NDUMBA 27 - Boy Lonana

Gaɗta kay jo ma vi Gorɓiinana

¹ Selofad goŋ Heferna, goŋ Galaadna, goŋ Makirna, goŋ Manasena, goŋ Josefna, Selofad goryom suu tamagina kaa, sesi ana, Mala, Nowa, Hoga, Milka u Tirsa.

² Asi mbay fok Moiz, fok mul ma li ɓivunna, Eleazar, fok suu ŋgolo suu kaɓakŋa, fok suu toki suu Israelna halaŋ fun Mbutluɓ ma Tokka di ana,

³ «Bumi miɗ ay ki ni ŋgoo bagi hu fulla, nam ay ka duk suu taɓ tasi a duu u Yawenaɗi, nam ay ka duk suu u Korenaɗi, nam miɗ ki ni kay coomba kay tamba. Na may nam go njuf ka kombi.

⁴ Agi minni a sem bumi bulum ki duk somoyom gaw kay go njuf ka kombira su? Ҥami liimina ko agi ɦal lina maŋ gorseŋ Buminara na may.»

⁵ Moiz tuɗ joɓ Yawe kay boy masina.

⁶ Yawe di Moiz ana,

⁷ «Gorɓii suu vi Selofadna boy masina ni u voɗomu. Aŋ ɦasi tiisina a jona ni ko aŋ ɦal lina maŋ gorseŋ businara na may, aŋ ɦasi jo ma vi busina ni masiya.

⁸ Aŋ hin ɓak ki maŋ suu Israelna ana lini sana miɗ wa hin go njuf kaɗi, joom hin ka ni maŋ goromba tamara.

⁹ Lini go tama ka kombi lay ni agi ɦam joom maŋ gorsemma.

¹⁰ Lini wayam kaɗi ni agi ɦam joom maŋ gorseŋ bumma.

¹¹ Lini bum wayam kaɗi ni agi ɦam joom maŋ suu deeresi egem tokŋa, sa ma hu deeresi namma hin yowom joommi namu. Gaɗ ndaɗta hin ka ni maŋ suu Israelna kay tlesuu kosina, ko gaɗta Yawe ɦaɗ ka maŋ Moizza na.»

Josuwe varak balam Moiz

¹² Yawe di Moiz ana, «Ɗiŋ ay kolo kay ɦinira Abarimba, gol mbassa an min a ɦaɗ maŋ suu Israelnara ki halaŋ halaŋ.

¹³ Aŋ hin waɗu, may aŋ taŋga ka hin liɗi kama, aŋ hin tuɗ ki ni eg somoyoŋu, ko wayaŋŋa na may.

¹⁴ Ni kay ana ay ŋgoo bagi hu fulla Sinda hu li ma suu Israelna halan a ɦonira, aŋ lay li ka u dlara an daŋgaraɗi hu li ma an daŋ ana takan teteɗ manda ki fok suuna u mbo ma ɓaɗ ay ki duk ɦinirana.» Ni mbo ma Meriba ay hu Kades hu fulla Sindana.

¹⁵ Moiz hin di Yawe ana,

¹⁶ «Ko Yawe Lona ma Musukŋa kom halaŋŋa, man sa ma daŋ a tuɗ fok suu Israelna a ŋgolla.

¹⁷ Sa namma hin kal kiyo tuɗ fok suuna, nammi sa ma hin cukusi ki kiɗik lay, hoŋosi vo layna. Na ni suu vi Yawena ka hin li ko timigii suu bay sa ma taarasina kasira naɗi.»

¹⁸ Yawe hoŋ dira maŋ Moiz ana, «Vi Josuwe ma goŋ Nunna nammi sa ma oy u Musukkana, aŋ tuɗ tin koŋ kamu.

¹⁹ Aŋ tuɗ takam ki maŋ mul ma li ɓivunna Eleazar, ki maŋ suu Israelna halaŋ lay. Aŋ ɦam sunda ki ni fokosi na halaŋ.

²⁰ Aŋ ɦam saɓak maŋŋa egemu, kay a suu Israelna halaŋ mba hum umu.

²¹ Nam col fok mul ma li ɓivunna Eleazar, nam joɓom minda vi Yawe kam u va ma yam ana Urimma u min ndaɗta asi ndak cuk ki bunsu lay, hoŋ ay kalafi lay, nam u suu Israelna halaŋ.»

²² Moiz li ko ndal Yawe damba na may, nam tay Josuwe tuɗ takam fok mul ma li ɓivunna Eleazar, fok suu Israelna halaŋ lay.

²³ Nam tin kom kamu, hin ɦam sunda, ko ndal Yawe dam ay fun Moizza na may.