NDUMBA 31 - Boy Lonana

Duu ma teteɗna u suu Madiyanna

¹ Yawe di Moiz ana,

² «Tuɗ sa sukul suu Israelna kay dla cora suu Madiyanna a lasira egesira. Ŋgoo dagan aŋ hin hoŋ eg somoyoŋu.»

³ Moiz di suu Israelna ana, «Njufiina gegelay dukugi ni min tam a tuɗ koyra, asi tuɗ a duu u suu Madiyanna a sa sukul ma vi Yawena u suu Madiyanna.

⁴ Agi a tuɗugi koyra ni njaf suu Israelna halaŋŋi cuk suuna buɓ buɓ.»

⁵ Asi li ko ndaɗta na yow suuna buɓ buɓ hu njaf suu Israelna halaŋ. Suu duuna ndi ni buɓ buɓ doogo yam mba' ni suu tuɗ a koyrana.

⁶ Moiz sunusi a tuɗ koyra ni na suu buɓ buɓ u njaf suu Israelna halaŋ. Nam sunusi na ni gi mul ma li ɓivunna, Pinhas, ma goŋ Eleazarna, usi may, nam tuɗ ni u tlesuu teteɗ suu hu Mbutluɓ ma Tokka komu, u tokolomma a yi suu duuna kom may.

⁷ Asi tuɗ a duu u suu Madiyanna ko Yawe dasi ay fun Moizza na may. Asi ci suu njufiina ki halaŋ halaŋ.

⁸ Hu olo ni asi ci muli suu Madiyanna ki halaŋ. Evi, Rekem, Sur, Hur u Reba ni muli suu vadl suu hu Madiyanna, asi ci Balaam ma goŋ Beorna ki hu lay.

⁹ Suu Israelna yow boyogi suu Madiyanna u gorɓii masisina ay daŋgayna halaŋ halaŋ. Asi yowosi yoori masisina u mbutlugina u tlegeyesi suu vona halaŋ halaŋ.

¹⁰ Asi ŋgal ɦoŋzi ma suu Madiyanna cuki huna u zi ma vi suu asgaanana ki halaŋ halaŋ.

¹¹ Asi hin mbaa tlesuu asi ɦurumusi ay hu jonana u yoorina ay ki bel.

¹² Asi mbaa suu daŋgayna, tlesuu yowosi ay fun duunana tlesuu ɦurumba ay eg Moiz u mul ma li ɓivunna Eleazar fok suu Israelna halaŋ, asi mbaarasi ay ki vo usi hu mbassa Moabpa, fun mbo lum ma Yurdanna vok tasi u zi ma Yerikona.

¹³ Moiz u mul ma li ɓivunna Eleazar u suu ŋgolo suu fok suu Israelna cuk ay ki mba ŋgafasi vogosi ha ki doŋ kaana.

¹⁴ Moiz hurum ɓeŋ eg suu ŋgolo suu fok suu duunana, suu fok suu kis kisna, u suu fok suu buɓ buɓ, suu ay hu li duunana halaŋ ana,

¹⁵ «Ni mege? Agi hin boyogina ay iiri ni nanage?

¹⁶ Asi ni suu hu lina vi Balaam zuɗ suu Israelna a cuk hu dla cora eg Yawe masinanaɗi su? U dlara vi Peorra tuguɗiira cora mba kay suu vi Yawe ni usiɗi su?

¹⁷ Cemi ni cagi gor njufiina kiyo, ci boyogina ki may, ci boyogi suu buu ki u njufiinana ki halaŋ halaŋ.

¹⁸ May gorɓii suu taɓ ka u sa njuf tuɗina agi hinisi iiriya. Asina ni magiya.

¹⁹ Agi may ni vagi ziigi doŋ kaana tani ta ta buuna kiɗisiya, agi suu ci maɗna ayna halaŋ u suu tin kosi ay eg maɗnana, agi hin lagi dlara mbuɗ tagi ki teteɗta ni hu buu ma hindina may, hu buu ma kiɗisiyana may. Agi tagira u suu daŋgay magisina lay.

²⁰ Ko ndaɗta na lay, tlesuu ay kogina, barawina, tlesuu ɗeeri u ɗikkana, tlesuu cili u bak ɦuguninana u tlesuu mini u gunana agi lasi ki teteɗ lay.»

²¹ Mul ma li ɓivunna, Eleazar, di asgaa suu tuɗ ay fun duunana ana, «Gola ni gaɗta Yawe ɦaɗ ay maŋ Moizza

²² Tlesuu kura ka ŋgalasiɗina ni lorra, doonora, walakka, kawina, silkina, u tusuna,

²³ tlesuu kura ka lasi vaɗi, suu agi ndak a cukusi duk kura a mbuɗusi ki teteɗna, agi mbususi u yo ma teteɗna lay. Tlesuu ka ŋgaf u kuraɗina agi mbususi ki u yo ma teteɗna may.

