NDUMBA 32 - Boy Lonana

Njaf suuna hindi cuk keŋ lum ma Yurdanna u maɗiina na

¹ Goryoŋ Ruben u Gadna u yoorina kosi bolow cocoo. Asi wi mbassa Yazerra u mbasssa Galaadta na ni ndaɗ irisi jivi kay yoori masisina.

² Goryoŋ Gadna u suu vi Rubenna mba di boy namma maŋ gi Moiz u mul ma li ɓivunna, Eleazar, u suu ŋgolo suu fok suu Israelna.

³ «Ҥoŋzi ma ŋgolona Atarot, Dibon, Yazer, Nimra, Hesebon, Elale, Sebam, Nebo u Beon,

⁴ ni mbas mayra Yawe tooɗ ki fok suu Israelnara, mbas ndaɗta jivi kay yoorina ɦay. Doli ni suu sun maŋsina ca ni yoorina kosi cocoo.

⁵ Lini aŋ a wami hahawamiya ni, ko mbas ndaɗta ca ni li ni mamiya, ka aŋ hinimi a taɓa lum ma Yurdanna ki na dayɗi.»

⁶ Na may Moiz hin di goryoŋ Gad u Rubenna ana, «Ni mege? Gorsegina tuɗ fun duuna agi hin ka ki tani?

⁷ Agi min a mbuɗ suu Israelna ndaana ni kay mege, a ɗoorosi bay calaɗ mbona a tuɗ hu mbassa Yawe ɦasirara ni amege?

⁸ Agi min li ni ko somoyogi an ay hu Kades Barnea sunusi a tuɗ gol mbassara na olo.

⁹ Asi tuɗ ay ta ta hu ɦuɗugumba Esekolla, hu li ma asi wi mbassa ay wi wi ni hin mba mbuɗ suu Israelna ki ndaana, ɗoorosi bay cuk hu mbassa Yawe ɦasirara.

¹⁰ Hu li namma ni Yawe hurum ɓeŋ ki cocoo, nam suu tam ki ana,

¹¹ Suu asina halaŋ suu cuk ay ki hu mbassa Egiptera, col ha kay suu basaɗasi dok-mbana tuɗ ha fok na ni, lini nanagelay asi ka wi mbassa an vi vunun kaɗ a ɦaɗ maŋ Abraham, Isaak u Yakobpaɗi, kay asi min ka a li u boy mannaɗi.

¹² Suu hin cuk huna ni Kaleb ma goŋ Yefun ma hu njaf suu Kenazna u Josuwe ma goŋ Nunna doy hol. Kay ana asi tuɗ u vun Yawe li ndaa kaɗi.

¹³ Yawe hurum ɓeŋ ki eg suu Israelna nam viɗisi ki ŋgoo bagi hu fulla basara dok-fiɗi ta ta ba suu may suu dlaasira ka jivi ii Yaweɗina ki halaŋ.

¹⁴ Agi goryoŋ suu co asina hal a tlagi ni dlaŋ somoyogira olo, min a mbaa yara vi Yawera ay kay suu Israelna.

¹⁵ Lini agi ka min a tuɗ u vunumbi ni nam hin ɦuɗugi buu magi ma ŋgoo bagina ha fok olo, ni agi ba ki ni suu Israelna halaŋ.»

¹⁶ Asi ɦuɗ tasi ay egem dam ana, «Ami hin vi ka ni kadlaŋga kay yoori mamisina, min zina ka kay gor kem mamisina may.

¹⁷ Ami tamira hin yow kawi mamina komi a tuɗ fok suu Israelna ta ta tewesi ki hu liisi tuwa. Goryomi hin ka tani hu ɦoŋzi ma eŋŋa may. Asi hin lak ŋgay jivi ko suu hu mbas ndaɗtana may.

¹⁸ Ami ka hoŋ ay vo hu ziimi bay suu Israelna gegelay ni fi joomma ki kom baɗi.

¹⁹ Na may hu li ma asi ɓorow li ma ha ŋgoo lumma Yurdanna ii hiŋŋa ni ami ka duk oloɗi kay ii ɓorow mamina ki ni keŋ lumma ii u maɗiina tani.»

