NDUMBA 18 - Boy Lonana

Muli suu li ɓivunna u suu Levina

¹ Yawe di Aaron ana, «Aŋu, goryoŋu u gorseŋŋa, agi ni suu may suu a hin hoŋ dira kay cora li hu Ziŋ Lonara, agi daɓaɗ ki ni agiya, na may cora li koŋ hu sunda li ɓivunnara, aŋ u goryoŋ daɓaɗ ndaɗta ni agi doy hol.

² Aŋ hin gorseŋ suu hu njaf ma vi Levina mbay li sunda uŋ hu Ziŋ Lonara may, asi ni a suu funuŋŋa njunuŋ a li sunda, may aŋ u goryoŋ cologi fun Mbutluɓ Galamba ni agi doy hol.

³ Asi gorseŋŋa li sunda ha fokoŋu ni hu Mbutluɓ ma Tokkana halaŋŋa, doy hol may ka asi ɦuɗ tasi ay fun li ma tlesuu hu Ziŋ Lonaraɗi, tuɗ eg givin ma togollaɗi lay, kay sa miɗ kiɗi, asi lay, taŋga lay.

⁴ Asi ni a suu funuŋŋa, asi li ni sunda hu Mbutluɓ ma Tokkana halaŋ, na may sunda agi laɗ kalafira ka sa ma daŋ kal ha huɗi.

⁵ Aŋ u goryoŋ li sunda hu givin ma togolla ni agiya, na ni suu Israelna sa ka hin a fi yara vi Lonara a mba kasi oloɗi.

⁶ Aŋ lay wiya, an manaŋ gorseŋ suu vi Levina a li sunda hu Mbutluɓ ma Tokkanni asiya, an yowosi ay ki duk suu Israelna ɦaŋsina ki a laŋ sunda, asi hin ki ni maŋ Yawe a li sunda hu Mbutluɓ ma Tokkana.

⁷ Aŋ u goryoŋu sunda laɗ hu givin ma togolla hin ki ni magi may, agi ni suu li sunda ha ki ŋgoo gojoli ma ca ki ii linana. Agi lagi ni sun magi ndaɗta may, an ɦagi ni sunda li ɓivunna agi laɗ ni ndaɗu. Sa ma daŋ ma kal ha hu kalna ni miɗ kiyo.»

Ɓorow ma vi muli suu li ɓivunna

⁸ Yawe di Aaron ana, «Aŋ gola an ɦaŋ yam tlesuu ɦansina ay ki manna halaŋ. Tlesuu teteɗ may suu suu Israelna ɦasi ayna halaŋ an hiniŋsina ni maŋ u goryoŋ a fafaɗta, gaɗ ndaɗta ka a bulum kiɗi.

⁹ Gola ni keŋ tlesuu aŋ a yowosi ki hu ɓivun ma teteɗ ma asi mbay a ŋgalam kina, tlesuu ka ŋgalasi kiɗina ni ana puura ta lam u fuɗtana, ɓivun ma bulum cora kina halaŋ, u ɓivun ma min duk ɦoŋgana, tlesuu asi ɦansina ay asina halaŋ, tlesuu teteɗ asina ni maŋ aŋu u goryoŋu.

¹⁰ Agi hin tasi ni ko tlesuu ma teteɗna, njufiina halaŋ ndak tiya, tle asina ni tlesuu teteɗna.

¹¹ Olo ni tlesuu suu Israelna ɦasi ay u min masirana an ɦaŋsina ki ni maŋ u goryoŋ halaŋ, gaɗ ndaɗta ni ta ka a mbuɗɗira, gegelay ma ka vo varaŋ ma wi tam ki teteɗna ndak a ti tle asina.

¹² Mbul ma jivina, sum veŋ ma jivi ma wilina u wa blena, yam tlesuu ne ki jew suu asi ɦasi ay maŋ Yawena, an ɦaŋsina.

¹³ Yam tlesuu asi tokosi ay hu mbassa halaŋŋa maŋ Yawe, an ɦaŋsina ni maŋu, suu may suu ka vo varaŋ wi tasi ki teteɗna ndak ti tle asina.

¹⁴ Va ma ki teteɗ ana suu Israelna tambina ki ni maŋŋa.

¹⁵ Gor tlesuu vuɗ fok jewna halaŋ suu asi mbaarasi ay maŋ Yawena ki ni maŋsina, gor suu warna u yoorina. Na may gor suu warna suu vuɗ fok jewna u gor yoori suu njenjena asi ndak mbuɗusiya.

