NDUMBA 30 - Boy Lonana

¹ Moiz cuɗ dlara Yawe dambara ki maŋ suu Israelna halaŋ halaŋ.

Gaɗta kay gi vunna

² Moiz ɓak suu ŋgolo suu fok njaf suu Israelna ana, «Gola ni gaɗta Yawe ɦaɗ kara.

³ Lini sana gi vunum wa a li va fok Yawe ni, ɗowba suu tam kay dlaamba kay tamba, nam ka hin dlara nam daɗta bay liɗi. Nam mba li ki u vunum ma nam gam namma may.

⁴ Lini cara ni goo tu wa ka vo vi buɗu, yi va kaɗ fok Yawe kala, kay dlaaɗta kay taɗta kala ni,

⁵ lini buɗ ɦum wa ana ndaɗ li ka na ni kay dlaaɗta kay taɗta, lini nam daɗ va kaɗi ni suu maɗ ndaɗta hin li u voɗoɗu, dlara ndaɗ vi huruɗ a laɗta halaŋ hin li ki jivi u voɗoɗu.

⁶ «Na may lini buɗ hum boy namma dooroɗ ki wa ni suu maɗ ndaɗta hin ki ni ɦawaa. Ni Yawe ka ndak a joɓoɗ va egeɗɗi, kay ana buɗ dooroɗ ki ni nam daŋ may.

⁷ Lini goora yi va kaɗ a ɦal va maŋ Bu Suuna, hin tuɗ ki zi njufna humuɗ ka kay boy maɗ ma ndaɗ dammaɗi ni

⁸ lini njufuɗ hum boy namma hin daɗ ka hu buu namma gawɗi ni vi vun maɗ namma ka kaɗ gak gak.

⁹ May hu li ma njufuɗ humma dooroɗ ki hu buu namma wa gawi ni gi vun maɗ namma ki ni bulumiya. Yawe ka hin a ŋgaaɗ va ma co kaɗ oloɗi may.

¹⁰ «Na may gi vun ma vi cara donora u cara hin njufuɗ kira gi vunuɗ wa ni ndaɗ mba li ki u vunuɗ namma mbee.

¹¹ Na may lini cara yi tlena kaɗ wa a li vaa, ndaɗ li ka ni vi njufuɗu,

¹² lini njufuɗ hum dla ndaɗta hin daɗ kaɗi, dooroɗ ka gawɗi ni dlara ndaɗ suu taɗ kaɗta ka ni gak gak, ni dlara ndaɗ vi vunuɗ a laɗ ndaɗta li ki mbee.

¹³ May lini njufuɗ hum dla ndaɗta na gaw ni dooroɗ ki hu buu namma ni dla ndaɗta hin bulum ki ni ɦawaa, kay njufuɗ dooroɗ ki wa, Yawe ka ŋgaaɗ dla ndaɗta kaɗ oloɗi.

¹⁴ Dlara cara suu taɗ kaɗ a laɗta li a lini laara ɗowba, li megelay, njufuɗ vi dla ndaɗta ni namu, lini nam min kaɗi ni, dla ndaɗta ka liɗi.

¹⁵ Lini cara suu taɗu njufuɗ hum boy namma hin di va kaɗi, juɓ ta ta buu ki tuwa ni, ndaɗ mba li dlara ndaɗ suu taɗ kaɗ ndaɗta ki halaŋ, kay ana hu buu ma nam humma ni di va kaɗi, nam mbuɗuɗ a li ni namu.

¹⁶ Lini nam tin um a dooroɗ ki hu buu ma vinna ni, cora vi caambara hin tokŋi kamu.»

¹⁷ Gola ni gaɗta Yawe ɓiiriɗ ka maŋ Moiz kay sana u caamba ɗowba goora vo go tamara vi buɗ tura.