NDUMBA 23 - Boy Lonana

¹ Balaam di Balak ana, «Minin givin ma togolla tani na kiɗisiya, ŋgaɗ bolo mbutlugina na kiɗisiya may, ŋgaɗ gamla timigiina na kiɗisiya may.»

² Balak li ko ndal Balaam damba na may. Ŋgoo dagan asi jak ŋgaɗ mbutl dew may, ŋgaɗ gamla dew may, kay givin ma togolla masi ma li ɓivunna jak.

³ Balaam di Balak ana, «Col ka kolo u seŋ eg givin ma togolla maŋ ma ŋgal ɓivunna na tok, an may ni ɦuɗ tan ha ki na day, kala Yawe li ŋgafan ay kala ni, boy ma nam danna ayna an hin mba cuɗuŋŋa.» Nam ɗiŋ kolo kay mbura yaɗ ki ɗi ɗira.

⁴ Lona mbay fok Balaam, Balaam hin dam ana, «An min givin ma togolla ka kiɗisiya, hu li namma an ŋgaɗ bolo mbutl dew may, gamla dew may, ki kasi dew dew bel.»

Balaam paɗ vunum kay suu Israelna

⁵ Yawe kal boy mamma ay fun Balaam dam ana, «Hoŋ eg Balak aŋ tuɗ di ko an daŋ ha wanda na.»

⁶ Balaam hoŋ ay eg Balak, mba fam coli eg givin ma togolla zol, u suu ŋgolo suu hu Moabma halaŋ.

⁷ Balaam di boy ma joɓpa u ndal boyna ana, «Balak mul ma Moabma yan ay u maɗiina day, mul ma Moabma yan ay di ana mbaya, mbay gi vunna maŋ Yakob, mbay baan suu Israelna kiyo.

⁸ An hin gi vunna maŋ sa ma Lona gam vunna kaɗina ni nanage? An hin ba sa ma Yawe baam ka kiɗina ki ni nanage?

⁹ Ay kolo kay ɦinira day an golosi aya, kolo kay li mbuyna an saarasi ki jiviya, an wasi ni asi ni suu ki vay dasi zeɗna, ndumusi ka duk njaf suu halaŋŋaɗi.

¹⁰ Njaf suu vi Yakobma ni ko ndal ŋgetlna na, sa ma ndak a ndumusina ni gege? Suu zuli coco suu Israelna sa ma ndumusina ni gege? An min ana an miɗ ni miɗ ma vi suu ɗegee asina may. Ko buu manna daɓ hu duliyara ni ko masina na may.»

¹¹ Balak di Balaam ana, «Aŋ a lan egenni dla mege? An yaŋ ay ni ana aŋ gan vunna maŋ suu babali mansina, gola cemi ni aŋ hin zaŋ paɗ vunuŋ ki kasi paɗi na ɗow.»

¹² Balaam hoŋom dira ana, «Lini nanagelay an di ki ni va ma Yawe dan ana an damuna.»

Boy ma Balaam dam a mbarana

¹³ Balak hin di Balaam ana, «Mbay ki un hu li ma daŋŋa tani, ni aŋ hin wi suu asina ha ki jiviya kay aŋ wasi jew ni keŋ dew ɦawaa, wasi ka ki halaŋgi, ay hu li namma ɗaŋŋi aŋ gansina vunna.»

¹⁴ Nam tuɗum ha ki kolo kay li ma suuna juɓ u zina huna, kolo kay ɦinira Pisgara, hu li namma nam min givin ma togolla kiɗisiya, ŋgaɗ bolo mbutlugina kiɗisiya, ŋgaɗ gamlagina kiɗisiya may.

¹⁵ Balaam di Balak ana, «Col ka eg givin ma togolla maŋ na tok, an may ni tuɗ ha ki tana nda juɓ tu may.»

¹⁶ Yawe mbay fok Balaam, mba kalam boyna ay funum dam ana, «Hoŋ eg Balak, aŋ tuɗ ɓakŋi ko ndaɗta na.»

¹⁷ Balaam hoŋ ay eg Balak, mba fam coli eg givin ma togolla mam u suu ŋgolo suu Moabna zow. Balak joɓom ana, «Yawe daŋ ay ana mege?»

¹⁸ Balaam gijaŋ di boyna u ndal boyna ana, «Balak, col kolo, hum haa. Goŋ Siporna, tin humuŋ ha huma.

¹⁹ Lona nam ka sa war a kaboyɗi. Nam ka goŋ Adam a mbuɗ saa mamba na zakgi. Lona di dlara wa ni nam hin bay laɗ su? Nam di boyna di ni hin doli bay lambi su?

²⁰ Nam dan ana an paɗ vunun ki kasiya, kay nam u tamba paɗ vunum ki kasiya. An may ni ka ndak a mbuɗ boy nammaɗi.

²¹ Dlara gunira sa ka waɗ duk njaf suu vi Yakobmaɗi, lassa sa ka waɗ duk suu Israelnaɗi. Yawe Loosina ka u asiya. Vo varasi ni asi ka gi soolla geleɗ mulnara tew tew.

²² Lona cukusi ay ki hu mbassa Egiptera, asi ka u saɓakŋa ni ko ndal vunda na.

²³ Dlara kumuna ka tew eg suu vi Yakobmaɗi, dlara joɓ fulina ka li suu Israelnaɗi. Suu Israelna hum dlara Lona min a laɗta ni hu liiɗu.

²⁴ Suu asina yow kolo ni ko dlona na, asi vi va ma asi gaaramma ki tu wa ci busu va namma ki tuwa, ŋgoo dagan hin buu ga koɗ tasi ni na.»

²⁵ Balak di Balaam ana, «Lini aŋ ka gasi vunnaɗi ni, mariyaɗ ni paɗ vunuŋ ki kasi jimiɗi.»

²⁶ Balaam hoŋom dira ana, «An daŋ ka ana an hin li halaŋŋi dlara Yawe hin danda ayra naɗi su?»

Balaam paɗ vunum ki a hindira

²⁷ Balak di Balaam ana, «Mbaya an jokoŋ uŋ ki hu li ma daŋŋi, hu li namma ni Lona li hin vi kam a aŋ gan vunna maŋ suu asinara kalage.»

²⁸ Balak tuɗ Balaam ha ki kolo kay ɦinira Peorra, ha ki hu fulla ŋgoo bagi na.

²⁹ Balaam hin dam ana, «Minin givin ma togolla tani na kiɗisiya, ŋgaɗ bolo mbutlugina kiɗisiya, gamlagina kiɗisiya may.»

³⁰ Balak li ko Balaam damba na may, nam ŋgaɗ bolo mbutlugina u gamlagina ki kay givin ma togolla dew dew halaŋ.