¹⁶ Asi ndak mbuɗusi koŋŋi hu li ma goona li tilna dewna gaw. Ni u ŋga mayra aŋ a ŋgaasira. Ɗowba sikle li sunda hu ziŋ Lonara vadl. Sikle dew ni nekeɗ gram doogo.

¹⁷ Na may goŋ mbutla ma vuɗ fok jewna, goo timiina u goo ɦuna sa ka mbuɗusiɗi, kay asi ki ni teteɗ, aŋ voosi busuɗusi kay givin ma togolla, aŋ ŋgalasi mbulusi kay givin ma togolla, ni a ɓivun ma his jivina maŋ Yawe.

¹⁸ Tliwna hin ki ni maŋu, ko ndal dikŋa u gay ma njufna ni maŋsina.

¹⁹ Tlesuu teteɗ may suu, suu Israelna ɦansina kina an ɦaŋsina ni maŋu, aŋ u goryoŋ suu njufiina u suu tamagina lay, ni magi a fafaɗta. Ni galamba an vaɗ u agira ha ni na din din kaŋu u njafaŋ halaŋ galamba ndaɗta tak ki ni u vivunna. Galam ndaɗta ii Yawe ni ka mbuɗɗi.»

²⁰ Yawe di Aaron ana, «Duk suu Israelna ni jooŋ maa ka dukusiɗi, hu mbas masira ni vaaŋ ma ka huɗi, an tanda hin ni a jooŋŋa duk suu Israelna ni an gaw.»

Ɓorow ma vi suu vi Levina

²¹ Yawe di ana, «Gola goryoŋ Levina an ɦasi keŋ ma doogona ma suu Israelna taaram ayna ni masi halaŋ, ni a warak masina kay sunda asi ka laɗ hu Mbutluɓ ma Tokkana.

²² Kay ndaɗta suu Israelna ka ŋgen tasi ay eg Mbutluɓ ma Tokkanaɗi, ni kay ana asi hin miɗ kiɗi, asi tuɗ huwa ni dla cora casi ki maɗna.

²³ Goryoŋ Levina li sunda hu Mbutluɓ ma Tokkana ni asi doy hol. Lini asi li dla co hu liisi ma sunda wa ni, coosi ndaɗta ni kay yasira eŋga. Gaɗ ndaɗta irigi ni a gaɗta din dinda, ka jokgi, suu vi Levina halaŋ fi joo ka duk suu Israelnaɗi.

²⁴ Na may an ɦasi keŋ ma doogo ma suu Israelna ɦam ay maŋ Yawe kay sunda asi laɗta halaŋŋi masiya, kay ndaɗta an dasi ana asi ka fi joo ma daŋ duk suu Israelna oloɗi.»

Keŋ ma doogona

²⁵ Yawe di Moiz ana,

²⁶ «Aŋ di goryoŋ Levina ana, hu li ma asi taa keŋ ma doogona ko suu Israelna wa ni, asi kay tasira varak ɦal keŋ masi ma doogona ki maŋ Yawe may.

²⁷ Tlesuu agi ɦasi asina ndumusi ni ko ndal suu horokŋa ɦal yam waasinara na may.

²⁸ Kay ndaɗta agi yow keŋ magi ma doogona ma vi Yawena ay keŋ ma doogo ma suu Israelna taaragisina ayna ni na may. Ni agi ɦal yam tlesuu agi ɦasi maŋ Yawena halaŋŋi maŋ mul ŋgol ma li ɓivunna, Aaron.

²⁹ Tlesuu asi ɦagisinana halaŋŋi agi man suu jivina ɦasi maŋ Yawe a ɓivun ma teteɗna.

³⁰ Aŋ dasi olo, Lini agi ɦal yam suu jivina ki maŋ Bu Suuna wa ni, u suu hinna ni magisina ko ndal suu horokŋa hin u waasina u sum gugutluna kosira na may.

³¹ U suu hinna agi tasi u suu magisina hu li maragelay kay hin ki ni tlegeyegi kay warak magi ma agi ka li sunda hu Mbutluɓ ma Tokkana.

³² Lini agi man yam tlesuu jivina ki maŋ Bu Suuna jew wa ni u suu hinna agi tasiya, ni agi li ka coɗi, ka agi mbuɗ ɓivun ma vi suu Israelna ki njenjeɗi, ni agi ka hin miɗ kiɗi may.»