NDUMBA 17 - Boy Lonana

Ganungi suu vi suu may suu ay u Korena

¹ Yawe di Moiz ana,

² «Aŋ di mul ma li ɓivunna Eleazar, ma goŋ Aaronna, nam taa ganun suu ŋgal mbitla ay ki duk kura, kay asi mbuɗ ki ni teteɗ, tok murus kura njayaɗ ha ki na day may.

³ Ganun suu cuk mbitla his jivira vi suu warak ki kay dla coosira u iiri masirana, aŋ yowomu dliɗim ki va ma kulup kay givin ma togolla, kay nam halaŋ mbuɗ ki ni teteɗ ko asi mbaram ki fok Yawera. Nam hinni a va ma tak suu Israelna gasi humusina.»

⁴ Mul ma li ɓivunna Eleazar yow ganun walakka suu asi mbaarasi ay fok Yawena, asi dlasi ki a baa kay givin ma togolla.

⁵ Ni a gi humba maŋ suu Israelna kay ana sa ma ka hu njaf ma vi Aaronnaɗina ka ndak a ɦuɗ tam ay fok Yawe a ŋgal mbul ma hisnaɗi. A gasi humusi ana ka dlara hin vasi ko Kore na oloɗi, asi ba ki u suu mamsina. Yawe di boy namma ay ki jew fun Moiz lay.

Suu Israelna gurni eg gi Moiz u Aaron

⁶ Vini maɗiira wanni suu Israelna halaŋ gurni eg gi Moiz u Aaron ana, «Agiya, agi ci suu vi Yawe ki na ni kay mege?»

⁷ Hu li ma suuna ɓakasi ay na ni, gi Moiz u Aaron pereɗ irisi ni eg Mbutluɓ ma Tokkana na ɗow. Gola ni ɗugulla kuluɓ ki kolo kay Mbutluɓ ma Tokkana na dlum, bibiŋilla vi Yawera tak taɗ ay kiyo.

⁸ Moiz u Aaron ɦuɗ tasi ha fun Mbutluɓ ma Tokkana.

⁹ Yawe ɓak Moiz ana,

¹⁰ «Ҥuɗugi tagi ay ki duk suu asina, an min baasi ki cem cem.» Asi goɓ vogosi ga duk ndaŋgara.

¹¹ Moiz di Aaron ana, «Tli ŋgal maŋ ma ɗus mbitla cuk kura hu givin ma togolla hurum zak, tuɗ eg suu tokkina lasi ɓivun ma mbus cora kina kasiya, kay Yawe hurum ɓeŋ ki cocoo, tuguɗii bora gijaŋŋa wa ɗow.»

¹² Aaron tli ganun ma ɗus mbitla kom ko Moiz damba na. Nam liŋ tuɗ duk suu tokkina, ni tuguɗiira bora gijaŋŋa wa ɗow duk suu Israelna. Nam ŋgal mbitla li ɓivun ma bulum cora kina kay suuna.

¹³ Nam col ki duk ɦoŋ suu miɗina u suu irina, na ni miɗna seŋŋi na gaw.

¹⁴ Suu miɗ hu li namma ko tuguɗii ndaɗtana ni 14,700 ni ndum suu miɗ ay hu lina vi Korena ka huɗi.

¹⁵ Aaron hoŋ ha eg Moiz fun Mbutluɓ ma Tokkana, tuguɗii ndaɗta seŋ ni na gaw may.

Tokolora vi Aaronda

¹⁶ Yawe di Moiz ana,

¹⁷ «Aŋ di suu Israelna ana asi kaaŋ tokolora ay ki u njafasi na dew dew halaŋ. Suu ŋgolo suu fokosina ɦal tokolora ay na doogo yam mba' u deeresi halaŋ. Aŋ ɓii sem gegelay kay tokolo mamba.

¹⁸ Eg tokolora vi njaf suu vi Levina aŋ ɓii ni sem Aaron. Kay tokolora ki hu dee suu Israelna ni dew dew halaŋ.

¹⁹ An cuk tokolo ndaɗta ha kalafi hu Mbutluɓ ma Tokkana, fok Zandukka Galamba na gay hu li ma an ŋgafaŋ huna.

²⁰ Sa ma tokolo mamba col ɗuffa na, sa namma ni sa ma an manamma. Hu li namma ni an hin buɗuŋ ki ko vun ma suu Israelna laŋŋa egeŋŋa.»

²¹ Moiz njaɗ boy namma maŋ suu Israelna, suu masi suu ŋgolo suu fokosina taaram tokolora ay halaŋ, tokolora ay ki u dee suu ŋgolona dew dew halaŋ. Tokolora halaŋŋi doogo yam mba'. Tokolora vi Aaronda ay dukusi may.

²² Moiz cuk tokolo ndaɗta ha fok Yawe hu Mbutluɓ ma Tokkana.

²³ Vin maɗiira ni Moiz kal ha kalafi hu zira Zandukka hura, nam wiya ni tokolora vi Aaron ma hu njaf Levina col ɗuffa, ndaɗ gijaŋ tin ɓora may, ne vuɗ va ma yam ana amandana ki hu gaw.

²⁴ Moiz yow tokolora ay fok Yawe ki kiɗik halaŋ, a takaɗ ki maŋ suu Israelna halaŋ. Asi waɗ ki halaŋ, gegelay ni tli tokolo mamba mamba.

²⁵ Yawe di Moiz ana, «Hoŋ tokolora vi Aaron ha fun Zandukka Galamba kalafi hiniɗ hu na ta a tak ki maŋ suu li yasi eŋŋa. A asi hin gurni mayra asi gurni egenda ka asi miɗ kiɗi.»

²⁶ Moiz li na ko ndaɗta na may, nam li dla mayra Yawe dam ana laɗura may.

²⁷ Suu Israelna di Moiz ana, «Cemi ni aŋ ka wi ana ami ba ki wa naɗi su, ami ki ni baay halaŋ halaŋ.

²⁸ Gegelay ma ɦuɗ tam ay eg Ziŋ Yawera hin miɗ kiyo. Ami hin daɓ ki ni halaŋ ɗaŋgi su?»