NDUMBA 28 - Boy Lonana

Gaɗta kay ɓivun ma lam zeɗ zeɗna (a) Ɓivun ma lam hu buuna tew tewna

¹ Yawe di Moiz ana,

² «An di dlara ha maŋ suu Israelna ko wanda na. Hu buuna halaŋ, asi mbaaran ɓivun masina ay hu li ma ŋgaam na ŋgana ni tiinna lan ɓivun ma his jivina.

³ Aŋ dasi ana, Gola ni ti ma agi mbaaram maŋ Yawena. Gor timigii suu basaɗasi dew dewna mba', ni suu bay ŋgulla egesina, mbaarasi ni hu buuna dew dew halaŋ a li ɓivun ma ŋgalam kina.

⁴ Goo timii ma jewna ŋgaɗammi maɗiiya, ma mbana ŋgaɗammi fiɗigi goona gege may.

⁵ Kay puura u njaf wana, yow fuɗta kelewna hindi, vo mbul conona duk litir dew u nus may.

⁶ Ɓivun ma ŋgalam ki namma lami na tew tew, ko lam ay ŋgoo bagi u ɦinira Sinayra na. Li ti ma his jivina maŋ Yawe.

⁷ Goo timii ma ŋgaɗam maɗiina lam u sum veŋŋa litir dew u nus tuɗum ha fok Yawe hu Mbutluɓ ma Teteɗna.

⁸ Goo timii ma ŋgaɗam fiɗigi goona gige na li tlena dukum ni ko ma maɗiina na lay. Ti namma maŋ Yawe ni a ɓivun ma his jivina.

(b) Ɓivunna hu buu ma vi Lonna

⁹ «Hu buu ma vi Lonna ni mbaa gor timigii suu basaɗasi dew dewna ay mba' ni suu bay ŋgulla egesina, mbay puura u njaf wana u fuɗta kelewna karkiya may, yarasi u mbulna vo sum veŋŋa hu may.

¹⁰ Ɓivun ma ŋgalam ki namma lam hu buu ma vi Lonna tew tew, u puur ta sum veŋ ndaɗta taɓ u ɓivun ma ŋgalam ki ma lam hu buuna tew tewna hu olo.

(ɓ) Ɓivun ma lam hu buu ma jewna vi tilnana

¹¹ «Hu buu ma jewna vi tilna tew tew ni agi li ɓivun ma ŋgalam kina fok Yawe, mbaa bolo mbutlugina ay mba', vi gamlana ay dew, yow gor timigii suu basaɗasi dew dewna ay kiɗisiya may halaŋŋi yoori suu bay ŋgulla egesina.

¹² Bolo mbutlna dew ni mbaa puura njaf wana u fuɗta yarasi u mbulnara ay umu, mbutlna dew ni fuɗta ii kelewna dleeŋe, gamlana dew ni fuɗta ii kelewna karkiya.

¹³ Goo timiina dew ni fuɗta ii kelewna hindi may. Ni ɓivun ma ŋgalam ki ma his jivi cin Yawena.

¹⁴ Sum veŋ ma ɦam a ɓivunna ni bolo mbutlna dew ni ɦal litir hindi, gamlana dew ni ɓal litir mba', goo timiina dew ni ɦal litir dew u nus. Ni ɓivun ma ŋgalam ki ma agi lam hu buu ma jewna vi tilnana hin li ni na.

¹⁵ Agi hin ŋgaɗ ɦu ŋgekŋa maŋ Yawe hu olo a li ɓivun ma bulum cora kina. Hin li ɓivun ma ŋgalam ki ma lam hu buuna tew tewna ha hu olo u sum veŋŋa hu may.

(c) Ɓivun ma hu buu ma Pakŋa

¹⁶ «Til ma jewna hu buu ma doogo yam fiɗina, ni luu ma Pakŋa, kay a ŋga Yawera.

¹⁷ Buu ma doogo yam vadlna ni buu ma luuna, li buuna kiɗisiya ni agi ti ni fu ma bay kuffa dukumma.

¹⁸ Hu buu ma jew ma gijaŋ luuna ni buu ma tokka teteɗta, agi ka li sunda nek coco hu buu nammaɗi.

¹⁹ Agi mbaa ɓivun ma ŋgalam kina fok Yawe. Bolo mbutlugina mba', gamlana dew, gor timigii suu basaɗasi dew dewna kiɗisiya. Agi yow ni yoori suu bay ŋgulla egesina.

²⁰ Yoona dew ni u puura u njaf wana mamba u fuɗ mamba fuɗ mamba yarasi u mbulnara ay kamu. Bolo mbutlna dew ni fuɗta kelew dleeŋe, gamlana fuɗta kelew karkiya.

²¹ Goo timii dew ni fuɗta kelew hindi may.

²² Hin ŋgaɗ ɦu ŋgekŋa u olo a li ɓivun ma bulum cora kina, nam mba maɗ kom kagi a li ɓivun ma bulum dla cora ki kagina.

²³ Agi li wa ni hin li ɓivun ma ŋgalam ki ma lam maɗii tew tewna hu olo.

²⁴ Hu buuna kiɗisiya ni agi li ɓivun ma ŋgalam ki ma his jivina maŋ Yawe tew tew. Hu buuna tew tew Yawe hum his ma jivina. Hin li ɓivun ma ŋgalam kina hu buuna tew tewna u sum veŋŋa hu olo.

²⁵ Hu buu ma kiɗisiyana ni agi li tokka teteɗta, buu namma ni agi ka li sunda nek huɗi.

(d) Luu ma Pantekotna

²⁶ «Hu buu ma agi ɦal yam tlesuu ne ki fok jewna ay maŋ Yawe a li luu ma buu ma kiɗisiyana ni agi lagi tokka teteɗta. Buu namma agi ka li sunda nekgi.

²⁷ Agi li ɓivun ma ŋgalam kina maŋ Yawe ma his jivina, bolo mbutlugina mba', gamlana dew, gor timigii suu basaɗasi dew dewna kiɗisiya may.

²⁸ Ҥal puura u njaf wana ni fuɗta ay usi hu may. Bolo mbutlna dew ni fuɗta kelew dleeŋe, ki yarasi u mbulna, gamlana fuɗta kelew karkiya.

²⁹ Gor timigiina kiɗisiya ni ma dewna ɦal fuɗta kelew hindi hindi may.

³⁰ Hin ŋgaɗ ɦu ŋgekŋa hu olo a lagi ɓivun ma bulumugi coogira kina may.

³¹ Agi hin li ɓivun ma ŋgalam ki hu buuna tew tewna ha kayam hu olo u sum veŋŋa hu may, agi yow ni yoori suu bay ŋgulla egesina.