NDUMBA 34 - Boy Lonana

Vun mbassa Kanaan ta daɓ ayra

¹ Yawe di Moiz ana,

² «Aŋ tuɗ di suu Israelna ko ndal wanda na. Hu li ma agi cuk hu mbassa Kanaanda wa ni, gola ni mbassa an ɦagira a jooginara. Mbassa Kanaanda vunuɗ daɓ ay ni ko wanda na.

³ Ii haka magira ŋgaayra gijaŋŋa ay ni ŋgoo bagi hu fulla Sinda, tuɗ gak gak tew ki Edom, ii u maɗiina na ni vun mbas magira ŋgaayra gijaŋŋa ay ni fun mbo lum ma galakŋa.

⁴ Ii haka magira hoŋ kolo dalina tuɗ tew ay hu Sin hin tuɗ tew ay ki keŋ ma dalina vi mbassa Kades Barneara, tuɗ hu Hassar Addar na hin jak hu Asmon.

⁵ Col ha Asmon ii hakara tuɗ kolo fun mbo lum ma Egiptena na. Tuɗ tew ay ki fun mbo lum ma ŋgolna.

⁶ Ii haka magira u fiɗiginara ni mbo lum ma ŋgolna gaw, nam hin ay ni a ii hakara u fiɗiginara gaw.

⁷ Gola ni, ii haka magira keŋ ma mbayawna may. Agi coloɗ ha fun mbo ŋgolna ta ta tuɗ tew ay hu ɦinira Horra.

⁸ Col ha u ɦinira Horra haka magira tuɗ gak gak tew Lebo Hamat jak ta ta Sedad.

⁹ Hin jak hu Zifron hin tuɗ tew ay hu Hassar Enan. Ni ii haka magira mbayawra hin li ni na.

¹⁰ Kay ii haka magira u maɗiinara ni col ha hu Hasar Enon tuɗ ta ta Sefam.

¹¹ Col ha Sefam ii hakara tuɗ ga hu Ribla na hin kal u maɗiina vi mbassa Ainda na. Ndaɗ hin jak gak tuɗ tew ay keŋ lumma Genesaretna

¹² Hin jak ta ta fun lum ma Yurdanna tuɗ tew ay ki fun mbo ma galakŋa. Mbas magira ni na u mbas mayra ŋguy kaɗta halaŋ.»

Yal ma wili ma ɓorow mbassa

¹³ Moiz gijaŋ haɗ suu Israelna dasi ana, «Gola ca ni mbassa agi hin ɓorowoɗ duk tagi u paɗ dewnara. Ni mbassa Yawe min a ɓorowoɗ maŋ njaf suu dleeŋena u nus njaf ma hiŋŋa huwa.

¹⁴ Kay ndaɗta njaf suu vi Rubenna u njaf suu vi Gadna u nus njaf suu vi Manasena fi joosina ha ki da.

¹⁵ Njaf suu mba' asina u nus njaf suu hiŋŋa fi joosina ha ki ii hiŋŋa ŋgoo lum ma Yurdanna. Vok tasi u Yeriko ii ma u maɗiina na.»

Sem suu ŋgolona suu hin ɓorow mbassa

¹⁶ Yawe di Moiz ana,

¹⁷ «Gola, ni sem suu hin a ɓorowogi mbassa dukugina. Mul ma li ɓivunna, Eleazar, u Josuwe ma goŋ Nunna.

¹⁸ Olo ni, agi man suu ŋgolo ay dew dew ki u njaf suuna bel, a ɓorow mbassa.

¹⁹ Gola ni sem suu asina, kay njaf suu vi Yudana ni Kaleb ma goŋ Yefunena.

²⁰ Kay njaf suu vi Simeonna ni Semuel ma goŋ Amihudna.

²¹ Kay njaf suu vi Benjaminna ni Elidad ma goŋ Kislonna.

²² Kay njaf suu vi Danna ni Buki ma goŋ Yoglina.

²³ Kay goryoŋ Josefna, kay njaf suu vi Manasena ni Haniyel ma goŋ Efodna.

²⁴ Kay njaf suu vi Efrayimma ni Kemuel ma goŋ Siftanna.

²⁵ Kay njaf suu vi Zabulonna ni Elissafan ma goŋ Parnakŋa.

²⁶ Kay njaf suu vi Isakarna ni Paltiyel ma goŋ Azanna.

²⁷ Kay njaf suu vi Aserna ni Ahihud ma goŋ Selomina.

²⁸ Kay njaf suu vi Neftalina ni Pedahel ma goŋ Amihudna.»

²⁹ Gola ni suu may suu Yawe manasi ki a ɓorow mbassa Kanaanda ki maŋ suu Israelnana.