NDUMBA 3 - Boy Lonana

Goryoŋ Aaronna

¹ Gola ni goryoŋ gi Aaron u Moizna, hu li ma Yawe ɓak u Moiz ay kolo kay ɦinira Sinayrana.

² Gola ni sem goryoŋ Aaronna, gorom ma ŋgolna yam ana Nadab, Abihu, Eleazar u Itamar.

³ Ni goryoŋ Aaron suu asi fuurusi ki u mbulna ɦasi sunda li ɓivunna kosina,

⁴ Nadab u Abihu ni suu miɗ ay ki ŋgoo bagi fok Yawe, hu li ma asi kal kura daŋga kalafi hu givin ma togollana. Asi miɗ ay ki ni ŋgoo bagi u ɦinira Sinayra hin goo ka balamasiɗi. Suu hin li sunda ɓivunna u busina ni Eleazer u Itamar.

⁵ Yawe di Moiz ana,

⁶ «Mbaa njaf suu vi Levina ay fok Aaron, mul ma li ɓivunna, kay a asi njunum a li sunda.

⁷ Asi hin li sunda maŋ Aaron may, maŋ suu Israel suu belna may, fun Mbutluɓ ma Tokkana, kay a li sun Ziŋ Lonara may.

⁸ Asi hinni suu a gol tlesuu kalafi hu Mbutluɓ ma Tokkana, hin li sunda maŋ suu Israelna a min Ziŋ Lonara may.

⁹ Kay ndaɗta aŋ ɦal njaf suu vi Levina maŋ Aaron u goryomu, asi hin ki ni masi a fafaɗta daŋ may, suu Israelna ɦasisina ki wa.

¹⁰ Na may Aaron u goryom li sunda li ɓivunna ni asi doy hol, sa ma daŋ ŋgen tam ay huwa ni sa namma hin miɗ kiyo.»

¹¹ Yawe di Moiz ana,

¹² «Gola an man njaf suu vi Levina ki duk suu Israelna ni kay balam goryosi suu vuɗ fok jewna halaŋ. Njaf suu vi Levina hin ki ni manu.

¹³ Kay ana gor suu vuɗ fok jewna halaŋ ki ni varanu. Hu li ma an ci gor suu vuɗ fok jewna ki halaŋ ay hu mbassa Egiptera ni, an hin mbuɗ gor suu vuɗ fok jewna vi suu Israelna halaŋ ki ni man may. Gor suu warna u gor yoorina lay halaŋ ki ni manu. Anni Yawe.»

Ndum njaf suu vi Levina

¹⁴ Yawe di Moiz ay ŋgoo bagi u ɦinira Sinayra ana,

¹⁵ «Ndum njaf suu vi Levina ki u ziisi halaŋ u deeresi halaŋ, aŋ ndum suu vi Levina suu njufiina col ha kay suu vuɗ li tilna dewna.»

¹⁶ Moiz ndumusi ki halaŋ u vun ma Yawe dammana.

¹⁷ Gola ni sem goryoŋ Levina, Gerson, Kehat u Merari.

¹⁸ Gola dee suu vi Gersonna ni Libni u Simey

¹⁹ Dee suu vi Kehatna ni Amram, Isar, Hebron u Uziyel.

²⁰ Dee suu vi Merarina ni Mali u Musi. Ni dee suu vi Levina li u njafasi ni na.

²¹ Njaf Gersonna ni suu vi Libnina u suu vi Simeyna. Asina ni suu Gersonna.

²² Suu may suu ndumusi col ha kay gor njufii suu vuɗ li tilna dewna nana hu dee Gersonna ndumusi ndi halaŋŋi 7.500.

²³ Njaf suu vi Gersonna cuk ziisi ni u fiɗigina ŋgoo Ziŋ Lonara na.

²⁴ Sa ma ŋgolla fok njaf suu vi Gersonna ni Eliyasaf ma goŋ Laelna.

²⁵ Njaf suu vi Gersonna sunda asi laɗ hu Mbutluɓ ma Tokkana ni, mbutluɓma hu kurufuna, u ma ki ii ŋgoona, baraw ma baari kayamma u gojoli ma baari hu vunnana may,

²⁶ nduŋga ŋguy kay Mbutluɓ ma Tokkana u givin ma togolla, baraw ma caki vun grekŋana, tle asina halaŋ asi golosi ni asiya.

²⁷ Njaf suu vi Kehatna ni, dee suu vi Amramma u suu vi Isarna, suu vi Hebronna u suu vi Uziyelna. Asina ca ni njaf suu vi Kehatna.

²⁸ Ndum njaf suu vi Kehatna halaŋ col ha kay gor njufii suu vuɗ li tilna ki dewna na, asi li halaŋŋi 8.600. Ni suu ka li sunda hu Mbutluɓ ma Teteɗna.

