NDUMBA 25 - Boy Lonana

Hu Peor suu Israelna goɓ loogi suu ɦawana

¹ Suu Israelna vi mbutluɓ masisina hu Sitim, suuna gijaŋ li dla cora u gorɓii suu Moabma.

² Gorɓiina yi suu Israelna ha hu givin ma togolla masi vi loogi suu ɦawana, suu Israelna ti ay hu lay goɓ fok loogi suu ɦawana lay.

³ Suu Israelna cuk tasi ga mbaɓura vi Baal ma vi Peorna. Yawe mbuɗ ki yara egesi cocoo.

⁴ Yawe di Moiz ana, «Yow suu ŋgolo suu fok suunana ay halaŋ halaŋ, ɓalasi ki kolo fok Yawe, ii faɗta na gay, kay ana yara ŋgol cocora vi Yawe mba kay suu Israelnaɗi.»

⁵ Moiz di suu kaɓak suu Israelna ana, «Gegelay dukugi ni ci suu mam suu ay fun Baal ma vi Peorna kiyo.»

⁶ Hu li ma suuna ka moli fun Mbutluɓ ma Tokka tii may ni, gola ni sa ma Israelna dew kal ay dukusi u goora Madiyanda umu, ni ii Moiz u suu Israelna na halaŋ gaw lay.

⁷ Hu li ma mul ma li ɓivunna Pinhas, ma goŋ Eleazar ma goŋ Aaronna, wam na ni, col kolo duk suu tokina na ɦoɗ ni, tli saɓpa kommi na gaw.

⁸ Nam tuɗ ha u sa namma hu Mbutluɓ ma nam buu huna, kal ha usi ni na gaw, nam cokosi ki u saɓpa jak sana u cara lay, cokosi u digirisiya. Hu li namma na gaw ni saara vi tuguɗiira ci suu Israelna seŋŋi na gaw.

⁹ Suu miɗ ko tuguɗii ndaɗtana 24,000.

¹⁰ Yawe di Moiz ana,

¹¹ «Mul ma li ɓivunna Pinhas, goŋ Eleazar ma goŋ Aaronna, heɓen hurun eg suu Israelna wa hu li ma nam tak yaam ki kay balam sen dukusina. Kay ndaɗta an ka u hurun ma yara a daɓ suu Israelna kira oloɗi.

¹² Ni na ɗow aŋ dam ana, gola cemi ni an ɦam galam manda wa, ni u heɓpa.

¹³ Heɓ ndaɗta ni mamu, maŋ njafam ma ka daganna lay. Galam ndaɗta njunusi a li sunda ɓivunna a fafaɗta kay ana nam tak yaamba ki kay Loomma, nam li dlara mbus cora vi suu Israelna kira.»

¹⁴ Sa ma Israel ma cam ki namma sem ana Zimri ni goŋ Saluna. Nammi sa ma gol suu vi Simeonna halaŋŋa.

¹⁵ Ca mayra caɗ ki ta goora Madiyanda seɗ ana Kozbi ni goŋ Surra, buɗ ni a ŋgolla fok njaf suu taa hu Madiyan may.

¹⁶ Yawe di Moiz ana,

¹⁷ «Tuɗugi nduk suu Madiyanna casiya.

¹⁸ Kay asi ni suu mbaaragi dlara kagi u dlaasira cora vi ful masina Peorra, u cara yaɗ ana Kozbi ta goŋ sa ŋgol ma fok suu Madiyanda, wayasira caɗ ki ni hu buu ma tuguɗiira ndi kagina may ni kay boy ma vi Peorna.»

Ndum suu Israelna a yamba mbara

¹⁹ Ŋgoo tuguɗii ndaɗta ni,