NDUMBA 19 - Boy Lonana

But mbutl mayra tlawra

¹ Yawe di gi Moiz u Aaron ana,

² «Gola ni gaɗta Yawe dagirara di suu Israelna ana, asi mbaaraŋ mbutl tamara taɗ tlawra aya, ni mbutla jivira bay ŋgulla egeɗta, ni mbutl mayra sa gaɗ jug ka keleɗɗira may.

³ Agi ɦal mbutl ndaɗta maŋ mul ma li ɓivunna. Eleazar. Asi kalaɗ ha ki doŋ kaana, ŋgaɗaɗ ni mul ma li ɓivunna coli huwa.

⁴ Mul ma li ɓivunna Eleazar kal cifiɗ kom duk busu mbutla, nam yeɗ busuna yam kiɗisiya yamam irim a fun Mbutluɓ ma Tokka na gay.

⁵ Ŋgoo dagan asi ŋgal mbutl ndaɗta ki ni u nam coli huwa, asi ŋgalaɗ bakaɗu, tliwiɗu, busuuɗu, u soɗoɗ halaŋ.

⁶ Mul ma li ɓivunna tli gu ma yam ana sedrena u hisop ma his jivina u baraw ma tlawna cili u tlimiɗ timigiina cukusi ha duk kura hu li ma mbutla ka ŋgalna.

⁷ Ŋgoo dagan mul ma li ɓivunna mbus barawi mamsina kiyo, mbus tam ki may, hin hoŋ vo hu zina, nam mbuɗ ki ni njenje ta ta fiɗigiya.

⁸ Sa ma ŋgal mbutlana mbus barawi mamsina ki may, mbus tam ki may, nam ki ni njenje ta ta fiɗigiya.

⁹ Sa ma tam ki li teteɗna hin tok but mbutla kolo ni namu, nam ŋgayam ha ki hu li ma teteɗna doŋ kaana, but namma hinni a tlumum u yo ma bulum cora kina maŋ suu Israelna, ni ɓivun ma kay dla corana.

¹⁰ Sa ma tok but mbutla ay kolona mbus barawi mamsina ki may, nam mbuɗ ki ni njenje ta ta fiɗigiya. Gaɗ ndaɗta hin ka duk suu Israelna ni a fafaɗta, ka mbuɗɗi, maŋ ŋgay ma ki cuki dukusina lay.»

Lira li taŋ ki teteɗta.

¹¹ Sa ma tin kom ay eg maɗ sa miɗinana, maɗ va maanage lay, mbuɗ ki ni njenje ta ta buuna kiɗisiya.

¹² Nam li tam ki teteɗ u yo ma mbus dla cora kina, ni hu buu ma hindina, hu buu ma kiɗisiyana ni nam mbuɗ ki teteɗ, na may lini nam li tam ay ka ki teteɗ hu buu ma hindina gawɗi ni hu buu ma kiɗisiyana ni nam ka teteɗ tuɗi.

¹³ Gegelay ma tin kom ay eg maɗ sa miɗina hin li tam ka ki teteɗɗina, ɓalak ki ni Ziŋ Yawera. Sa namma hin tlam ki duk suu Israelna kay ana nam mbus tam ay ka ki u yo ma mbus dla cora kinaɗi, nam ki ni njenjee, kaki ni u njenje mam ndaɗta gak gak.

¹⁴ «Gola ni gaɗta ndaɗta, lini sana miɗ wa hu Mbutluɓma, suu ka laki huna u sa ma kal ha hu Mbutluɓ nammana suu asina halaŋ ki ni njenjee ta ta buuna kiɗisiya.

¹⁵ Doyogi suu tini kalafi um vunusi bay dukka halaŋ ki mbuɗi njenjee.

¹⁶ Gegelay ma dutl ay kay maɗ sa ma asi cam ki ŋgoo bagi kala, ɗowba sem tay ay kay sok sa ma miɗi kala, ɗowba kay us sa kala ni, sa namma ki ni njenjee ta ta buuna kiɗisiya.

¹⁷ Kay sa namma ni agi yow but mbutl mayra ŋgalira cukuɗ hu zekŋa, vo yo ma bulum cora kina kay but namma may.

¹⁸ Sa ma ki teteɗna ka hum usu ma yam ana hisopma, kalam ay duk yo namma, yamam kay zira sana miɗ hura u tlesuu huna halaŋ, u suu warna lay, suu fasi ay hu zi ndaɗtana ɗowba kay sa ma tin kom eg maɗnana, ɗowba sa ma asi camma, sok sana u ussana lay.

¹⁹ Sa ma ki teteɗna yam yona eg sa ma ki njenjena ni hu buu ma hindina may, hu buu ma kiɗisiyana may, ni nam mbusum ki ko coomba wa, sa namma mbus barawi mamsina ki may mbus tam ki may, fiɗigi ndaɗta ni nam ki mbuɗi ni teteɗ.

²⁰ Na may sa ma mbuɗ ki njenje min ka a li tam ki teteɗɗina, sa namma tlam ki duk suu Israelna, kay nam hin mbuɗ Ziŋ Yawera ki njenjee, nam yam yo ma bulum cora kina ay ka egembi ni nam ki ni njenjee.

²¹ Gaɗ ndaɗta hin ka dukusi ni a fafaɗta. Sa ma yam mbo ma mbus cora kina eg suunana mbus barawi mamsina ki may, sa ma ŋgen yo nammana ki njenjee ta ta fiɗigiya.

²² Tlesuu sa ma njenjena tin kom egesina halaŋ ki ni njenjee. Sa ma hin ŋgen tam eg tle asinana ki ni njenje ta ta fiɗigiya.»