NDUMBA 29 - Boy Lonana

(ɗ) Ɓivun ma lam hu basara wilira

¹ «Buu ma jewna hu til ma kiɗisiyana ni agi lagi tokka teteɗta. Agi ka li sunda nek hu buu nammaɗi, buu namma kagi ni a buu ma ci luluura.

² Agi li ɓivun ma ŋgalam kina ma his jivina maŋ Yawe, bolo mbutlna dew, gamlana dew, yow gor timigii suu basaɗasi dew dewna kiɗisiya may. Yow ni yoori suu bay ŋgulla egesina.

³ Kay puura u njaf wana, ɦal fuɗta yarasi u mbulnara ay u hu may. Bolo mbutlna ni yow fuɗta kelew dleeŋe, gamlana ni yow fuɗta kelew karkiya may,

⁴ gor timigiina ni ma dewna yow fuɗta kam kelewna hindi hindi.

⁵ Hin vi ŋgekŋa hu olo a li ɓivun ma bulum cora kina, a li ɓivun ma kay suuna belna.

⁶ Ɓivun ma ŋgalam ki namma halaŋ cukŋi kay ɓivun ma ŋgalam ki ma agi ka lam hu bunna tew tewna. U ɓivun ma lam hu buu ma jewna vi tilna. Ni ɓivun ma his jivina maŋ Yawe.

(e) Ɓivun ma hu buu ma ŋgol ma bulum cora kina

⁷ «Buu ma doogona hu til ma kiɗisiyana ni agi li tokka teteɗta, lagi laara may, hu buu namma ni agi ka li sunda nekgi.

⁸ Agi mbaa ɓivun ma his jivina fok Yawe ni ɓivun ma ŋgalam kina vi bolo mbutlna dew, gamlana dew, yow gor timigii suu basaɗasi dew dewna kiɗisiya, ni yoori suu ŋgul ka egesiɗina.

⁹ U tlege suu li puura u njaf wana ay usi may, yow fuɗta yarasi u mbulnara may. Kay bolo mbutlna ni yow fuɗta kelew dleeŋe, gamlana ni yow fuɗta kelew karkiya may,

¹⁰ u gor timigii suu kiɗisiyana ni timiina dew ni yow fuɗta kelewna hindi hindi.

¹¹ Hin vi ɦu ŋgekŋa hu olo a li ɓivun ma bulum cora kina. Ɓivun namma halaŋ cukŋi kay ɓivun ma ŋgalam ki ma agi lam hu buuna tew tewna, kay buu ŋgol ma bulum cora kina u ɓivun ma ŋgalam kina. Lam ko agi lam tew tewra na u sum veŋŋa um hu may.

(f) Ɓivunna kay luu ma vun Mbutluɓma

¹² «Buu ma doogo yam vadlna hu til ma kiɗisiyana ni agi li tokka teteɗta, agi ka li sunda nek hu buu nammaɗi. Agi lagi luu ma ŋga Yawena ta ta buuna kiɗisiya.

¹³ Agi mbaaragi ɓivun ma ŋgalam ki ma his jivina fok Yawe, bolo mbutlugina doogo yam hindi, gamlagina mba', gor timigii suu basaɗasi dew dewna doogo yam fiɗi. Ni yoori suu ŋgul ka egesiɗina.

¹⁴ U puura u njaf wana u fuɗta yarasi u mbulnara ay u may. Bolo mbutlugina doogo yam hindi ni mbutlna dew ni yow fuɗta um kelewna dleeŋe. Gamlana dew ni yow fuɗta kelewna karkiya may,

¹⁵ u gor timigiina doogo yam fiɗi ni ma dewna yow fuɗta um kelewna hindi may.

¹⁶ Agi hin ŋgaɗ ŋgekŋa a li ɓivun ma bulum cora kina hu olo. Hin cuk ɓivun ma ŋgalam ki ma lam hu buuna tew tewna u sum veŋŋa ha kayam hu olo.

¹⁷ «Hu buu ma mbana ni agi ŋgaɗ bolo mbutlugina doogo yam mba'. Ŋgaɗ gamligina mba', ŋgaɗ gor timigii suu basaɗasi dew dewna doogo yam fiɗi may, ni yoori suu ŋgul ka egesiɗina.

¹⁸ Ҥal tlesuu li puura u njaf wana ay uwa, u sum veŋŋa may. Kay bolo mbutlugina u gamlagina u gor timigiina lay, ko agi li day dayra na.

¹⁹ Hin ŋgaɗ ŋgekŋa a li ɓivun ma bulum cora kina hu olo, hin cuk ɓivun ma ŋgalam ki ma lam hu buuna tew tewna u puu mamba u sum veŋŋa ha kayam hu olo.