²⁹ Njaf suu vi Kehatna cuk ziisi ni ii dali ŋgoo Ziŋ Lonara na.

³⁰ Sa ma a ŋgolla fok njaf suu vi Kehatna ni Elisafan ma goŋ Uziyelna.

³¹ Sun masira asi laɗta ni, Zandukka Galamba, tabulla, va ma tin pindilla, givin ma togolla, tlesuu li sunda hu li ma teteɗna, gojolina, u tlesuu gaɓam kolo u asina halaŋ.

³² Mul ŋgol ma li ɓivunna ma fok njaf suu vi Levina halaŋŋa ni Eleazar ma goŋ Aaronna. Nam gol suu ka li sunda hu Mbutluɓ ma Teteɗna halaŋŋa ni namu.

³³ Njaf suu vi Merarina ni, dee suu vi Malina u suu vi Musina, asina ca ni njaf suu vi Merarina.

³⁴ Ndum njaf suu vi Merarina col ha kay gor njufii suu vuɗ li tilna dewna na ni, asi li halaŋŋi 6.200.

³⁵ Sa ma a ŋgolla fok njaf suu vi Merarina ni Suriyel ma goŋ Abihailna, asi cuk ziisi ni ŋgoo Ziŋ Lonara keŋ mbayaw na.

³⁶ Sunda njaf suu vi Merarina laɗta ni tlesuu min ziŋ Lonara u asina, gu ma min zira u kawi ma kalamma um gana, gu ma caki dukŋa, u tlesuu li sunda huna halaŋ, sunda jak zina kolora ni asi lay,

³⁷ nduŋga ŋguy kay kaanara u kawi ma uɗ gana halaŋ, guuɗ ma pii gana, u zeweɗ ma vaɗ kolona lay.

³⁸ Moiz u Aaron u goryosi cuk ziisi ni fun Ziŋ Lonara na gay keŋ u maɗiina na. Asi ni suu li sunda ay hu Mbutluɓ ma Teteɗna kay suu Israelna halaŋŋa, lini sa ma daŋ tuɗ ha wa tok a li sun ndaɗta ni nam miɗ kiyo.

³⁹ Ndum njaf suu vi Levina Moiz u Aaron ndumusi halaŋ ko Yawe dira na, col ha kay gor njufii suu vuɗ li tilna dewna na ni asi ndi halaŋŋi 22.000.

Mbuɗ gor suu vuɗ fok jewna

⁴⁰ Yawe di Moiz, «Ndum gor njufii suu Israel suu vuɗ fok jewna halaŋ halaŋ, col ha kay suu vuɗ li tilna dewna na, aŋ ndumusi ni ɓiirisi sesi ki dew dew halaŋ.

⁴¹ Aŋ hinin gor suu vi Levina ki ni manu. Anni Yawe, hininsina ki ni kay balam suu Israelna halaŋ. Yoori suu vi suu vi Levina ki ni man lay, ni kay balam gor yoori suu vuɗ jew suu vi suu Israelna halaŋ lay.»

⁴² Moiz ndum gor njufii suu vuɗ jew suu vi suu Israelna ki halaŋ halaŋ ko Yawe damba na.

⁴³ Ndum gor njufii suu vuɗ jew suu asi ndumusina col ha kay suu may suu vuɗ li tilna dewna na ni asi ndi halaŋŋi 22.273.

⁴⁴ Yawe hin di Moiz ana,

⁴⁵ «Varak njaf suu vi Levina kay balam suu Israelna u yoori suu vuɗ jew suu vi njaf Levina lay kay balam suu may suu Israelna. Suu vi Levina halaŋŋi mansina, ni An Yawe.

⁴⁶ Ndum gor njufii suu Israelna jak ki kay njaf suu vi Levina ni 273.

⁴⁷ Gor asina ni sana dew ni aŋ vi sikle kam vadl vadl, a mbuɗum kira, ni u sikle li sunda hu Mbutluɓ ma Teteɗna sikle ndaɗta nekeɗ ni garamma doogo doogo.

⁴⁸ Gursu namma aŋ ɦam maŋ gi Aaron u goryomu, kay a mbuɗ gor suu vuɗ jew suu vi suu Israel suu ndumusi jak ki kay njaf suu vi Levina.»

⁴⁹ Moiz yow gursura kay gor suu Israel suu ndumusi jak ki kay gor suu vi Levinana halaŋ.

⁵⁰ Gursu ma nam fam kay gor suu vuɗ jew suu Israelna ndi halaŋŋi 1,365 u sikle li sunda hu Mbutluɓ ma Teteɗna.

⁵¹ Moiz ɦal gursu ma mbuɗ gor suu Israelna namma maŋ gi Aaron u goryomu, u gaɗta vi Yawera, ko Yawe di ay maŋ Moizza na may.