NDUMBA 22 - Boy Lonana

SUU ISRAELNA ŊGOO BAGI HU FULLA MOABPA Mulna Balak yi Balaam aya

¹ Suu Israelna hoŋ hoŋŋi tuɗ hu mbassa Moabpa, vi mbutluɓ masina u maɗiina fun lum ma Yurdanna, vok tasi tok u ɦoŋzi ma Yerikona.

² Balak ma goŋ Siporna wi dlara suu Israelna laɗ ay eg suu Amornara halaŋ.

³ Suu Moabma wi suu asina zulira cocora na ni, mbuɗ ki ndaa cocoo. Asi wi suu Israelna na ni tasi dlak ki ndaana ɦay.

⁴ Suu Moabma di suu ŋgolo suu Madiyanna ana, «Suu zuli asina hin ti tlesuu ŋguy kaygina ki ni halaŋ ko ndal bolo mbutlna a ti tlena ki hu senena ɦawa na.» Hu li namma ni Balak ma goŋ Siporna a mulna hu Moab ni namu.

⁵ Nam cuk suu vun sunda eg Balaam ma goŋ Beorna hu Peor fun lumma Efrat hu mbas mamba a yam aya, dam ana, «Suuna ka egemi tani col ay Egipte kuluɓ yam mbassa ki na halaŋ halaŋ, asi mba vi mbutluɓ masina vogon tani na gay.

⁶ An ceneŋu aŋ mbay zak mba gasi vunna, kay asi saɓak coco suunu. Kala an li hin ndak a su kasi a casi kala, dikisi ki hu mbassa kala. Kay an wi ki ana sa ma aŋ paɗ vunuŋ ki kamma nam kak heɓe, sa ma aŋ gam vunnana ki ni baay may.»

⁷ Suu ŋgolo suu Moabma u suu ŋgolo suu Madiyanna yow tlesuu warak sa ma joɓba kosi yow ni mbay vi Balaam. Asi mba cuɗum boy ma Balak dasina ayna.

⁸ Balaam dasi ana, «Buurugi tani, an hin hoŋogi dira ni u va ma Yawe hin danna karam njeŋgena.» Suu ŋgolo suu Moabma hin buu may.

⁹ Lona mbay eg Balaam dam ana, «Suu may suu buuri vo varaŋ asina ni suu taarage?»

¹⁰ Balaam di Lona ana, «Balak ma goŋ Sipporna mul ma vi suu Moabma, sunusi ay egen ana,

¹¹ Gola suuna ka tani cuk ay ki hu Egipte, mba tli yam mbassa ki na halaŋ halaŋ. Aŋ mbay kala ni gansina vunna. An li hin ndak a duu u asi a dikisi kalage.»

¹² Lona di Balaam ana, «Aŋ ka tuɗ u asiɗi, aŋ ka a gi vun maŋ suu asinaɗi lay, kay suu asina vunna ki paɗi kasiya.»

¹³ Vin maɗiira wanni Balaam col kolo di suu ŋgolo suu vi Balakŋa ana, «Hoŋogi vo hu mbas magira, Yawe dooron ki ana an tuɗ u agiɗi.»

¹⁴ Suu ŋgolo suu Moabma yow aya, hoŋ ay vo eg Balak. Asi dam ana, «Balaam min ka a tuɗ ay umiɗi.»

¹⁵ Balak hin sun suu ŋgolo suu daŋŋa olo, suu asina bolowo, dlasi ŋgol su suu jewna lay.

¹⁶ Suu asina mba tew eg Balaam tew ni dam ana, «Balak ma goŋ Sipporna dami ay ana, an ceneŋ ceniya, aŋ hin ha ki bay a mbay varanɗi.

¹⁷ Kay an hin a li dlara ŋgaaŋga cocoo, dlara aŋ hin a dandara an hin laɗ halaŋ mbay ɗow, mbay yan tlena ki kay suu asina.»

¹⁸ Balaam hoŋ dira maŋ suu Balak cukusi hana ana, «Lini Balak ɦan gursuna u lorra oy hu ziimba ki halaŋ lay, an ka ndak a li va ma ŋgol lay, ma goo ew lay ki bay Yawe, Loonna, ɦan voɗta ay baɗi.

¹⁹ Agi may ni buurugi varan tani, a juɓ va ma Yawe hin danna karam njeŋgena.»

²⁰ Lona mbay njeŋge eg Balaam dam ana, «Nam li yaŋŋi ana aŋ tuɗ ha eg suu asina ɦawa kala ni aŋ tuɗa, may dlara an hin daŋgara aŋ laɗ ni ndaɗu.»

Balaam u kor mamba

²¹ Vin maɗii feɗet ni Balaam col kolo gan kor mamba tuɗ u suu ŋgolo suu Moabma.

