ni agi hin zina ki ni karkiya.

¹⁴ Agi hin ɦoŋzi ha ŋgoo lum ma Yurdanna ii hiŋŋa hindi, hin hu Kanaan ii hiŋŋa ni hindi may.

¹⁵ «Ҥoŋzi namma hinni a li ma ŋgayra maŋ suu Israelna, maŋ suu ŋgayagi suu poy kolona lay. Sa ma maɗna paɗ kom paɗina tuɗ ŋgay ki huwa.

¹⁶ Lini nam waɗ sana ni u kawiya kalam maɗna ni na ni sa namma ndak cam ki may kay nam ci ni maɗna.

¹⁷ Lini nam gigimmi u gogoyra sana jak ki maɗna wa ni nam ci ni maɗna, sa namma mba cam ki may.

¹⁸ Lini nam gik sana ni u guna kalam ki maɗna, ni nam ci ni maɗna, sa namma cam ki may.

¹⁹ Sa ma sa sukulna ci sa ma ci maɗnana ki ni namu. Lini nam ŋgafammi aragelay ni nam ndak cam kiyo.

²⁰ «Lini sana dag ndaramma u huu ma cona, ɗowba nam gikim u vana u hurum ma cona sa namma miɗ wa,

²¹ lini nam cammi godopoŋga u hurum ma yara, sa namma jak maɗna wa ni, nam ci ni maɗna, sa ma ci ndaramma namma asi cam ki may, kay nam ci ni maɗna, sa ma min a sa sukulna hin cammi namu, hu li ma nam ŋgaf u namma ni nam cam kiyo.

²² Na may lini sana paɗ kommi paɗiya, nam gaɗ ka a cam kiɗi, ɗowba nam gikim vana ha ni ka u huu ma yaɗi lay,

²³ ɗowba gik vana ha ni wam kaɗi, gikŋa tuɗ vam cam kiyo, nam li dla ndaɗta ha na ni hurum ka egem coɗi lay, gaɗ ka a lammi ŋgasamara daŋ mayɗi ni.

²⁴ Suu tokka ndak a gi ii dlara duk ɦoŋ sa ma ci maɗnana u sa ma sa sukulna ko gaɗta dira na.

²⁵ Suu tokina ndak a suɗ sa ma ci maɗnana ki ko sa ma sa sukulna, tuɗum ki hu ɦoŋzi ma ŋgayra nam tuɗ ŋgay tam ha ki huwa. Nam kak ha hu gak gak juɓmi buu ma mul ma asi fuurum u mbulna a li ɓivunnana miɗna tuwa.

²⁶ Na may lini sa ma ci maɗnana li tam laɓa wa tuɗ ki hu ɦoŋzi ma daŋ wa, hin ɦoŋzi ma ŋgay ma nam huna ka ki wa,

²⁷ Sa ma sa sukulna fam ay ki keŋ cam ki wa ni, nam li ka coɗi.

²⁸ Sa ma ci maɗnana kak hu ɦoŋzi ma ŋgayra ni na gak gak juɓmi miɗ ma vi mul ŋgol ma li ɓivunnana tuwa. Ŋgoo miɗ mamma ni nam hin hoŋ ay vo hu mbas mamba.

²⁹ Gaɗ ndaɗta hin ka dukugi ni na gak gak a gaɗta doo kay sana hu li ma agi cuki huna halaŋ.

³⁰ «Kay dlara ci maɗna, ci sa ma ci maɗnana ki ni u dikira vi suu daŋŋa bolowo ka kaɓakŋa kay sana a cam kira u dira vi sa ma dewnaɗi.

³¹ Agi ka vi gursu ko sa a gus kay a suɗ sa ma ci maɗna ma ɓakŋa vam a cam kinaɗi. Sa namma cam ki ni ci daŋ may.

³² Sa ma tuɗum ha ki hu ɦoŋzi ma ŋgayra kay nam ci maɗnana, agi ka vi gursu kam a hoŋom ay vo hu mbas mamba, jew miɗ ma vi mul ŋgol ma li ɓivunnaɗi lay.

³³ Ka agi ɓalak mbas magiraɗi, mbassa mbuɗ ki njenjera ni u busu ma sana vooɗna ki kaɗna. A hin mbus mbassa ki teteɗta ni u busu sa ma vooɗ busuna ki kaɗna may.

³⁴ Aŋ ka mbuɗ mbassa an cuki hura ki njenjeɗi, ni mbassa an ka dukugi hura, kay anni Yawe, an ka kaki duk suu Israelna.»