²⁰ «Hu buu ma hindina ni ŋgaɗ bolo mbutlugina doogo yam dew. Ŋgaɗ gamlagina mba', ŋgaɗ gor timigii suu basaɗasi dew dewna doogo yam fiɗi may. Ni yoori suu bay ŋgulla egesina.

²¹ Ҥal tlesuu li puura u njaf wana ay uwa, u sum veŋŋa may. Kay bolo mbutlugina u gamlagina u gor timigiina lay, ko agi li day dayra na.

²² Hin ŋgaɗ ŋgekŋa a li ɓivun ma bulum cora kina hu olo, hin cuk ɓivun ma ŋgalam ki ma lam hu buuna tew tewna u puu mamba u sum veŋŋa ha kayam hu olo.

²³ «Hu buu ma fiɗina ni ŋgaɗ bolo mbutlugina doogo, gamlagina mba', gor timigii suu basaɗasi dew dewna doogo yam fiɗi may. Ni yoori suu ŋgul ka egesiɗina.

²⁴ Ҥal tlesuu li puura u njaf wana ay u wa u sum veŋŋa may, kay bolo mbutlugina, gamlagina u gor timigiina ko agi li day dayra na.

²⁵ Hin ŋgaɗ ŋgekŋa a li ɓivun ma bulum cora kina hu olo, cuk ɓivun ma ŋgalam ki ma lam hu buuna tew tewna u puu mamba u sum veŋŋa ha kayam hu olo.

²⁶ «Hu buu ma vadlna ni ŋgaɗ bolo mbutlugina dleeŋe, gamlagina mba', gor timigii suu basaɗasi dew dewna doogo yam fiɗi may. Ni yoori suu bay ŋgulla egesina.

²⁷ Ҥal tlesuu li puura u njaf wana ay uwa, u sum veŋŋa may, kay bolo mbutlugina, gamlagina u gor timgigirina ko agi li day dayra na.

²⁸ Hin ŋgaɗ ŋgekŋa a li ɓivun ma bulum cora kina hu olo. Cuk ɓivun ma ŋgalam ki ma lam hu buuna tew tewna u puu mamba u sum veŋŋa ha kayam hu olo.

²⁹ «Hu buu ma karkiyana ni ŋgaɗ bolo mbutlugina kalavandi, gamlagina mba', gor timigii suu basaɗasi dew dewna doogo yam fiɗi. Ni yoori suu bay ŋgulla egesina.

³⁰ Ҥal tlesuu li puura u njaf wana ay uwa, u sum veŋŋa kay bolo mbutlugina, gamlagina u gor timigiina ko agi li day dayra na.

³¹ Hin ŋgaɗ ŋgekŋa a li ɓivun ma bulum cora ki hu olo, cuk ɓivun ma ŋgalam kina ma lam hu buuna tew tewna u puu mamba u sum veŋŋa ha kayam hu olo.

³² «Buu ma kiɗisiyana ni ŋgaɗ bolo mbutlugina kiɗisiya, gamlagina mba', gor timigii suu basaɗasi dew dewna doogo yam fiɗi. Ni yoori suu bay ŋgulla egesina.

³³ Ҥal tlesuu li puura u njaf wana ay u wa u sum veŋŋa may. Kay bolo mbutlugina, gamlagina u gor timigiina ko agi li day dayra na.

³⁴ Hin ŋgaɗ ŋgekŋa a li ɓivun ma bulum cora kina u puu mamba hu olo, cuk ɓivun ma ŋgalam ki ma lam hu buuna tew tewna u puu mamba u sum veŋŋa ha kayam hu olo.

³⁵ «Hu buu ma kalavandina ni buu ma luu magina daɓ huna, agi ka li sunda nek coco hu buu nammaɗi.

³⁶ Agi mbaa ɓivun ma his jivi ma ŋgalam kina ay fok Yawe, bolo mbutlna dew, gamlana dew, gor timigii suu basaɗasi dew dewna kiɗisiya may. Ni yoori suu bay ŋgulla egesina.

³⁷ Ҥal tlesuu li puura u njaf wana ay u wa u sum veŋŋa kay bolo mbutlna, gamlana u gor timigii suu basaɗasi dew dewna ko agi li jewra na.

³⁸ Hin ŋgaɗ ŋgekŋa a li ɓivun ma bulum cora kina hu olo, cuk ɓivun ma ŋgalam ki ma lam hu buuna tew tewna u puu mamba u sum veŋŋa ha kayam hu olo.

³⁹ «Gola ni ɓivun ma agi lam maŋ Yawe hu buu ma ŋgaaginana. Ni doorogi ka kay ɓivun magi ma agi min a lam u min magiranaɗi, ɓivun ma ŋgalam kina, puura u njaf wana, sum veŋŋa u ɓivun ma heɓpa.»