²² Lona wam nam tuɗ na ni hurum ɓeŋ ki cocoo, sa sunda vi Yawe col ki fokom hu voɗta a doorom voɗta kira, may ni nam tuɗ ha u kor mamba gak may, suu mam suu sunumma fokom mba may.

²³ Korra wi sa sunda vi Yawe col ki hu voɗta baa voɗta ki u ŋgew ma dikina ki paɗi kom siiliya, korra hin voɗta ta ni es ki keŋe, Balaam gijaŋ waɗ korra a hoŋoɗ ay hu voɗtara.

²⁴ Sa sunda vi Yawe col ki hu voɗta ɦeɓi cocora duk senena, gulumuna ay ki gi keŋ voɗta gaw may.

²⁵ Korra wi sa sunda vi Yawe na ni ndaɗ ɦeɓ taɗ eg gulumuna ɦatl sem Balaam eg gulumunna, nam gijaŋ a waɗ korra olo.

²⁶ Sa sunda vi Yawe huɗusi ha hu li ma ɦeɓi cocona, korra ka fi li ma es keŋ oloɗi lay.

²⁷ Korra wi sa sunda vi Yawe ki fokoɗ na ni, ndaɗ buu ga u Balaammi na gaw, nam hurum beŋ ki cocoo, mbuɗ waɗaɗ u tokolora.

²⁸ Yawe mal vun korra ki ndaɗ mbuɗ ɓaka, joɓ Balaam ana, «An laŋŋi me saɓaki na a aŋ waɗan ki ca yaŋ na hindi day nige?»

²⁹ Balaam hoŋoɗ dira ana, «Kay ndak pananni paniya an kof day li ni ŋgew konu ni an li ŋgaɗak ki wa.»

³⁰ Korra di Balaam ana, «Anni kor maŋga aŋ ka fulun tew tewraɗi su? An ka day laŋ dlara ko ndaɗta na ki egeŋ dew su?» Balaam hoŋoɗ dira ana, «Ҥawaa.»

³¹ Yawe mal ii Balaam ki na ni, nam wi sa sunda vi Yawe ki coli hu voɗta u ŋgew ma dikina ki paɗi kom siiliya. Balaam gi yam ki gaa, girif ga u vun givim daɓ vogom duk ndaŋgara.

³² Sa sunda vi Yawe dam ana, «Aŋ waɗ kor maŋga yaŋ na hindi day ni kay mege? Aŋ wiya an mbay a dooroŋ voɗta ki ni anu. Kay an wi ana koy maŋ ndaɗta ka tuɗuŋŋi hu dlara jiviɗi.

³³ Korra wanu, ndaɗ tuɗ ki yaɗ hindi a ŋgay taɗ ki konda, lini ndaɗ li ka gin naɗi ni an caŋ ki ni cecemi gaw, u dlara ndaɗ li nara iiri maŋga suɗ wa.»

³⁴ Balaam di sa sunda vi Yawe ana, «An li co wa, kay an wi ka ana aŋ ka fokonuraɗi, cemi ni lini koy ndaɗta ka iriŋ jiviɗi ni an hoŋ dagani.»

³⁵ Sa sunda vi Yawe hin dam ana, «Tuɗ u suu asina, may ni aŋ hin tuɗ di ni dlara an daŋgara.» Balaam hin tuɗ u suu ŋgolo suu vi Balakŋa.

Balak ŋgaf Balaam u furira

³⁶ Hu li ma Balak hum ana Balaam ka tuɗ ay ana ni nam mba ŋgafam vogom ha ki ni hu zi ma yam ana Ar Moabma ni ii hakara u Arnon a kal ay hu mbas mambara.

³⁷ Balak dam ana, «An sun suuna ha bolow coco a yaŋ ayraɗi su? Aŋ hin mbay ginɗi ni kay mege? An ka iriŋ ndaki a ŋgaaŋgi su?»

³⁸ Balaam hoŋom dira ana, «Na an cemi mbay egeŋ wa tok, ka ana an hin njaɗ boyna ha ni ɦawa na njaɗ njaɗ naɗi, boy ma Lona kalanna ay fununna an hin dammi namu.»

³⁹ Balaam tuɗ u Balak, asi mbay hu zi ma Kiriyat Husotna.

⁴⁰ Balak li ɓivunna u yoori suu ŋgolona u suu gorina, nam sun ɓorow ma vi Balaamma u suu ŋgolo mam suu ay umma ha may.

Boy ma Balaam dam jewna

⁴¹ Vin maɗiira ni Balak tay Balaam ay mba ɗiŋim ki kolo hu Bamot Baal ni hu li ma asi wi suuna ha molina.