NDUMBA 20 - Boy Lonana

Mbo ma Meribana

¹ Suu Israelna tew ki ŋgoo bagi hu fulla Sinda ni hu til ma jewna. Suuna vi ziisi hu Kades. Hu li namma Miriyam miɗ ni huwa, asi paɗ ni ŋgoo bagi huwa.

² Hu li namma ni suu Israelna ka fi yo ma ciɗi, kay ndaɗta asi tok ay eg gi Moiz u Aaron.

³ Suu Israelna hal ɦonira u Moiz. Asi di ana, «Lini ami ba ha ki ko yara vi Yawera ko gorsemina ba ha ki wanda na ni mariyaɗ.

⁴ Aŋ mbaa suu vi Yawena ay ki ŋgoo bagi tani ni kay mege? Ni a ami miɗ ki u yoori mamisina halaŋga su?

⁵ Agi cukumi ay ki hu mbassa Egiptera ni kay mege? Mba lakami ki hu li ma co namma na ni amege? Li namma ka li ma horokgi lay, ka li ma pi gu tulummaɗi lay, gugutlura u grenadinna ka li taniɗi lay. Mbo ma cira lay ka fam taniɗi.»

⁶ Moiz u Aaron hin suuna ha ki tani mbay ki fun Mbutluɓ ma Tokka. Asi girif ga daɓ vogosi gaa, bibiŋil Yawera tak taɗ ki irisiya.

⁷ Yawe di Moiz ana,

⁸ «Tli tokolo maŋga agi u wayaŋŋa Aaron tokogi suuna aya, fok suuna na ni agi ɓak ɦinira ndaɗ ɦagi yooɗna aya. Aŋ ɓaɗasi mbo ma ay duk ɦinirana ay kiyo, aŋ ɦal yo ma cira maŋ suu tokkina halaŋ, maŋ yoori masisina lay.»

⁹ Moiz hum boy namma na ni nam tuɗ tli tokolo mayra ay gii fok Yawera kiyo.

¹⁰ Moiz u Aaron tok suuna ay eg ɦinira dasi ana, «Humugi haa, agi suu gonokka, ami ndak a ɓaɗagi mbona ay ki duk ɦini ndaɗta su?»

¹¹ Moiz taɗ kom ki u tokolo mamba waɗ ɦinira yam mba', mbona ɓaɗ ay ki cocoo. Suuna halaŋ ci yona, yoori masisina halaŋ ci lay.

¹² Yawe di gi Moiz u Aaron ana, «Agi vangi vunun kaɗi, takangi teteɗ manda ka ki fok suu Israelnaɗi, kay ndaɗta agi ka ndak a cuk suu Israelna hu mbassa an vi vunun kaɗ a ɦasiraraɗi.»

¹³ Ni mbo ma Meribana, ni ana Honira, ni hu li ma suu Israelna hal a li ɦonira u Yawena, nam tak teteɗ mamba kiyo.

Mul ma Edomma ka min a suu Israelna jak varambi

¹⁴ Ay hu Kades Moiz cuk suuna ha eg mul ma Edomma a joɓom ana, «Gola wayaŋŋa Israel mba joɓoŋŋi ana, aŋ lay wi lassa ami ka las wanda.

¹⁵ Somoyomi tuɗ ki hu Egipte, ami lak ay ki hu ni basara bolow cocoo. Suu Egiptena lasami ay cocoo, ami u somoyomi halaŋ.

¹⁶ Ami tii eg Yawe, nam humumi tii mamina. Nam sun saam ma sunda huulona cukumi ay ki hu mbassa Egiptera. Gola cemi ni ami ka laki hu Kades, ni ɦoŋzi ma ii hakara u aŋŋa.

¹⁷ Aŋ hinimi ami jak hu mbas maŋga. Ami ka tli duk senenaɗi, ka kal duk sene gugutlunaɗi lay. Ami ka ci yo goloŋgaɗi lay. Ami hin tli ni voɗta ŋgolla na ɗegee ka tuɗ bik njufɗi lay, guluɗi lay ta ta hu li ma ami jak ki kay mbas maŋgana.»

¹⁸ Edom hoŋosi dira ana, «Agi ka jak varan taniɗi, li ka naɗi ni an cuk ha ki u suu man suu duuna duurugiya.»

¹⁹ Suu Israelna hoŋ dam ana, «Ami a jakami ni hu voɗta ɦawaa, lini ami caŋ yooŋŋa wa ami u yoori mamisina ni ami hin warakaŋu, va ma ami joɓom koŋŋa dew ni ana hinimi ami jakŋi u semiya.»

²⁰ Mul ma Edomma hoŋ dira ana, «Agi ka jak taniɗi.» Nam kal ay ki egesi u suuna um bolow cocoo, u tlesuu saɓakŋa kosi coco lay.

²¹ Ko ndaɗta na mul ma Edomma doo suu Israelna na asi jak kay mbas mambaɗi, suu Israelna tuɗ ki egemu.

Miɗ ma Aaron miɗna

²² Suu Israelna hin Kades ka tani tuɗ cuk u ɦinira Horra.

²³ Ha u ɦinira Horra ii hakara u zi ma Edomma, Yawe di gi Moiz u Aaron ana,

²⁴ «Aaron cemi ka dukugi oloɗi, nam tuɗ ki eg somoyom suu jewna, nam ka ndak a kal hu mbassa an ɦaɗ maŋ suu Israelnaraɗi, kay agi ŋgelen vunun li ka u boy ma an dagina ay fun mbo ma Meribanaɗi.

²⁵ Aŋ Moiz ɗiŋ kolo kay ɦinira Horra u Aaron u goromma Eleazar may.

²⁶ Aŋ fok baraw ma vi Aaronna cukum ki ta goromma Eleazar ni Aaron hin tlam kiyo, nam hin miɗ ay ni hu li namma.»

²⁷ Moiz li ko Yawe damba na may, asi ɗiŋ kolo kay ɦinira Horra ni ii suu Israelna halaŋ.

²⁸ Moiz fok baraw ma vi Aaronna cukum ki ta goromma Eleazar. Aaron miɗ ni hu li namma gaw, ni kolo kay yam ɦinira. Moiz u Eleazar hoŋ ɗiŋ ay ki ga may.

²⁹ Suu Israelna halaŋ wi ki ana Aaron miɗ ki wa. Suu Israelna tii Aaron ta ta buuna dok-hindi.