²⁴ Hu buu ma kiɗisiyana ni agi mbus barawi magisina ki halaŋ halaŋŋi agi hin mbuɗ ki teteɗ. Ŋgoo dagan agi hin cuk ay vo hu zina.»

Ɓorow tlesuu ɦurumba kiyo

²⁵ Yawe di Moiz ana,

²⁶ «Aŋ taŋga u mul ma li ɓivunna Eleazar u suu ŋgolo suu fok suu may suu Israelna, ndumugi tlesuu asi yowosi ay fun duunana kiyo, suuna u yoorina lay.

²⁷ Aŋ ɓrow tle asina duk hoŋ suu duuna u suu Israelna halaŋ.

²⁸ Aŋ yow yam tlesuu vi suu duunana ki maŋ Yawe, kay suu warna suuna kis kis vadl ni aŋ tli va ki dew, kay yoorina kis kis vadl ni aŋ vi ki dew may, ni kay mbutlina, korra, u yoori suu gorina halaŋ.

²⁹ Agi yow tle asina ay ni duk ɓorow masina, ɦasi ki maŋ mul ma li ɓivunna Eleazar ni a ɓorow ma vi Yawena.

³⁰ Kay ɓorow ma vi suu Israelna ni kay suu warna ni suuna dok-vadl ni aŋ tli va ki dew, kay yoorina dok-vadl ni tli ki dew lay, kay mbutlina, koora, timigiina, ɦugunina u yoori suu daŋŋa halaŋ, ɦal yam tle asina maŋ njaf suu vi Levi suu ka li sunda hu Ziŋ Yawena.»

³¹ Moiz u mul ma li ɓivunna Eleazar li dlara Yawe daɗ ay maŋ Moizza.

³² Tlesuu yowosi ay fun duuna suu hin iirina, timigiina u ɦugunina li na 675.000.

³³ Mbutlugina na 72.000.

³⁴ Korra halaŋŋi 61.000.

³⁵ Kay suu warna, gorɓii suu taɓ ka u sa njuf tuɗina, asina halaŋŋi 32.000.

³⁶ Ii ɓorow ma ɦam ki maŋ asgaa suu ay fun duunana ni yoori suu gorina timigiina u ɦugunina li na 337.500.

³⁷ Ii ɓorow ma ɦam ki maŋ Yawena yoori suu gorina ni 675.

³⁸ Mbutlugina halaŋŋi 36.000, hin ɦasi yasi ki maŋ Yawe ni 72.

³⁹ Korra halaŋŋi 30.500 ɦal ki maŋ Yawe ni 61.

⁴⁰ Suu warna halaŋga ni 16.000 ɦasi yasi ki maŋ Yawe ni 32.

⁴¹ Moiz ɦal yam tlesuu yowosi ki maŋ Yawena maŋ mul ma li ɓivunna Eleazar ko Yawe damba na may.

⁴² Kay ɓorow ma vi suu Israelna halaŋŋa ma Moiz kaam irim ki u ma vi suu asgaa suu duu aynana.

⁴³ Ɓorow masi namma ndi halaŋŋi na, yoori suu gorina 337.500.

⁴⁴ Mbutlugina ni 36.000.

⁴⁵ Korra halaŋŋi 30.500.

⁴⁶ Suu warna halaŋŋi 16.000.

⁴⁷ Moiz yow ki u ɓorow ma vi suu Israelna maŋ suu vi Levi suu ka li sunda hu Ziŋ Yawera, ko Yawe damba na kay suu warna u yoorina lay, dok-vadl ni nam tli ki dew masiya.

Ɓivunna u minda maŋ Lona

⁴⁸ Suu may suu ŋgolo suu ay fok suu duunana, suu fok suu buɓma u suu fok suu kis kisna mbay eg Moiz.

⁴⁹ Asi dam ana, «Suu sun maŋsina ndum suu duu suu ay umina ki halaŋ, sa maa ba ha ka ki na dewɗi.

⁵⁰ Kay ndaɗta ami mbaa ɦal mamira maŋ Yawe a li ɓivun ma mbus coomira kina fok Yawe ni lorra, walakka, kaɗumba kay kona, tlesuu kal humba u tlesuu del konana, suu ami fasi ayna halaŋ.»

⁵¹ Moiz u mul ma li ɓivunna Eleazar vi tlesuu ay kosina, gi lorra ni tlesuu a mbuɗusi ki jivina halaŋ.

⁵² Nek tlesuu asi suu may suu ŋgolo suu ay fok suu duunanna fasi ay ko suu duuna asina li ii kelewna na 170.

⁵³ Suu asgaa suu ɦawana halaŋ gegelay ni ŋgom vaam ma nam ɦurumum ay fun duunana.

⁵⁴ Moiz u mul ma li ɓivunna Eleazar vi lorra ko suu ŋgolo suu fok suu buɓma u suu fok suu kis kisna halaŋ, mbaaraɗ ay hu Mbutluɓ ma Tokka, kay a gi hum suu Israelna fok Yawera.