²⁰ Moiz dasi ana, «Lini agi li na, lini agi a yow kawi magina a tuɗ fok Yawe a duuna ni,

²¹ lini suu magi suu duuna taɓa lumma Yurdanna fok Yawe, ta ta asi tuɗ dik suu babali masisina kiyo ni,

²² lini agi hin hoŋ dagan ta ta mbassa halaŋ tlaɗ ki maŋ Yawe ni, va hin ka lagi fok Yawe oloɗi, fok suu Israelnaɗi lay. Mbas ndaɗta wanda hin ki ni a mbas magira fok Yawe may.

²³ Na may lini agi li ka naɗi ni, agi li cora ni eg Yawe. Ni agi wi ki ana coogi ndaɗta hin cuɗugi ugi may.

²⁴ Tuɗ minigi zina kay goryogiya gagi katlaŋga kay yoori magisina may. Na may boy ma vi vun ma kal ay ki funugina agi lagi um may.»

²⁵ Goryoŋ Gad u Rubenna di Moiz ana, «Suu sun maŋsina hin li u gaɗta sa ŋgol masina dasirara.

²⁶ Boyogomiya, goryomiya, yoori mamisina u tlegeyemi halaŋ hin lak ka ni hu ɦoŋzi ma Galaadna tani.

²⁷ Suu sun maŋsina halaŋ min tasi a tuɗ koyra jak fok Yawe a tuɗ duuna, ko ndal sa ŋgol manna dira na.»

²⁸ Moiz ɦal gaɗta ki kasi fok mul ma li ɓivunna, Eleazar, fok Josuwe ma goŋ Nunna, maŋ suu ŋgolo suu fok njaf suu Israelna halaŋ.

²⁹ Nam dasi ana, «Lini goryoŋ Gadna u goryoŋ Rubenna taɓa lum ma Yurdanna u agiya, u kawi masina kosi halaŋ a duu fok Yawera ni, agi may ni hu li ma agi tli mbassa ki wa ni agi hin ɦasi mbas mayra Galaadta ni masiya.

³⁰ Lini asi tuɗ ka ugi a duunaɗi ni, agi hin ɦasi mbas masira ha ni dukugi hu mbassa Kanaanda may.»

³¹ Goryoŋ Gadna u goryoŋ Rubenna hoŋ dira ana, «Ami hin li ni va ma Yawe dam maŋ suu sun maŋsinana.

³² Ami tamira u kawi mamina tuɗumi fok Yawe hu mbassa Kanaanda na may mbassa ami tamira hin tlaɗ a ɓorow maminara ka ki ni keŋ lumma ii hiŋŋa.»

³³ Moiz ɓorow mbassa maŋ goryoŋ Gadna, goryoŋ Rubenna u nus goryoŋ Manase ma goŋ Josefna. Mbassa vi Sihon, mul ma Amorna u mbassa vi Og, mul ma Basanna, mbassa u ɦoŋzi ma huruɗna halaŋ, u ndaŋgara ŋguyuɗta halaŋ, ɦoŋzi ma ŋguy kasina halaŋ.

³⁴ Goryoŋ Gadna hoŋ min zi ma Dibon, Atarot, Aroer,

³⁵ Atrot Sofan, Yazer, Yogbaha,

³⁶ Bet-Nimra u Bet-Haran. Asi min ɦoŋzi masi ma eŋ cocona gi katlaŋga kay timigiina may.

³⁷ Goryoŋ Rubenna hoŋ min zi ma Hesbon, Elale, Kiriyataim,

³⁸ Nebo, Baal-Meon (sem zi namma hin mbuɗ ki zeɗ zeɗ) u Sibma, ɦoŋzi ma asi minimma hin jokom sem ki zeɗ zeɗ.

³⁹ Goryoŋ Makir ma goŋ Manasena tuɗ hu Galaad tli mbas ndaɗta dik suu Amor suu cuki huna.

⁴⁰ Moiz ɦal mbassa Galaadta maŋ Makir ma goŋ Manasena nam cuk huwa.

⁴¹ Yair ma goŋ Manasena tuɗ hawaɗ zi ma vi suu masi suu duuna kiyo, asi hin tin sem zi namma ana zi ma vi Yairna.

⁴² Noba tuɗ nduk zi ma Kenatna u zi ma ŋguyumma halaŋ, asi tin sem zi namma ana Noba ni u sem tamba gaw.